မဲခေါင်၊ ဇွန် ၃၀
လာဘ်ယူမှုများ၊ ပြည်သူအပေါ် မတရားအနိုင်ကျင့်မှုများဖြင့် နာမည်ကြီးနေသည့် တောင်ကြီးမြို့မှ ရွှေတောင်ရပ်ကွက် အုပ်ချုပ်ရေးမှူး ဦးသန်းရွှေနှင့် စိန်ပန်းရပ်ကွက် အုပ်ချုပ်ရေးမှူး ဦးသောင်းရွှေတို့ကို ပြည်နယ်ဒုစရိုက်နှိမ်နင်းရေးစစ်ဆေးနေကြောင်း သိရသည်။
လက်ရှိ စစ်ကောင်စီ၏ ရှမ်းကြီးချုပ်နှင့် နယ်သားချင်းအတူတူဟု ဆိုကာ တောင်ကြီးမြို့တွင် ထင်တိုင်းကြဲနေသည့် ရွှေတောင်ရပ်ကွက်အုပ်ချုပ်ရေးမှူး ဦးသန်းရွှေကို တောင်ကြီးမြို့ပေါ်တွင် စစ်မှုထမ်းအကြောင်းပြ ငွေညှစ်မှုများကြောင့် လက်ရှိတွင် ပြည်နယ်ဒုစရိုက်နှိမ်နင်းရေးက စစ်ဆေးနေသလို နေပြည်တော်ဗဟိုပြည်သူ့စစ်မှုထမ်း ခေါ်ယူရေးအဖွဲ့ အမိန့်အရလည်း မကြာမီရက်ပိုင်းတွင် စစ်ဆေးခံရမည်ဖြစ်ကြောင်း သတင်းရင်းမြစ်များထံမှ သိရသည်။
ဦးသန်းရွှေသည် စိန်ပန်းရပ်ကွက် အုပ်ချုပ်ရေးမှူး ဦးသောင်းရွှေနှင့် ပူးပေါင်းကာ ပြီးခဲ့သည့် ဖေဖော်ဝါရီလက စစ်မှုထမ်းရှောင်နေသူကို လက်ခံထားသည်ဟု စွပ်စွဲပြီး ကံကြီးရပ်ကွက်နေသူတစ်ဦးထံမှ ကျပ်သိန်း ၁၀၀ ငွေညှစ် တောင်းခံမှုနှင့် ပတ်သက်၍ စစ်ဆေးခံရမည်ဖြစ်ကြောင်း သိရသည်။
ယင်းငွေညှစ်မှုတွင် ငွေကို စိန်ပန်းနှင့် ရွှေတောင်အုပ်ချုပ်ရေးမှူးများ တစ်ဝက်စီ ခွဲယူလိုက်ကြသော်လည်း ငွေလက်ခံချိန် ည ၁၁ နာရီကျော်၌ ရပ်ကွက်ရုံးတွင် ရှိနေသည့် ပျူစောထီးအဖွဲ့ဝင် ၁၀ ဦးထက် မနည်းရှိနေပြီး အမှုကို စစ်ဆေးရာတွင် ၎င်းတို့ကလည်း သက်သေ ထွက်ဆိုကြမည် ဖြစ်ကြောင်း ဒေသခံတစ်ဦးက မဲခေါင်ကို ပြောသည်။
“ဆရာကြီးတွေပဲ ခွတုတ်နေတာ၊ စစ်မှူထမ်းမပါအောင်ဆိုပြီး သိန်း၁၀၀ စီတောင်းယူပြီးမှ စစ်ထဲထည့်တဲ့ကိစ္စ မကျေနပ်လို့ ငွေပြန်တောင်းတဲ့ကိစ္စတွေ၊ အရင်လက်နက်မှုကိစ္စတွေ၊ သူရှုပ်ထားတာအများကြီး။ ဝန်ထမ်းတွေဆို တော်တန်ရုံတောင် ဂရုစိုက်တာမဟုတ်ဘူး၊ ခုက ရပ်ကွက်က မခံနိုင်လို့ တပ်ပိုင်းကတဆင့် တိုင်တာ၊ အရပ်ဖက်ဆို ဝန်ကြီးချုပ်လူဆိုပြီး မလုပ်ရဲကြမှာစိုးလို့” ဟု ရွှေတောင်ရပ်ကွက်နေသူတစ်ဦးက မဲခေါင်ကိုပြောသည်။
လက်ရှိ တောင်ကြီး ၂၂ ရပ်ကွက်တွင် စိန်ပန်း၊ ရွှေတောင်နှင့်ရတနာသီရိ ရပ်ကွက်များမှာ စစ်မှုထမ်းအမည်စာရင်း ပါပါ၊ မပါပါ တစ်အိမ်လျှင် ကျပ် ၅သောင်းစီထည့်နေရကြောင်း၊ ယင်းအထဲ၌ ရွှေတောင်မှ ဦးသန်းရွှေ၊ စိန်ပန်းမှရာအိမ်မှူးဦးခင်မှီ ဆိုသူတို့မှာ အခြားရပ်ကွက်များထက် ပြည်သူအပေါ် ဖိနှိပ်မှု အဆိုးဆုံး အမည်ထွက်နေကြောင်း ဒေသခံများက ပြောသည်။
“သန်းရွှေထံ စစ်မှုထမ်းမဲ ပေါက်သူတွေက ပိုက်ဆံလည်း ပေးရပြီး လွတ်လည်း မလွတ်ဘူး။ ငွေကို တစ်လုံးတည်းယူပြီး ခုသူ့ကတိမတည်လို့ ပြန်တောင်းတာ ပြန်မပေးဘဲ တိုင်ချင်ရာတိုင် ဂရုမစိုက်ဘူးပြောတဲ့အပြင် သေနတ်တကားကားနဲ့ ခြိမ်း ခြောက်နေတာ” ဟု ဒေသခံတစ်ဦးက ပြောသည်။
၎င်းဦးသန်းရွှေသည် မြို့နယ် မဘသနှင့်လက်ရှိ တောင်ကြီးမြို့၏ ပျူစောထီးခေါင်းဆောင်ဖြစ်ပြီး လက်နက်ကိုင်ဆောင်ခွင့်ရထားသည့် တစ်ဦးတည်းသော အုပ်ချုပ်ရေးမှူးလည်း ဖြစ်ကြောင်းသိရသည်။
ပြီးခဲ့သည့် ၂၀၂၄ ခုနှစ်က လက်နက်မှောင်ခိုမှုပေါ်ပေါက်သည့်အတွက် ရဲတပ်ဖွဲ့ကို လာဘ်ထိုးပြီး အမှုကိုရုတ်သိမ်းခဲ့သေးကြောင်း၊ ထို့ပြင် မူးယစ်ရောင်းသည့် ကိစ္စများလည်းရှိနေကြောင်း ရပ်ကွက်နေ ပြည်သူများထံက သိရသည်။
#MeKongNews
#တောင်ကြီးမြို့နယ်
#ရွှေတောင်ရပ်ကွက်
#စိန်ပန်းရပ်ကွက်
#ဦးသန်းရွှေ
