မဲခေါင်၊ ဇွန် ၁၈
တရုတ်အာလူးများ မြန်မာဈေးကွက်အတွင်းသို့ ဈေးချိုချိုဖြင့် ဝင်ရောက်နေသဖြင့် တောင်သူများ ထိုက်သင့်သည့် ဈေးနှုန်း မရပဲ ဖြစ်နေကြောင်း ရှမ်းတောင်အခြေစိုက် တောင်သူတို့က ပြောကြားသည်။
တရုတ်အာလူးသည် ရှမ်းပြည်အရှေ့ပိုင်း၊ မိုင်းလားဒေသနှင့် ရှမ်းပြည်မြောက်ပိုင်း လမ်းကြောင်းတို့မှ တဆင့် မြန်မာနိုင်ငံအတွင်း ဝင်ရောက်လာနေခြင်းဖြစ်သည်။
“ဒေသအာလူးပေါ်တဲ့ အချိန်မှာ တရုတ်အာလူး ဝင်လာတော့ ဈေးက အတော်ထိုးကျသွားတယ်။ ဒီမှာ အာလူး အများဆုံး ထွက်တဲ့ အချိန်ကြမှ တရုတ်က ဈေးချိုချိုနဲ့ ဝင်လာတာ” ဟု အာလူးပွဲစားတစ်ဦးက ပြောဆိုသည်။
၂၀၂၅ ခုနှစ် မေလက ဒေသထွက် အာလူးတစ်ပိသာလျှင် ကျပ် ၂၈၀၀ သာ ရရှိခဲ့သည့်အတွက် မျိုးဝယ်စဉ်က တပိသာ ၈၀၀၀ ကျပ် ဝန်းကျင်နှင့် နှိုင်းလျှင် ထိုက်သင့်သည့် ဈေးနှုန်း မရရှိပဲ ဖြစ်နေကြောင်း အာလူးစိုက်ပျိုးသည့် တောင်သူတို့က ဆိုထားသည်။
ဇွန်လဆန်းပိုင်းတွင် တရုတ်အာလူးဝင်ရောက်လာမှုကြောင့် ကျပ် ၂၁၀၀ အထိ ဈေးကျဆင်းသွားခဲ့ကာ ယခုရက်ပိုင်းတွင် ကျပ် ၂၅၀၀ သို့ ပြန်လည်ရောက်ရှိလာနေသည် ဟု ပွဲစားတစ်ဦးက ဆိုသည်။
တရုတ်အာလူးကို ရှမ်းပြည်အရှေ့ပိုင်း မိုင်းလားဒေသမှ တဆင့် အစစ်အဆေးများသည့် ကျိုင်းတုံ စစ်ဆေးရေးဂိတ်၊ တာကောတံတား တို့ကို ဖြတ်ကျော်ကာ ရှမ်းတောင် အောင်ပန်းဈေးကွက်ကို ဝင်ရောက်ပြီး တစ်နိုင်ငံလုံးကို ဖြန့်ချိနေခြင်း ဖြစ်သည်။
တရုတ်အာလူးဈေးသည် နယ်စပ်မှ တဆင့် ခရီးဝေးဖြတ်ကျော်လာရသော်လည်း ပြည်တွင်းစိုက် အာလူးဈေးနှုန်းထက် အနည်းငယ်သာ ဈေးပိုပြီး အလုံးအနေအထားကသည်လည်း တစ်ဆိုဒ်၊ တစ်ရွယ်တည်း ဖြစ်ခြင်းကြောင့် ဈေးကွက်တွင် အဆွဲများကြောင်း ဈေးကွက်အတွင်းမှ သိရသည်။
စစ်ကောင်စီသည် တရားမဝင်ကုန်စည် စီးဆင်းမှုကို ဖမ်းဆီးအရေးယူနေသည်ဟု မကြာခဏ ထုတ်ပြန်ကြေညာသော်လည်း တောင်သူတို့ အကျိုးစီးပွားကို ထိခိုက်စေသည့် တရုတ်ထွက် ကြူကုတ် ကြက်သွန် နှင့် အာလူးတို့ ကို ဖမ်းဆီးအရေးယူခြင်း မရှိသည့်အပြင် ဈေးကွက်တွင် ပေါ်ပေါ်ထင်ထင် ရောင်းချနေကြဆဲ ဖြစ်သည်။
ဇွန်လ ၁၆ ရက်နေ့ ရန်ကုန်ဘုရင့်နောင်ပွဲရုံ အရောက် အာလူးဈေးနှုန်းမှာ S-2 တပိသာ ကျပ် ၂၈၀၀ ဝန်းကျင်၊ S-1 တပိသာ ၃၂၀၀ ဝန်းကျင်၊ Ok တပိသာ ကျပ် ၂၉၀၀ ဝန်းကျင် ရှိနေပြီး တရုတ်အာလူးမှာ တပိသာ ၃၃၀၀ ဝန်းကျင်တွင် ဈေးရှိနေသည် ဟု ဈေးကွက်ဖော်ပြချက်အရ သိရသည်။
ဖေသန်း
#MeKongNews
#ရှမ်းတောင်
#အာလူး
#တရုတ်အားလူး
#တရားမဝင်ကုန်စည်
