မဲခေါင်၊ ဇူလိုင် ၁၀
ယူကရိန်းဘက်မှ ကျူးကျော်ဝင်ရောက်သိမ်းပိုက်ခြင်းပင် ခံခဲ့ရသေးသော ရုရှား ကက်ရှ်ဒေသ မြို့စားလည်းဖြစ်၊ ရုရှားပို့ဆောင်ရေးဝန်ကြီးလည်းဖြစ်သူ ရိုမန်စတာရိုဗွိုက် (၅၃ နှစ်) သည် ၎င်းပိုင်ဒေသ၌ လေကြောင်းလုပ်ငန်းများအပေါ် ယူကရိန်းမှ အနှောင့်အယှက်ပေးနေခြင်းအား မတားဆီးနိုင်ဟု ဆိုကာ ရုရှားသမ္မတ ပူတင်က ရာထူးမှ ထုတ်ပယ်လိုက်ပြီးနောက် နာရီပိုင်းအကြာမှာပင် ဦးခေါင်းတွင်း သေနတ်ကျည်များထိမှန်ကာ ၎င်း၏ ကားအတွင်း သေဆုံးလျှက်တွေ့ရှိခဲ့ရသည်။
Tesla ကားအတွင်း ရုရှားပြည်ထဲရေးဝန်ကြီးကိုယ်တိုင် ဂုဏ်ပြုပေးအပ်ချီးမြှင့်ခဲ့သည့် ပစ္စတိုဖြင့်ပင် စတာရိုဗွိုက်သည် ကိုယ့်ကိုယ်ကိုယ် အဆုံးစီရင်ခဲ့ခြင်းဖြစ်ကြောင်း ရုရှားအာဏာပိုင်များက အမြန်ဆုံး ကောက်ချက်ချ ထုတ်ပြန်ခဲ့သည်။
၎င်း၏ ချစ်သူ ၂၅ နှစ်အရွယ် ပိုလီနာကော်နီးဗားကို အခင်းဖြစ်ပွားရာသို့ ဇူလိုင် ၇ ရက်တွင် ခေါ်ယူကာ သေဆုံးသူ အစစ်အမှန်မည်သူဆိုသည်ကို သက်သေတည်ခဲ့သော်လည်း ပိုလီနာသည် ချစ်သူ ဈာပနသို့ တက်ရောက်ခွင့်ပိတ်ပင်ခံရနိုင်သည်ဟု ဖခင် အက်ဒွပ်ဆိုသူက ထုတ်ဖော်ပြောဆိုခဲ့သည်။
စတာရိုဗွိုက်သေဆုံးမှုသည် လတ်တလော စုံစမ်းစစ်ဆေးမှုများပြုလုပ်နေဆဲဖြစ်ကာ အဖြစ်နိုင်ဆုံး အရာမှာ ကိုယ်ကိုယ်ကိုယ် သတ်သေခြင်းသာဖြစ်သည်ဟု ရုရှားစုံစမ်းထောက်လှမ်းရေးကော်မတီ ပြောရေးဆိုခွင့်ရှိသူ အမျိုးသမီး ဆဗတ်လာနာပက်ထရန်ကိုက ထုတ်ပြန်သော်လည်း ရုရှားနိုင်ငံရေး သိပ္ပံအင်စတီကျုမှ ဒါရိုက်တာ ဆာဂျီမားကော့ဗ်က ပူတင်ရာထူးမှ ထုတ်ပယ်ပြီး နာရီပိုင်းအကြာမှာပင် သေဆုံးခြင်းမှာ လူသတ်ခံရခြင်းသာ ဖြစ်နိုင်ကြောင်း ကောက်ချက်ချခဲ့သည်။
ယူကရိန်းကို ကျူးကျော်မှု စတင်ပြီးနောက်ပိုင်း ရုရှား ထိပ်တန်း ရေနံလုပ်ငန်းရှင်များ၊ အစိုးရပိုင်း၊ စစ်ဘက်ဆိုင်ရာပိုင်း အကြီးအကဲများ တိုက်ပေါ်မှ ပြုတ်ကျသေဆုံးမှုများ၊ ကိုယ့်ကိုယ်ကိုယ် သတ်သေမှုများ ဆက်တိုက် ဆိုသလို ဖြစ်ပွားခဲ့မှုများတွင်လည်း နားလည်ရခက်သည့် ထူးခြားသေဆုံးမှုများဖြစ်နေသဖြင့် အသတ်ခံ ရခြင်းဖြစ်နိုင်သည်ဟု ဆာဂျီမားကော့ဗ်က ဆိုသည်။
စတာရိုဗွိုက်သည် ၂၀၂၁ ခုနှစ်က သားသမီး ၂ ယောက်ထွန်းကားခဲ့ရာ ဇနီးဟောင်းဖြင့် ကွာရှင်းခဲ့ပြီး ၂၅ နှစ်သာရှိသေးသော ပိုလီနာနှင့် လက်တွဲခဲ့သည့်မှာ ကြာခဲ့ပြီဖြစ်ကာ မင်္ဂလာပင်ဆောင်တော့မည်ဟု သိရှိ ရသည်။
ပိုလီနာ၏ဖခင် အပ်ဒွပ်ဆိုသူက စတာရိုဗွိုက်သေဆုံးပြီးနောက် သမီးဖြစ်သူနှင့် အဆက် အသွယ်ရကာ မည်မျှ ခံစားနေရသည်ကို သိရှိသလို သမီးဖြစ်သူက သေဆုံးမှုနှင့်ပတ်သက်ပြီး မည်သည့် အကြောင်းတရား တစ်စုံတစ်ရာကိုမှ ပြောလိုခြင်းမရှိ၊ ပြောလည်း မပြောခဲ့ကြောင်း၊ ချစ်သူ ဈာပနကိုပင် တက်ခွင့်ပိတ်ပင်ခံရနိုင်ဖွယ်ရှိကာ သမီးဖြစ်သူ ကိုယ်ရေးကိုယ်တာအကြောင်းလည်း မိမိတို့ မမေးမြန်းခဲ့ဟု မီဒီယာသို့ ပြောကြားသွားခဲ့သည်။
စတာရိုဗွိုက် ရာထူးမှထုတ်ပယ်ခံရမှုမှာ အကျင့်ပျက်လာဘ်စားမှုပြဿနာနှင့်ပတ်သက်သည်ဟု အတည်မပြုနိုင်သော သတင်းများထွက်ခဲ့သေးပြီး ဇူလိုင် ၅ ရက်က သမီးဖြစ်သူ၏ ပြိုင်ပွဲတစ်ရပ် ဝင်ရောက်ယှဉ်ပြိုင်မှုသို့ ရောက်လာခဲ့ကာ တစ်နာရီပင်မပြည့်ဘဲ သမီးကိုပွေ့ဖက်နှုတ်ဆက်ပြန်သွား ပြီးနောက် မိသားစုနှင့် ထပ်မံအဆက်အသွယ်မရတော့ဘဲ သေဆုံးခဲ့ခြင်းဖြစ်သည်ဟုလည်း သိရှိရသည်။
ကိုကလင်း
Ref: Thesun
#MeKongNews
#ရုရှား
#ပို့ဆောင်ရေးဝန်ကြီး
#သေဆုံး
#ယူကရိန်း
