မဲခေါင်၊ ဇူလိုင် ၂၂
“ဝီဖာ” မုန်တိုင်း အဖျားခတ်မှုကြောင့် ရှမ်းပြည်အရှေ့ပိုင်း၊ တာချီလိတ်မြို့တွင် ယမန်နေ့ညဦးပိုင်းက လေပြင်းတိုက်ခတ်သည့်အတွက် သစ်ပင်အများအပြား ကျိုးကျကာ မီးကြိုးများပြတ်တောက်ခဲ့သလို လူ ၂ ဦး ဓာတ်လိုက်ခံရကြောင်း ဒေသခံများထံမှ သိရသည်။
ဇူလိုင်လ ၂၁ ရက်နေ့ည ၇ နာရီခန့်တွင် တာချီလိတ်မြို့၊ ရန်အောင်မြေရပ်ကွက်၊ ပါလျံ ၁ နယ်မြေ၊ လွှမ်းမိုးဘုန်းတော်ကြီးကျောင်းရှေ့ လမ်းမတွင် လေပြင်းတိုက်ခတ်မူကြောင့် သစ်ပင်လဲကျပြီး မီးကြိုးများ ပြတ်တောက်သွားကာ အနီးရှိ ဆိုင်ကယ်ပြင်ဆိုင်မှ လူ ၂ ဦး ဓာတ်လိုက်ခံလိုက်ရခြင်း ဖြစ်ကြောင်း သိရသည်။
“လေတအားပြင်းတာ။ ကောင်းကင်ကလည်း မြင်ရတာ ကြောက်စရာကြီး၊ သစ်ပင်တွေ အတော်များများ ကျိုးကျတယ်။ ကားတောင် မောင်းမရလို့ လမ်းဘေးထိုးရပ်ထားပြီး ဘုရားတနေခဲ့ရတာ” ဟု ဒေသခံတစ်ဦးက ၎င်း၏အတွေ့အကြုံကို ပြောသည်။
ဓာတ်လိုက်ခံရသူ ၂ ဦးမှာ ကိုကျော်မြင့်ဦး ၂၄ နှစ်၊ ကိုဇင်းမင်းဖြိုး ၂၇ နှစ် တို့ဖြစ်ကြပြီး ဓါတ်လိုက်မှုကို အနီးရှိ အဆွေမွန်ဆေးခန်းတွင် ကုသခဲ့ကြောင်း၊ ကိုကျော်မြင့်ဦးမှာ ဝဲခြေသလုံး မီးလောင်ဒဏ်ရာ တစ်ချက် ရရှိပြီး အသက်အန္တရာယ် မစိုးရိမ်ရပဲ ယခုအခါ သက်သာနေပြီ ဖြစ်ကြောင်း စုံစမ်း သိရှိရသည်။
ထို့ပြင် ဝိန်းကျောက်ရပ်ကွက်၊ ဗိုလ်ချုပ်လမ်းမပေါ်ရှိ ရွှေဘူးသီးဟိုတယ်ရှေ့တွင် သစ်ပင်ကြီးကျိုးကျကာ ယာဉ်များသွားလာရ ခက်ခဲသည့်အထိ ဖြစ်ပွားခဲ့ခြင်း၊ ဘိုင်တောင် ဟိုတယ်အနီး သစ်ပင်ကြီး ကျိုးကျမှုကြောင့် လျှပ်စစ်ဓာတ်ကြိုးများ ပြတ်ကျမှုဖြစ်ပွားခဲ့ခြင်း၊ တော်ကော့ဘုန်းကြီး ကျောင်းရှေ့တွင်လည်း သစ်ပင်ကြီး ကျိုးကျခြင်းနှင့် မယ်ခေါင်ရပ်ကွက် ခရိုင်ရဲစခန်းရှေ့ ရှိ ညောင်ပင်ကြီးပြိုလဲခြင်းတို့ ဖြစ်ပွားခဲ့ကြောင်း သိရသည်။
“တော်ကော့ပြင် ဘုန်းကြီးကျောင်းထဲက ညောင်ပင်လည်း လဲသွားတယ်။ ဘေးကအိမ် ခြံစည်းရိုး ပြိုသွားတယ်။ ရွှေဗူးသီးရှေ့က သစ်ပင်ကျိုးတာတော့ ရှင်းပြီးပြီ။ အခုရပ်ကွက်ထဲတော့ မရှင်းလင်းသေးဘူးဗျ။ ကိုယ့်အားကိုယ်ကိုးပြီး လုပ်ရမလားတော့ မသိဘူး။ ရပ်ကွက်ကလူတွေ ဝိုင်းကူမယ် ထင်ပါတယ်။ ဘုန်းကြီးကျောင်းက ညောင်ပင်ဆိုတော့” ဟု ဒေသခံတစ်ဦးက ပြောသည်။
လတ်တလောဖြစ်ပေါ်လျက်ရှိသော အပူပိုင်းမုန်တိုင်း ဝီဖာ ( WIPHA) သည် အားကောင်းသောမုန်တိုင်း အဖြစ်သို့ ရောက်ရှိနေပြီး ဇူလိုင်လ ၂၂ ရက်နေ့တွင် ဗီယက်နမ်နိုင်ငံ အရှေ့ဘက်ကမ်းခြေသို့ ဖြတ်ကျော်ဝင်ရောက်နိုင်ပြီး ယင်းမုန်တိုင်း၏ ဆက်လက်ရွှေ့လျားမည့် လမ်းကြောင်းနှင့်မုန်တိုင်း ၏အရှိန်ကြောင့် မြန်မာနိုင်ငံအတွင်း ရှမ်းပြည် အရှေ့ပိုင်းနှင့် တောင်ပိုင်း၊ မန္တလေးတိုင်း၊ စစ်ကိုင်းတိုင်း (အထက်ပိုင်း)၊ ချင်းပြည်နယ်၊ ကရင်နီ (ကယား) ပြည်နယ်၊ ကရင်ပြည်နယ်၊ မွန်ပြည်နယ်နှင့် တနင်္သာရီတိုင်း တို့တွင် ယနေ့ ဇူလိုင်လ ၂၂ ရက်နေ့မှ ၂၅ ရက်နေ့များအတွင်း နေရာကွက်၍ မိုးသည်းထန်စွာ ရွာသွန်းမည်ဖြစ်သည်ဟု မိုးဇလက ထုတ်ပြန်ထားသည်။
၎င်းပြင် လေပြင်းတိုက်ခတ်ခြင်း၊ လျှပ်စီးလက်ခြင်း၊ မိုးကြိုးပစ်ခြင်း၊ ရုတ်တရက် ရေကြီးခြင်းနှင့် မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်ကြောင်းနှင့် ဘင်္ဂလားပင်လယ်အော်တွင် ဖြစ်ပေါ်နေသော လေဖိအားနည်းရပ်ဝန်း အရှိန်ကြောင့် ကပ္ပလီပင်လယ်ပြင်နှင့် ဘင်္ဂလား ပင်လယ်အော်တို့တွင် အနောက်တောင်မုတ်သုန်လေ အားကောင်းနိုင်ကြောင်း မိုးဇလ၏ သတိပေးထုတ်ပြန်ချက်တွင် ပါရှိသည်။
#MeKongNews
#တာချီလိတ်
#လေပြင်းတိုက်
#မီးကြိုးပြတ်
#တော်ကော့ပြင်
#ဝီဖာမုန်တိုင်း
