မဲခေါင်၊ ဇွန် ၁၉
ဇွန် ၁၈ ရက်တွင် ကမ္ဘောဒီးယားလွှတ်တော်ဥက္ကဌ ဟွမ်ဆန်နှင့် နယ်စပ်အငြင်းပွားနယ်မြေ ပဋိပက္ခ အရေး ဆွေးနွေးပြောဆိုခဲ့သည့် အသံဖိုင် ပေါက်ကြားသွားမှုသည် အမျိုးသားလုံခြုံရေးအား ကြီးမားသော ခြိမ်းခြောက်မှုဖြစ်သည်ဟု ထိုင်းဝန်ကြီးချုပ် ပေထောင်တန် ဇွန် ၁၉ ရက်တွင် သတင်းစာရှင်းလင်းပွဲလုပ်ကာ ထုတ်ပြန်ခဲ့သည်။
ကမ္ဘောဒီးယားနိုင်ငံကို နှစ်ပေါင်းများစွာ အုပ်ချုပ်ခဲ့ပြီး သားဖြစ်သူကို ဝန်ကြီးချုပ် ရာထူးလွှဲပေးခဲ့သော ဟွမ်ဆန်သည် ပေထောင်တန်နှင့် ဆွေးနွေးမှုကို အသံဖမ်းထားကာ ကနဦး ၁၇ မိနစ် ၆ စက္ကန့်ကြာ အသံဖိုင်၊ ဆက်လက်ပြီး ၉မိနစ် ၅ စက္ကန်စာ အသံဖိုင်ကို လူမှုကွန်ရက်တွင် တင်ခဲ့ရာ ဟွမ်ဆန်ကို အန်ကယ် ဟုခေါ်ဆိုခြင်း၊ ထိုင်းဒုတိယစစ်တိုင်းမှူးစကား နားမထောင်ရန် ဟွမ်ဆန်မှ အကြံပေးခြင်း၊ ဟွမ်ဆန်အနေဖြင့် တစ်စုံတစ်ရာ တောင်းဆိုမှုရှိလာတိုင်း ဖြေရှင်းနိုင်စေရန် သူမအား ဦးစွာ အသိပေးပါရန် ပြောဆိုခြင်း၊ သူမကို ထိုင်းတွင် ကြီးမားသောတိုက်ခိုက်မှုများ လုပ်နေကြရာ ကမ္ဘောဒီးယားဝန်ကြီးချုပ်ဟုပင် စွပ်စွဲနေကြသဖြင့် သနားသက်ညှာရန် ပြောဆိုခြင်းများ ပါဝင်ခဲ့သည်။
ယင်းအသံဖိုင်အား ကမ္ဘောဒီးယားမီဒီယာနှင့် လူမှုကွန်ရက်များပေါ်တွင် တင်ခဲ့မှုသည် မည်သည့် နိုင်ငံ ခေါင်းဆောင်းများမှ မလုပ်သော လုပ်ရပ်ဖြစ်ကြောင်း၊ ဖုန်းဖြင့် အသံဖမ်းထားသည်ကို မသိခဲ့သည့်အတွက် ပြည်သူအားလုံးသို့တောင်းပန်ကြောင်း၊ ဟွမ်ဆန်၏ လုပ်ရပ်မှာ အမျိုးသားလုံခြုံရေးအား ကြီးမားသော ခြိမ်းခြောက်မှုဖြစ်စေကြောင်း၊ အစိုးရအဖွဲ့ နှင့် ထိုင်းစစ်တပ်ကြားတွင်လည်း ယခု ကိစ္စနှင့်ပတ်သက်ကာ ပြဿနာမရှိဘဲ ငြိမ်းချမ်းစွာ နယ်စပ်ပြဿနာဖြေရှင်းနိုင်ရေးသာ ဦးတည် ပြောဆိုခဲ့ခြင်းဖြစ်ကြောင်း၊ ဒုတိယစစ်တိုင်းမှူးနှင့်ပတ်သက်ပြီး ပြောဆိုခဲ့မှုမှာ ဆက်သွယ်မှု နည်းပညာသဘော ပြောဆိုမှုဖြစ်ကြောင်း ရှင်းလင်းပြောကြားခဲ့သည်။
သို့သော် သက်ဆင်ဆန့်ကျင့်ရေးသမားများက ပေထောင်တန်ကို ရာထူးမှ ဖယ်ရှားရန် ဆန္ဒပြတောင်းဆို မှုများရှိလာသလို အထက်လွှတ်တော် နိုင်ငံရေးကျင့်ဝတ်ကော်မတီကလည်း ဇွန် ၁၉ ရက်တွင် ပေထောင်တန်အား ဝန်ကြီးချုပ်ရာထူးမှ ဖယ်ရှားနိုင်ရေး ကွန်ဆာဗေးတစ် တရားရုံးနှင့် အဂတိတိုက်ဖျက်ရေးကော်မရှင်ထံ တင်သွင်းခဲ့ကြောင်း အတည်ပြုကြေညာသွားခဲ့သည်။
ကိုကလင်း
Ref: Khaosod
#MeKongNews
#ထိုင်းဝန်ကြီးချုပ်
#ကမ္ဘောဒီယား
#ဟွန်ဆန်
#အမျိုးသားလုံခြုံရေး
