မဲခေါင်၊ ဇူလိုင် ၁၁
လူဝတ်လဲခဲ့ရသော ထိုင်းနာမည်ကြီး ဘုန်းကြီးကျောင်းမှ ကျောင်းထိုင်ဟောင်းတစ်ဦးက ထိုင်းနိုင်ငံအနှံ့ ဘုန်းကြီးများစွာနှင့် လိင်မှုဇာတ်လမ်းရှုပ်၊ ငွေညှစ်ခဲ့သည့် အမျိုးသမီးကို အကြောင်းမသိသေးမီ လူထွက်ကာ လက်ထပ်ရန်ပင် စိတ်ကူးခဲ့ဖူးကြောင်း ဖွင့်ဟသွားခဲ့သည်။
ထိုင်းနိုင်ငံ ဗုဒ္ဓဘာသာအသိုင်းအဝိုင်းများအကြား ထိတ်လန့်တကြားဖြစ်နေရသော သက်လတ်ပိုင်းအရွယ် မစ္စ ဂေါ့ဖ် ဆိုသည့် အမျိုးသမီးကို ဇူလိုင် ၄ ရက်နေ့က ဘန်ကောက်ရှိ နေအိမ်တွင် အကျင့်ပျက် ခြစားမှုတိုက်ဖျက်ရေး ရဲတပ်ဖွဲ့မှ ဝင်ရောက်စီးနင်း ဖမ်းဆီးခဲ့ခြင်းဖြစ်သည်။
ဆီကာဂေါ့ဖ်ဟုလည်း လူသိများသော ယင်းအမျိုးသမီး၏ ဖုန်း ၅ လုံးအတွင်း ထိုင်းနိုင်ငံတစ်ဝန်း ခရိုင်အနှံ့အပြားမှ နာမည်ကြီးဘုန်းတော်ကြီးကျောင်းမှ ကျောင်းထိုင်နှင့် နာမည်ကြီးစီနီယာဘုန်းကြီး အနည်းဆုံး ၁၅ ဦးမှ အများဆုံး ၂၀ ကြားနှင့် လိင်ပိုင်းဆိုင်ရာ ဖောက်ပြားထားသော ဗီဒီယိုနှင့် ဓာတ်ပုံ ၈၀၀၀၀ ကျော်ကို တွေ့ရှိခဲ့ရသဖြင့် အပူတပြင်း ယင်းဘုန်းကြီးများကို ရှာဖွေကာ သာသနာသန့်ရှင်းခြင်းအဖြစ် လူဝတ်များ လဲခိုင်းနေရသည်။
မစ္စဂေါ့ဖ်တွင် စီနီယာဘုန်းကြီးများနှင့်ရသည့် ၁၀ နှစ်၊ ၁၃ နှစ်နှင့် ၆ နှစ် ရင်သွေး ၃ ဦး ပင် ရှိနေကာ ဘာသာတရားကိုင်းရှိုင်းလှူဒါန်းထားသည့် ဘုန်းကြီးကျောင်း ရန်ပုံငွေများသည်လည်း ၎င်းထံသို့ ငွေညှစ် ခြိမ်းခြောက်ရယူခြင်းဖြင့် ရောက်ရှိကုန်သည်ဟု ကနဦး စုံစမ်းမှုများအရ သိရှိရသည်။
ထိုင်းနိုင်ငံ ဆာရာဘူရီခရိုင်ရှိ ဝပ်ဖရာပက်သာချိုင် ဘုန်းကြီးကျောင်းထိုင်ဟောင်း Thep Wachirathiraporn က ၂၀၁၉ ခုနှစ်တွင် မစ္စဂေါ့ဖ်နှင့် ဖေ့စ်ဘုတ်မှ စတင်သိရှိခဲ့ကာ မိမိအသုံးပြုရန် Toyota Alphard ကားတစ်စီး ဦးစွာ လှူဒါန်းခဲ့ကြောင်း၊ ပတ်သက်မှု နှစ်ပေါင်းများစွာ ကြာလာချိန်တွင် လူထွက်ပြီး လက်ထပ်ရန်ပင် စိတ်ကူးပြီးမှ အခြားသော ဘုန်းကြီးများစွာနှင့်လည်း မိမိနှင့်ပတ်သက်သကဲ့သို့ရှိနေသလို ပုံနှင့် ဗီဒီယိုများပြသကာ ငွေညှစ်မှုများခံရသည်ကို သိရှိရသောကြောင့် လူထွက်ပြီးမှ ဖော်ထုတ်တိုင်ကြားရန် စဉ်းစားနေချိန် ယခု အမှုပေါ်ပေါက်ပြီး လူဝတ်လဲခဲ့ရကြောင်း၊ ယခုထိ လူဝတ်လဲခဲ့သည့် ဘုန်းကြီး ၈ ပါးရှိနေပြီဖြစ်သော်လည်း အကြပ်ကိုင်ငွေညှစ်ခံရသည့် နိုင်ငံတစ်ဝန်း ဘုန်းကြီးများ မရှက်မကြောက် ရှေ့ထွက် တိုင်းကြားသင့်ပါကြောင်း ဖွင့်ဟသွားခဲ့သည်။
ကိုကလင်း
Ref: Bangkokpost
#MeKongNews
#ထိုင်းနိုင်ငံ
#ဘုန်းကြီးကျောင်း
#ငွေညှစ်
#ကျောင်းထိုင်ဘုန်းကြီး
