မဲခေါင်၊ ဇွန် ၂၄
ရှမ်းပြည်မြောက်ပိုင်း၊ မိုးမိတ်မြို့နယ်တွင် SSPP နှင့် TNLA တို့ တိုက်ပွဲဖြစ်ပွားခဲ့ကြောင်း နှစ်ဖက်စလုံးက ဇွန်လ ၂၃ ရက်တွင် သတင်းထုတ်ပြန်သည်။
SSPP ၏ ထုတ်ပြန်ချက်တွင် SSPP တပ်စခန်းနေရာကို TNLA ဘက်မှ စစ်ကြောင်း ၃ ကြောင်းဖြင့် ထိုးစစ်ဆင်တိုက်ခိုက်လာသည့်အတွက် အပြန်အလှန်ပစ်ခတ်မှုဖြစ်ပွားခဲ့သည် ဟု SSPP Infoက ထုတ်ပြန်သည်။
TNLA ဖက်ကမူ TNLA စစ်ကြောင်းထွက်ကင်းလှည့်နေစဉ် ရှမ်းပြည်တိုးတက်ရေးပါတီ-SSPP တပ်ဖွဲ့မှ ခြုံခိုပစ်ခတ်တိုက်ခိုက်ခဲ့သည် ဟု TNLA သတင်းနှင့်ပြန်ကြားရေးက ပြောသည်။
ဇွန်လ ၂၃ ရက်နေ့ နံနက်ပိုင်း ၁၀ နာရီခွဲချိန်တွင် မိုးမိတ်မြို့နယ်၊ မိုးဟောက်ကျေးရွာ တောင်ဘက်ရှိ တယပ်စုတောင်မှ SSPP ထိုင်ထားသည့်နေရာကို TNLA တပ်ဖွဲ့က စစ်ကြောင်း ၃ ကြောင်းဖြင့် ထိုးစစ်ဆင်တိုက်ခိုက်ခဲ့၍ SSPP ဘက်မှ ပြန်လည်ခုခံကာကွယ်ရပြီး၊ မိနစ်အနည်းငယ် တိုက်ပွဲဖြစ်ပွားခဲ့သည် ဟု SSPP ၏ ထုတ်ပြန်ချက်တွင် ပါရှိသည်။
TNLA ဖက်ကမူ SSPP တပ်ဖွဲ့သည် နံနက် ၁၀ နာရီ ၁၄ မိနစ်နှင့် ၁၁ နာရီ ၃၆ မိနစ် အချိန်များတွင် နှစ်ကြိမ် လက်နက်ငယ်များဖြင့် ခြုံခိုပစ်ခတ်ခဲ့သည်ဟု ဆိုသည်။
၎င်းအပြင် TNLA စစ်ကြောင်းတည်ရှိရာကိုလည်း မွန်းလွဲပိုင်း ၁၂ နာရီ ၃ မိနစ် အချိန်တွင် လက်နက်ကြီးတစ်လုံး ပစ်ခတ်တိုက်ခိုက်ခဲ့သည်ဟု ပြောသည်။
ယင်းတိုက်ပွဲမှာ TNLA တပ်ဖွဲ့မှ ပြန်လည်ဆုတ်ခွာသွားကာ နှစ်ဖက်အပစ်ရပ်စဲပြီး နေရာပြန်လည်ယူထားသည်ဟု SSPP က ဆိုသည်။
SSPP ရှေ့တန်းအရာရှိတစ်ဦးက အဆိုပါကိစ္စနှင့် ပါတ်သက်၍ “ဟုတ်တယ်၊ တိုက်ပွဲက မိုးဟောက်ရဲ့ တောင်ဘက်ရပ်မှာ ဖြစ်တယ်။ မိုးဟောက်ကနေ တောင်ဘက်ဆင်းသွားရင် ကျွန်တော်တို့ SSPP/SSA အဖွဲ့ထိုင်ထားတယ်။ PSLF/TNLA ဘက်က ဘော်ဒေ ကနေ လမ်းမကြီးနောက်ဘက်တစ်ကြောမှာ နေရာယူထားတယ်။ အခုချိန်ထိတော့ တပ်နှစ်ဖွဲ့တို့ ချည်းကပ် တင်းမာနေသေးတယ်” ပြောသည်ဟု ပါရှိသည်။
ယင်းသို့ မဖြစ်ပွားမီ ပြီးခဲ့သည့် ဇွန်လ၁၉ ရက်နေ့ တွင် TNLA အဖွဲ့ တပ်ရင်း အမှတ် ၂၊ အမှတ် ၃၊ အမှတ် ၉ တို့ အင်အား ၂၀၀ ကျော်ဝန်းကျင်ကို တုန်ဖုန်ကား ၅ စီး၊ ဖိုးဝီးကား ၃ စီးတို့ဖြင့် မိုင်းလုံ-မိုးကုတ်မှတဆင့် SSPP ရှိရာ မိုးဟောက်ကျေးရွာကို စစ်ကြောင်းအင်အားဖြည့်ဆည်းသွားခဲ့ပြီး၊ မိုးမိတ်မှလည်း မိုးဟောက်ကျေးရွာကို အင်အား ၈၀ ဝန်းကျင်မှ ထပ်မံဖြည့်ဆည်းကာ SSPP ရှိသည့် နေရာကို စစ်ရေးချည်းကပ်ထားခဲ့သည်ဟု ဆိုသည်။
လွန်ခဲ့သည့် ဇွန်လ ၁၅ ရက်နေ့ကလည်း ဟူးဆွန်ကျေးရွာကျောက်မဲမြို့နယ် ဟူးဆွန်စခန်းတွင် နှစ်ဖက် အပြန်အလှန် ထိတွေ့တိုက်ပွဲဖြစ်ပွားခဲ့ပြီး TNLAဘက်မှ သေဆုံး ၂ ဦး ဒဏ်ရာရ ၃ ဦး ရှိခဲ့ရာ ယခုတွင်လည်း နှစ်ဖက်အပြန်အလှန်စွပ်စွဲ၍ သတင်းထုတ်ပြန်ကြသော်လည်း ထိခိုက်မှုစာရင်းကိုမူ ဖော်ပြထားခြင်း မရှိပေ။
လက်ရှိတွင် တိုက်ပွဲငြိမ်သွားသော်လည်း နှစ်ဖက်စလုံးက အင်အားဖြည့်တင်းကာ စစ်ရေးတင်းမာနေကြောင်း သိရသည်။
ဖြစ်ပွားခဲ့သည့် နယ်မြေစစ်ရေးပဋိပက္ခများအား နှစ်ဖက် မည်သို့ဖြေရှင်းရန်ရှိမည်ကို သိရှိရန် မဲခေါင်အနေဖြင့် ဆက်သွယ်မေးမြန်းနေဆဲ ဖြစ်သည်။
SSPP/SSA နှင့် PSLF/TNLA တို့သည် FPNCC အဖွဲ့ဝင်များ ဖြစ်သည်။
မဟာ
#MeKongNews
#မိုးမိတ်မြို့နယ်
#SSPP
#TNLA
#တိုက်ပွဲဖြစ်
