မဲခေါင်၊ ဇွန် ၂၆

ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ်တွင် စိတ်ကျန်းမာရေးချို့တဲ့သူအပါအဝင် လူငယ် ၂ ဦးကို စစ်မှုထမ်းရန်ဟုဆိုကာ ရဲများက ဖမ်းဆီးသွားပြီး နောက်တစ်နေ့တွင် ကျပ် ၈၅ သိန်းဖြင့် လာပြန်ရွေးခိုင်းကြောင်း ဒေသခံများထံမှ သိရသည်။

ပြီးခဲ့သည့် ဇွန်လ ၂၁ ရက် ညပိုင်းက ပင်းတယမြို့နယ်၊ ကျောက်စုကျေးရွာမှ စစ်မှုထမ်းရန် မဲပေါက်ထားသူ ကိုဖိုးအော်နှင့် ကိုတူတူတို့ကို ရဲများက ခဏဟုဆိုကာ လာခေါ်သွားပြီး နောက်တစ်နေ့တွင် မိဘများက ရဲစခန်းသို့ လိုက်သွားရာ ပြန်လွှတ်ပေးရန်အတွက် တစ်ဦးလျှင် ကျပ် ၈၅ သိန်းစီ တောင်းခဲ့ကြောင်း သိရသည်။

“၂၁ ရက် ညမှာ ခဏလောက်လိုက်ခဲ့ဆိုပြီး အိမ်အထိလာခေါ်သွားတယ်ဗျ။ ၂၂ ရက်ကျတော့ မိဘများလိုက်သွားထုတ်တော့ ၈၅ သိန်းနဲ့ ၂ ယောက်လုံးရွေးလာရတယ်ဗျ။ မောင်ဖိုးအော်ဆိုတဲ့ ကောင်လေးက စိတ်မမှန်ပါဘူး။ တစ်ရွာလုံးလည်းသိတယ်၊ အဆင်မပြေတဲ့မိသားစုကပါဗျ။ ပိုက်ဆံတွေလိုက်ချေးပြီး ထုတ်လာရတယ်ဗျ” ဟု ကျောက်စုရွာဒေသခံ တစ်ဦးကဆိုသည်။

ပင်းတယမြို့နယ်မှ အခြားရွာများတွင် ရွာသားများ စစ်မှုထမ်းမလိုက်ရစေရန် အိမ်တိုင်းစေ့ ငွေကောက်ပြီး အုပ်ချုပ်ရေးမှူးများက လူစားထိုးရန်စီစဥ်ပေးကြသော်လည်း ကျောက်စုကျေးရွာအုပ်ချုပ်ရေးမှူး ဦးဇော်လင်းက ၎င်းရွာမှ စိတ်ကျန်းမာရေး ချို့တဲ့သူ ကိုဖိုးအော်နှင့် ကိုတူတူ အဖမ်းခံရမှုနှင့် ပတ်သက်ပြီး တစုံတရာဆောင်ရွက်ပေးခြင်း လုံးဝမရှိကြောင်းသိရသည်။

“ဖမ်းခံရပြီး သွားထုတ်တဲ့နေ့ကတောင် အုပ်ချုပ်ရေးမှူးက မလိုက်ပေးပါဘူး။ သူ့လုပ်ငန်းအတွက် မန္တလေးကို ခရမ်းချဉ်သီးသွားပို့ပေးနေတာပါ။ တခြားရွာတွေမှာဆိုရင် ပိုက်ဆံကောက်ပေးပါတယ် တစ်အိမ်ဘယ်လောက်ဆိုပြီး၊ လူအစားထိုးသွားကြတာပေါ့။ ရွာသူရွာသားတွေကလည်း မသွားချင်ကြတော့ ပိုက်ဆံ‌ဘယ်လောက်ကောက်ကောက် ထည့်ပေးမယ်လို့ပြောလည်း နင်တို့ဘာသာနင်တို့လုပ် ငါမလုပ်ပေးဘူးလို့ ပြောပါတယ်” ဟု ဒေသခံတစ်ဦးက ဆိုသည်။

လက်ရှိတွင် ကျောက်စုရွာ၌ အုပ်ချုပ်ရေးမှူး တာဝန်ယူပေးခြင်းမရှိတာကြောင့် အခြားကျေးရွာများကဲ့သို့ စစ်မှုထမ်းမဲနှိုက်ရခြင်းမရှိတော့ဘဲ ထွေအုပ်မှတဆင့် ရဲတပ်ဖွဲ့အား ရွာသားနာမည်ဖြင့် တိုက်ရိုက်ဖမ်းခိုင်းပြီး ပြန်လည်လွတ်မြောက်ရန်အတွက် ငွေပမာဏများစွာ ပေးနေရခြင်းဖြစ်ကြောင်း သိရသည်။

ယခင်က မဲနှိုက်ရာတွင်လည်း မဲနှိုက်ရမည့် အသက်ပြည့်ပြီးသူများ စာရင်းတွင် ခြေထောက်ကျိုး၍ စတီးရိုးထည့်ထားသူများပင် ပါခဲ့သော်လည်း အုပ်ချုပ်ရေးမှူး ဦးဇော်လင်း၏ သားနှင့် သားမက်တို့ မပါဝင်ခဲ့ကြောင်း သိရသည်။

ကျေးရွာဒေသခံများကမူ ကိုဖိုးအော်နှင့် ကိုတူတူတို့ ဖမ်းခံရပြီး ငွေကြေးအမြောက်အများဖြင့် ပြန်ရွေးရသည့်ဖြစ်စဥ်မျိုး နောက်ထပ်ဖြစ်မှာ စိုးရိမ်နေကြရကြောင်း သိရသည်။

#MeKongNews
#ပင်းတယ
#စစ်မှုထမ်း
#ကျောက်စုကျေးရွာ
#အုပ်ချုပ်ရေးမှူး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)