မဲခေါင်၊ ဇွန် ၁၅
ဇွန် ၁၄ ရက်ညတွင် အီရန်ဘက်မှ အစ္စရေးသို့ ဒုတိယည တိုက်ခိုက်မှုအဖြစ် ဒုံးကျည် ၁၀၀ ဖြင့် တစ်ကြိမ်၊ နောက်ထပ် ဒုံးကျည် ၅၀ ဖြင့်တစ်ကြိမ် ပစ်ခတ်တိုက်ခိုက်ခဲ့ကာ အစ္စရေးဘက်မှလည်း အီရန် ဆီသိုလှောင်ရုံများကို ပစ်မှတ်ထား လက်တုံ့ပြန်ခဲ့သည်။
အစ္စရေး၏ ဟိုင်ဖာနှင့် တဲလ်အဗစ်မြို့ လူနေထူထပ်ရာမြို့ပြများကို အီရန်ဘက်မှ ပစ်မှတ်ထားပြီး True Promise 3 စစ်ဆင်ရေးဟု နာမည်ပေးထားသည့် စစ်ဆင်ရေးအဖြစ် ပစ်ခတ်တိုက်ခိုက်ရာ ဂျောဒန်နိုင်ငံ အမ်မန်မြို့တော်မှပင် ပေါက်ကွဲသံများကို အတိုင်းသားကြားရကြောင်း၊ လူပေါင်းများစွာ ဒဏ်ရာရသလို အသက် ၂၀ ဝန်းကျင် အမျိုးသမီးတစ်ဦးနှင့် တခြားအရပ်သား ၂ ဦးလည်း ဂါလိလီအနောက်ပိုင်း၌ သေဆုံးခဲ့ရကြောင်း သိရှိရသည်။
အစ္စရေးစစ်တပ်သည် အီရန်ဒုံးကျည်များကို လေကြောင်းရန်ကာကွယ်ရေးစနစ်များမှ ဖျက်ချရန် ကြိုးစားနေသည်နှင့်တစ်ပြိုင်နက် အီရန်နိုင်ငံ မြို့တော် တီဟီရန်ရှိ အီရန် ကာကွယ်ရေးဝန်ကြီးဌာနချုပ်၊ နျူကလီးယားဓာတ်ခွဲခန်းများနှင့် ရေနံသိုလှောင်ကန်များအား ပစ်မှတ်ထားကာ ပြန်လည်တိုက်ခိုက်ခဲ့ရာတွင် Shahran ရေနံသိုလှောင်ရုံကြီး မီးလောင်ပေါက်ကွဲသွားပြီး အစ္စရေးကာကွယ်ရေးဝန်ကြီး ကတ်ဇ်က လူမှုကွန်ရက် X ပေါ်တွင် တီဟီရန် လောင်မီးကျနေပြီဟုပါ ပို့စ်ရေးတင်သွားခဲ့သည်။
ဇွန် ၁၃ ရက်ကတည်းက အီရန်သည် နျူကလီးယားဗုံး တီထွင်ကာ အဆင့်မြှင့်တင်နေပြီး မိမိတို့အား တိုက်ခိုက်ရန်ရှိနေသည်ဟု အစ္စရေးဘက်မှ ထုတ်ပြန်ကာ အီရန်နိုင်ငံအတွင်း ဖိုက်တာဂျက်လေယာဉ် အစီး ၂၀၀ သုံးပြီး ပစ်မှတ် ၁၀၀ ကို ပစ်ခတ်ခဲ့ရာ အီရန် ဗိုလ်ချုပ်များနှင့် နျူကလီးယားသိပ္ပံပညာရှင်များ သေဆုံးရာမှ အီရန်ဘက်မှ ဒုံးကျည်များ ဒရုန်းများဖြင့် ပြန်လည်ပစ်ခတ်ခဲ့ရာမှ အလုံးစုံ စစ်ပွဲအသွင် ရောက်ရှိသွားခြင်း ဖြစ်သည်။
အစ္စရေးကာကွယ်ရေးဝန်ကြီး ကတ်ဇ်က အီရန်၏ တိုက်ခိုက်မှုသည် ပြည်သူများနေထိုင်ရာကို ဦးတည်နေသဖြင့် သတ်မှတ်စည်းမျဉ်းကို ကျော်သွားပြီဖြစ်သောကြောင့် အီရန်ခေါင်းဆောင် ခါမီနီ ယခုလို ဆက်လက်တိုက်ခိုက်နေပါလျှင် တီဟီရန်မြို့ကြီး လောင်ကျွမ်းသွားစေရမည်ဟု သတိပေးထုတ်ပြန်ခဲ့ခြင်း ဖြစ်သည်။
ခါမီနီကလည်း အစ္စရေးပျက်သုဉ်းရမည်ဖြစ်ကာ အကြီးမားဆုံး ပျက်စီးဆုံးရှုံးမှုများ၊ ကြမ္မာဆိုးများကြုံရစေမည်ဟု ကျိန်ဆိုပြောဆိုထားသည်။
ကိုကလင်း
Ref: Thesun
#MeKongNews
#အစ္စရေး
#အီရန်
#ဆီသိုလှောင်ရုံ
#နျူကလီးယား
