မဲခေါင်၊ ဇူလိုင် ၁၈
ဇူလိုင် ၁၆ ရက်တွင် အစ္စရေးက ဆီးရီးယားအစိုးရတပ်များကို ၃ ရက်ဆက် တိုက်ခိုက်မှုအဖြစ် မြို့တော် ဒမက်စကက်ရှိ စစ်ဌာနချုပ်ကို လေကြောင်းတိုက်ခိုက်မှု ပြုလုပ်ခဲ့ရာ ဌာနချုပ်ကို နောက်ခံထားပြီး ရုပ်သံသတင်းတင်ဆက်မှု Live လွှင့်နေသော သတင်းတင်ဆက်သူ မိန်းကလေး ထိတ်လန့်တကြား ထပြေးသွားသည့် ရုပ်သံမှတ်တမ်း ထွက်ပေါ်လာခဲ့သည်။
ကင်မရာမြင်ကွင်းအရ သတင်းတင်ဆက်သူနောက်ခံပြတင်းမှ ဆီးရီးယားစစ်ဌာနချုပ်သို့ ဒုံးကျည်များ ကျရောက်ကာ ဆက်တိုက် ပေါက်ကွဲသည်ကို မြင်ရပြီး ကင်မရာမြင်ကွင်းလည်း တုန်ခါသွားကာ တင် ဆက်သူလည်း ထိုင်ခုံမှ အလန့်တကြား ထပြေးသွားသည်ကို မြင်တွေ့ရသည်။
အစ္စရေးမှ ဆီးရီးယားအစိုးရတပ်ကို တိုက်ခိုက်နေရာတွင် အစ္စရေးနယ်စပ်နားသို့ အစ္စလာမ္မစ်ဝါဒီ ကိုင်စွဲ ထားသော စစ်သည်များ တပ်စွဲလာခြင်းကြောင့်ဖြစ်ပြီး နယ်စပ် တောင်ပိုင်းမြို့တော် ဆွိုင်းဒါးတွင်လည်း ဆီးရီးယားအစိုးရတပ်နှင့် ယခင်ပြုတ်ကျထွက်ပြေးသွားရသည့် သမ္မတ အာဆက်ထောက်ခံ လက်နက် ကိုင်များ၊ ဒရူဇီမျိုးနွယ်စုများနှင့် တိုက်ပွဲများ ဖြစ်ပွားနေခြင်းကြောင့် ဖြစ်သည်။
ဒရူဇီမျိုးနွယ်စုများသည် အစ္စရေးနှင့် ညီရင်းအစ်ကိုများသဖွယ် နှီးနွယ်နေကာ အစ္စရေး မြောက်ပိုင်း ကာမယ်နှင့်ဂယ်လိလီအရပ်၌ ဒရူဇီ ၁၃၀၀၀၀ ကျော်နေထိုင်သဖြင့် ၎င်းတို့ကို အစ္စလာမ္မစ်အယူသီး ဆီးရီးယားအစိုးရတပ် တိုက်ခိုက်ခြင်းအား ကာကွယ်ပေးရမည့် တာဝန်ရှိသည်ဟု အစ္စရေးဝန်ကြီးချုပ် နက်တန်ယာဟုက ထုတ်ပြန်ကာ ဆီးရီးယားတပ်များကို ဆက်တိုက် တိုက်ခိုက်နေခြင်းဖြစ်သည်။
ကိုကလင်း
Ref: Thesun
#MeKongNews
#အစ္စရေး
#ဆီးရီးယား
#ဗုံးကြဲ
#ဒရူဇီမျိုးနွယ်
