မဲခေါင်၊ ဇူလိုင် ၁၂
စစ်ကောင်စီ၏ နိုင်ငံတစ်ဝှမ်းတွင် ကျူးလွန်နေသည့် စစ်ရာဇဝတ်မှုများကို နိုင်ငံတကာခုံရုံးတွင် အမှုဖွင့် တရားစွဲဆိုမှုများ ပြုလုပ်ရန်နှင့် ကရင်နီတရားစီ ရင်ရေးယန္တရားများတွင်လည်း ထိုက်တန်သည့် အပြစ်ပေးနိုင်ရေး ဆောင်ရွက်နေကြောင်း ကရင်နီပြည် ကြားကာလ အုပ်ချုပ်ရေးကောင်စီ – IEC က ပြောသည်။
ကြားကာလ တရားစီရေးအရ အရေးယူနိုင်ရန်ကြိုးပမ်းနေသလို ပြည်လည်ထူထောင်ရေးကာလနှင့် အနာဂတ်ဖက်ဒရယ်ဖွဲ့စည်းပုံ အခြခံဥပဒေအရလည်း ထိုက်တန်သည့်ပြစ်ဒဏ်များပေးနိုင်ရန်နှင့် ကျူးလွန်ခံရသူများအတွက်လည်း ပြန်လည်ကုစားပေးနိုင်မည့် အစီအစဥ်များကို ယခုကတည်းက ရေးဆွဲ ဆောင်ရွက်နေကြောင်း IEC အတွင်းရေးမှူး (၁) မ ဇူးပဒုမ္မာ က မဲခေါင်၏ မေးမြန်းမှုကို ဖြေကြားသည်။
ဇူလိုင် ၉ရက်က ထုတ်ပြန်သည့် ကရင်နီပြည်နယ်တွင် ၂၀၂၅ ခုနှစ်အတွင်း စစ်ကောင်စီ၏ လေကြောင်း တိုက်ခိုက်မှုထုတ်ပြန်ချက်နှင့် ပါတ်သက်ပြီး မဲခေါင်မှ မေးမြန်းသည့် အပေါ် IEC မှ ဖြေကြားခဲ့ခြင်းဖြစ်သည်။
“ဒီထုတ်ပြန်ချက်မှာပါတဲ့အချက်အလက်တွေတင် မကဘူး ရှေ့မှာ ရှိခဲ့တဲ့ ဖြစ်ပွားခဲ့တဲ့ မူဆို လို လူမျိုး တုန်းသတ်ဖြတ်မှု၊ အုပ်စုလိုက် မီးရှို့သတ်ဖြတ်မှုတွေကို ကရင်နီရဲ့ တရားစီရင်ရေးအရ အမှုဖွင့် အရေးယူနိုင်ဖို့ ပြင်ဆင်ညှိနှိုင်းနေတာတွေရှိပါတယ်။ ကြားကာလတွင်သာမက အသွင်ကူးပြောင်းရေး ဖွဲ့စည်းပုံအခြခံဥပဒေအပြင် အနာဂတ်မှာ တည်ထောင်မယ့် ဖက်ဒရယ်အခြေခံဥပဒေ စသဖြင့် ဒီလိုမျိုးတွေမှာ အမှုမှန်အမှန်တရား ပေါ်ပေါက်ရေး အပြစ်ရှိသူတွေကို ထိုက်တန်တဲ့ အပြစ်ပေးအရေးယူမှုမျိုးတွေ လုပ်ဆောင်နိုင်ဖို့နဲ့ ကျူးလွန်ခံရသူတွေကို ပြန်လည်ကုစားရေး အစီအစဥ်တွေကို အခုကတည်းက တစ်ပြိုင်နက်တည်း ကရင်နီအနေနဲ့ လုပ်ဆောင်နေတာတွေ ရှိပါတယ်”ဟု IEC အတွင်းရေးမှူး (၁) က ဆိုသည်။
IEC ၏ ဇူလိုင် ၉ရက်က ထုတ်ပြန်ချက်တွင် ကရင်နီ ပြည်နယ်တွင် ၂၀၂၅ ခုနှစ်အတွင်း စစ်ကောင်စီ၏ လေကြောင်း တိုက်ခိုက်မှုကြောင့် အရပ်သားပြည်သူ ၃၃ ဦးသေဆုံးခဲ့ပြီး ၉၄ဦး ထိခိုက်ဒဏ်ရာ ရရှိခဲ့ကြောင်း ဖော်ပြပါရှိသည်။
၎င်းအပြင် စစ်ကောင်စီ၏လက်နက်ကြီး၊ ဒရုန်း၊ မြေမြုပ်မိုင်းနှင့် အရပ်သားများကို ပစ်ခတ်ခြင်းကြောင့် အရပ်သားပြည်သူ ၂၉ဦး သေဆုံးခဲ့ပြီး ၁၁၄ဦး ထိခိုက်ဒဏ်ရာရရှိခဲ့ကြောင်း ဆိုထားသည်။
ယင်းသို့ စစ်ကောင်စီက အပြစ်မဲ့ပြည်သူများကို ပစ်မှတ်ထား တိုက်ခိုက်မှုသည် နိုင်ငံတကာ ဥပဒေများကို ချိုးဖောက်ကာ စစ်ရာဇဝတ်မှု ကျူးလွန်နေကြောင်း IEC က ဆိုသည်။
စစ်ကောင်စီက ကရင်နီပြည်နယ်အတွင်းအရပ်သား နေအိမ်များကို မီးရှို့ဖျက်ဆီးခြင်း၊ ကုန်စည် စီးဆင်းမှု လမ်းကြောင်းများ ပိတ်ဆို့ခြင်း၊ အရပ်သားနေထိုင်ရာ ဒေသများကို အကြိမ်ကြိမ် စစ်ဆင်ရေးပြုလုပ်နေခြင်းသည် ကရင်နီပြည်သူများကို လူမျိုးသုဥ်းသတ်ဖြတ်မှု ဆောင်ရွက်ရန် ကြိုးပမ်းနေခြင်းဖြစ်ကြောင်း ဖော်ပြထားသည်။
ထို့အတွက် နိုင်ငံတကာအနေဖြင့် စစ်ကောင်စီက စစ်ရှောင်စခန်းများ၊ စာသင်ကျောင်းများ၊ ဘာသာရေး အဆောက်အအုံများကို လေကြောင်းတိုက်ခိုက်မှု ပြုလုပ်နေခြင်းကို ရပ်တန့်နိုင်ရန်အတွက် လေယာဥ်ဆီ ရရှိမှုကိုဖြတ်တောက်ခြင်း၊ အပြစ်မဲ့အရပ်သားများအတွက် စစ်မဲ့ဇုန် သတ်မှတ်ပေးရန်နှင့် စစ်ကောင်စီကို ထိရောက်စွာ အရေးယူပေးရန်လည်း IEC က တောင်းဆိုထားသည်။
မဟာ
#MeKongNews
#ကရင်နီ
#IEC
#စစ်ကောင်စီ
#စစ်ရာဇဝတ်မှု
