မဲခေါင်၊ ဇွန် ၂၅
ကားပစ္စည်းဆိုင်ဖွင့်ပွဲမှ လင်ခရူဆာကားဖြင့် ပြန်လာသူတစ်ဦးကို လမ်းတွင် တားဆီးကာ လူကိုသေနတ်ဖြင့်ပစ်သတ်ပြီး ကားကိုယူဆောင်သွားကြောင်း ဒေသခံများထံမှ သိရသည်။
ရှမ်းပြည်တောင်ပိုင်း၊ တောင်လေးလုံးဘက်မှ ဟဲဟိုးဘက်သို့အသွား ရထားသံလမ်းအကျော်၊ ကျောက်ခွဲစက်အနီးတွင် ဇွန်လ ၂၄ ရက် နေ့လယ် ၂ နာရီခွဲခန့်က လင်ခရူဆာ မော်တော်ကားကို တား၍ ယာဉ်ပိုင်ရှင်ကို သေနတ်ဖြင့် ပစ်သတ်ပြီး ကားအောက်သို့ ဆွဲချကာ မော်တော်ကားကို မောင်းယူထွက်ပြေးသွားခြင်းဖြစ်ကြောင်း ဟဲဟိုးလူမှုကူညီသူတစ်ဦးက ပြောသည်။
“အနီးကပ်သေနတ်နဲ့ ၆ ချက်ပစ်ခံရတာ။ ဟဲဟိုးကနေ အောင်ပန်းနာရေးကားနဲ့ ကျောက်ပန်းတောင်းကို ပို့တယ်” ဟု ၎င်းက မဲခေါင်ကို ပြောသည်။
သေဆုံးသူမှာ ရှမ်းပြည်တောင်ပိုင်း၊ အေးသာယာမြို့၊ အကွက်ကြီး (၅)၊ မြို့သစ်ရပ်ကွက်နေသူ လျှံမင်းသန့်၊ အသက် ၂၃နှစ်ဖြစ်ကြောင်း မိသားစုထံမှ အတည်ပြုစုံစမ်းသိရှိရသည်။
လျှံမင်းသန့်သည် ဇွန်လ ၂၄ ရက် နံနက် ၈ နာရီခွဲ အချိန်ခန့်၌ အေးသာယာရှိ နေအိမ်မှ တစ်ဦးတည်း ယာဉ်အမှတ် YYGN 4 (3k/6669) Toyota Land Crusier အနက်ရောင် မော်တော်ယာဉ်ဖြင့် “ဒေါ်ပေါက်” ကားပစ္စည်းဆိုင်ဖွင့်ပွဲရှိရာ အောင်ပန်းမြို့သို့ ထွက်ခွါသွားကြောင်းနှင့် ၁၁ နာရီ အချိန်ခန့်တွင် နေအိမ်သို့ ပြန်လာနေကြောင်း ဖုန်းအဆက်အသွယ် နောက်ဆုံးရရှိခဲ့သည်ဟု သိရှိရသည်။
လူသတ်သမား ယူဆောင်သွားသည့်ကားမှာ မှတ်တမ်းများအရ ၁၂ နာရီ ၁၅ မိနစ်အချိန်တွင် ဟဲဟိုး-အောင်ပန်းသွားကားလမ်း ဆွမ်းအုပ်ကွေ့သို့ ဖြတ်သန်း၍လည်းကောင်း၊ ၁၂ နာရီ ၁၇ မိနစ်အချိန်တွင် ဟဲဟိုးလေဆိပ်လမ်းဆုံမှတဆင့် အောင်ပန်းမြို့ ဘက်သို့ ဖြတ်သန်းမောင်းနှင်သွားသည်ကို တွေ့ရှိရပြီးနောက် တီကျစ်သွားလမ်းတွင် ပြန်တွေ့ရကြောင်း သိရသည်။
ယင်း ကားမှာ Master Key နှင့် စက်နှိုးရသည့် အမျိုးအစားဖြစ်သည့်အတွက် မူရင်းသော့မှာ သေဆုံးသူ ယာဉ်မောင်း၏ အင်္ကျီအိတ်ကပ်ထဲတွင် ကျန်ရှိနေသဖြင့် စက်ရပ်လိုက်လျှင် ပြန်နှိုးမရတော့သဖြင့် ကားကို ထားခဲ့ခြင်းဟု ယူဆရပြီး လူသတ်သမားကိုမူ ရဲများက ရှာဖွေဆဲဖြစ်ကြောင်း သိရသည်။
#MeKongNews
#ဟဲဟိုး
#ကားလု
#လူသတ်
#လင်ခရူဆာ
