မဲခေါင်၊ ဇွန် ၂၅

၂၀၂၄ ခုနှစ်ဧပြီ ၁၇ ရက်က ပိုလန်နိုင်ငံ ရက်ဇောလေဆိပ်တွင် ယူကရိန်းသမ္မတ ဇီလန်းစကီးအား ပူတင် စေခိုင်းသည့် စပိုင်တစ်ဦး လုပ်ကြံရန် ကြံစည်မှုနှင့်ပတ်သက်ပြီး ယူကရိန်းထောက်လှမ်းရေး SBU က ဇွန် ၂၂ ရက်၌ ပထမဆုံးအကြိမ် ရှင်းလင်းထုတ်ပြန်ခဲ့သည်။

ရုရှားထောက်လှမ်းရေး FSB ကို ပူတင်က ဇီလန်းစကီးအား လုပ်ကြံရန် စေခိုင်းမှုတွင် FSB မှ နှစ်ပေါင်းများစွာ ဇာတ်မြှုပ်ပြီး သာမန်လူသားအဖြစ် နေထိုင်ရှင်သန်နေသည့် ကြောက်စရာ Sleeper Agent အဖြစ် မွေးထားသူ စပိုင်တစ်ဦးအား ပိုလန်လေဆိပ်၌ လုပ်ကြံခိုင်းခဲ့ခြင်းဖြစ်ကြောင်း၊ ဖမ်းဆီးရမိသော အမျိုးသားမှာ အငြိမ်းစား ရုရှားစစ်အရာရှိဖြစ်ကာ ဆယ်စုနှစ်အတော်ကြာကတည်း က ရုရှား FSB မှ စပိုင်အဖြစ် မွေးခဲ့သူဟု ဆိုသည်။

၎င်းသည် ပူတင်ကဲ့သို့ အစိတ်စိတ်အမွှာမွှာပြိုလဲ သွားသည့် ဆိုဗိယက်ပြည်ထောင်စုကြီးကို ပြန်လည် လွှမ်းဆွတ်နေသူလည်းဖြစ်ကာ ဇီလန်းစကီးအား လုပ်ကြံမှုတွင် အစီအမံမျိုးစုံအဖြစ် စနိုက်ဘာဖြင့်လုပ်ကြံမှု၊ FPV ဒရုန်းဖြင့်လုပ်ကြံမှုများကိုလည်း လေ့ကျင့်ပြင်ဆင်ထားကာ နောက်ဆုံး ပိုလန်လေဆိပ်တွင်မူ ရသည့်နည်းဖြင့် လုပ်ကြံရန် စီစဉ်ထားသော်လည်း ပိုလန်ပြည်ထဲရေးဝန်ကြီးဌာနနှင့် ယူကရိန်း SUB ထောက်လှမ်းရေးအဖွဲ့များ ပူးပေါင်းဖော်ထုတ်ခြင်းဖြင့် ဖမ်းဆီးနိုင်ခဲ့ခြင်းဖြစ်သည်ဟု SUB စပိုင်အဖွဲ့ အကြီးအကဲ ဗိုလ်မှူးချုပ် ဗက်ဆိုင်းမာလိခ် က ရှင်းလင်းပြောကြားခဲ့သည်။

လုပ်ကြံမှုမအောင်မြင်သောကြောင့် ခိုင်းစေသည့် ဗိုလ်မှူးချုပ် ဆာဂျီဘီဆီဒါသည်လည်း ရာထူးမှ ဖယ်ရှားခံခဲ့ရသည်ဟု ဆိုသည်။

ပူတင်သည် ဇီလန်းစကီးကို ယခုတစ်ကြိမ်သာ လုပ်ကြံရန် စီစဉ်ခဲ့ခြင်းမဟုတ်ဘဲ ယူကရိန်းကို ရုရှား ပထမဆုံးနေ့အဖြစ် ကျူးကျော်ဝင်ရောက်စဉ် ကိဗ်မြို့ရှိ အိမ်တော်သို့ လေထီးဖြင့် ရုရှားလုပ်ကြံရေး အထူးတပ်ဖွဲ့များ ဆင်းသက်ကာ ၂၀၂၂ ဖေဖော်ဝါရီ ၂၄ ရက် လုပ်ကြံမှုတွင်လည်း ကံကောင်းပြီး လွတ် မြောက်ခဲ့ကြောင်း၊ အိမ်တော်အတွင်း လုပ်ကြံသူနှင့် ကာကွယ်သူအလောင်းများကို မြင်ခဲ့ရကြောင်း၊ အခြားသော လုပ်ကြံမှုများလည်း ရှိခဲ့ရာတွင် ကိဗ်မြို့၌ပင် အနည်းဆုံး ၈ ဦးသေဆုံးပြီး ဒါဇင်ချီ ဒဏ်ရာရခဲ့သည့်ကြားမှ လွတ်မြောက်ခဲ့သည်ဟု ဇီလန်းစကီးကိုယ်တိုင်က ဂါးဒီးယန်းနှင့် အင်တာဗျူးတွင် ပြော ကြားခဲ့သည်။

ယင်းပြောဆိုမှုတွင် ပူတင်သည် မိမိအား လုပ်ကြံရန် စပိုင်များစွာ စေလွှတ်ခဲ့ရာတွင် ရုရှား စပိုင် ၅၀၀ ကျော်ကို ဖမ်းဆီးနိုင်ခဲ့သော်လည်း လမ်းစရှာရန်အရေးမှာ ကိုဗစ် -၁၉ ကဲ့သို့ လမ်းစ မှန်သမျှ ရှင်းလင်းဖျောက်ဖျက်မှုကြောင့် လိုက်ရခက်သည်ဟုပင် ဇီလန်းစကီးက ပြောခဲ့ဖူးသည်။

ကိုကလင်း
Ref: Thesun
#MeKongNews
#ရုရှား
#ဇီလန်းစကီး
#ယူကရိန်း
#လုပ်ကြံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)