မဲခေါင်၊ ဇူလိုင် ၁၁
တိုက်ပွဲပြင်းထန်နေသည့် ရှမ်း-ကရင်နီနယ်စပ်တွင် စစ်ကောင်စီနှင့် PNO ပူးပေါင်းတပ်များသည် ဖယ်ခုံအရှေ့ဘက်ကမ်းသို့ စစ်ကြောင်း ထပ်မံထိုးလာနေကြောင်း အင်းလေး IPDF တပ်ရင်းမှ ဇူလိုင်လ ၁၁ ရက်တွင် သိရသည်။
ဖယ်ခုံအင်းအရှေ့ဘက်ကမ်းရှိ ရေပူ၊ စန့်စွဲ၊ စန့်လိတ်၊ လွယ်လုံ ကျေးရွာများအပြင် ဆောင်ကန်းဘက်သို့ အင်အားအများအပြားဖြင့် စစ်ကြောင်းထိုးလာနေသဖြင့် ရွာသားများ ထပ်မံထွက်ပြေးနေ ကြရကြောင်း အင်းလေး ၁၀၀၉ IPDF တပ်ရေးတာဝန်ခံ ကိုရဲသွေးက မဲခေါင်သို့ ပြောသည်။
“ညောင်ရွှေဘက်ထိုးလာတဲ့စစ်ကြောင်းက ဆောင်းနန်းခဲမှာ ခံနေဆဲပဲ။ တောင်ဘက်ကတော့ ဆောင်ကန်းလမ်းခွဲထိ စစ်ကြောင်းရောက်နေပြီ” ဟု ၎င်းကပြောသည်။
အင်အားအလုံးအရင်းဖြင့် ကုန်းသာဖက်မှ ဆောင်ကန်းလမ်းအတိုင်း စစ်ကြောင်းထိုး ဝင်ရောက်လာခဲ့သည့် စစ်ကောင်စီစစ်ကြောင်းသည် လယ်ထွန်ရွာအရှေ့ဖက် ကန်းကျိုင်းရွာတွင် ရောက်ရှိနေသည်ဟု သိရသည်။
ကျေးရွာများမှ ရွာသားများထွက်ပြေးနိုင်ရန် ကားများဖြင့် ကူညီသယ်ဆောင်ပေးနေသော်လည်း စက်သုံးဆီ လိုအပ်ချက်ရှိနေကြောင်း စစ်ဘေးရှောင်များကို ကူညီနေသူတစ်ဦးက ပြောသည်။
“ဓာတ်ဆီ တစ်ဂါလံ ကျပ်သုံးသောင်း၊ ဒါတောင်ဝယ်လို့မရချင်ဘူး။ ဂိတ်တွေမှာ ဆီတွေသယ်ခွင့်မရတော့ ဆီပြတ်နေတယ်။ စစ်ရှောင်က မရှိဘူးဆိုရင် ထောင်ချီနေတာ၊ ရသမျှနဲ့ ရှောင်နေကြရတယ်” ဟု ၎င်းကမဲခေါင်ကို ပြောသည်။
စစ်တပ်သည် မိုးဗြဲကို ပြန်ရပြီးနောက် ဖယ်ခုံဘက်ကို ရှင်းလင်းရန် လုပ်ဆောင်လာခြင်းဖြစ်သဖြင့် တိုက်ပွဲများ အပြင်းအထန် ပြန်လည်ဖြစ်ပွားလာမည်ဖြစ်သည့်အတွက် ဖယ်ခုံအရှေ့ဖက်ကမ်းမှ ရှောင်သင့်သည့်ရွာများ ရှောင်ကြရန် တော်လှန်ရေးအဖွဲ့များက တိုက်တွန်းလျက်ရှိသည်။
အထူးသဖြင့် ဖယ်ခုံမြို့နယ် အရှေ့ဘက်ခြမ်း လဟယ်-ထီရိ-ဆောင်းနန်းခဲ-လွယ်ပေါ-နန်းပေါလုံရွာ တစ်လျှောက်လမ်းရွာများသို့ အထူးသတိပြုကြရန် သတိပေးထားသည်။
စစ်ကောင်စီနှင့် PNO ပူးပေါင်းတပ်သည် ၎င်းတို့စစ်ကြောင်းထိုး တိုက်ခိုက်ဝင်ရောက်သည့် မြို့ရွာများကို မီးရှို့ဖျက်ဆီးလျက်ရှိရာ ဇူလိုင် ၁ ရက်က ပြန်လည်ဝင်ရောက်သည့် မိုးဗြဲမြို့ကို တစ်ပတ်အတွင်း ပြည့်သူနေအိမ်အလုံး ၉၀ ကျော် မီးရှို့ခဲ့ကြောင်း သိရသည်။
အလားတူ လက်ရှိ ၎င်းတို့ တပ်စွဲထားသည့် ဖယ်ခုံမြို့နယ်၊ ဆောင်နန်းခဲရွာမှ အိမ်ခြေ ၇၀ ကျော် ကိုလည်း မီးရှို့ဖျက်ဆီးခဲ့ပြီး ဖြစ်သည်။
စစ်ကောင်စီနှင့် PNO ပူးပေါင်းစစ်ကြောင်းများကို မိုးဗြဲ PDF၊ ဖယ်ခုံ PDF၊ လွိုင်ကော် PDF၊ အင်းလေး IPDF နှင့် KNDF တော်လှန်ရေးတပ်များက အပြင်းအထန် ခုခံတိုက်ခိုက်နေကြောင်း သိရသည်။
မဟာ
#MeKongNews
#ဖယ်ခုံမြို့နယ်
#စစ်ကြောင်းထိုး
#PNO
#စစ်ဘေးရှောင်
#စက်သုံးဆီ
