မဲခေါင်၊ ဇွန် ၁၃
အောင်ပန်းမြို့ပေါ်ရှိ ရပ်ကွက်အချို့ ယနေ့ ဇွန်လ ၁၃ ရက်နေ့မှာ တောင်ကျရေနှင့်မိုးရွာသွန်းမှုကြောင့် ပြည်ထောင်စုလမ်းမကြီးပေါ်ရေကြီးရေလျှံမှု ဖြစ်ပေါ်နေသည်ဟု ဒေသခံများထံက သိရသည်။
ဇွန်လ၉ရက်က စရွာသည့်မိုးကြောင့် အောင်ပန်းမြို့ပေါ် ရပ်ကွက် ၃ နှင့် ရပ်ကွက် ၄ ၊ ညောင်ပင်ထောင်ရပ်ကွက်များအတွင်းသို့ ယနေ့ ဇွန်လ ၁၃ ရက် ညနေ ၅ နာရီမှစကာ ရေများအလုံးအရင်းနှင့် ဝင်လာနေကြောင်း ဒေသခံများထံက သိရသည်။
“ပင်းတယဘက်အထွက်နဲ့ မြင်းကပ်ဖက်၊ လွယ်မောဆည်ဘက်အောက်ဖက်က ရေမဲချောင်းက ရေကျလာလို့ ရပ်ကွက် ၃ နဲ့ ၄ က အိမ် ၁၀၀ လောက် ရေဝင်နေပြီ၊ ရေက ၂ ပေ အထက် နက်လာနေတယ်။ မိုးကလည်း မတိတ်ဘူး၊ ဆိုင်ကယ်တွေ သွားမရတော့ဘူး။ ကားလမ်းလည်း ဓာတ်ဆီကားသေးဆို မရတော့ဘူး။ လူတွေလည်း ရေလွတ်ရာ အားချင်းရွှေ့နေကြပြီ၊ ရေက ဆက်တက်လာနေတယ်” ဟု ညောင်ပင်ထောင်ရပ်ကွက်နေသူတစ်ဦးက မဲခေါင်ကို ည ၇ နာရီထိုးခါနီးတွင် ပြောသည်။
ရေလွတ်သည်မှာ ညောင်ပင်ထောင်ရပ်ကွက်အမြင့်ပိုင်းနှင့် မင်္ဂလာ၊ မိုးကောင်းရပ်ကွက်များသာ ဖြစ်သည်။
မင်္ဂလာကန်ကျိုးပေါက်ပါက Emeral ဆေးရုံမြုပ်နိုင်ပြီး အောင်ချမ်းသာဘုန်းကြီးကျောင်း အနီးရှိ ဟိုတယ်အောင်ပန်းဘက် စီးသွားသည့် ရေမြောင်းက ကလော-အောင်ပန်းကားလမ်းကို ရေဖြတ်ကျော်နေကြောင်း သိရသည်။
လက်ရှိ PNO ရုံးရှေ့နှင့် ဆန္ဒမွန်ဆေးရုံ တစ်လျှောက်၊ နောင်ရိုးကားဂိတ်၊ Mytel ရုံးတစ်ဝိုက်၊မနန်းယာ လက်ဖက်ခြောက်တိုက်နားနှင့် Future star ကျောင်းနားတဝိုက် ရေမြုပ်နိုင်သည့် အခြေအနေရှိနေကြောင်း သိရသည်။
ပြီးခဲ့သည့် ၂၀၂၄ ခုနှစ်၊ စက်တင်ဘာလအတွင်း တောင်ကြီး၊ အင်းလေး၊ ကလော၊ အောင်ပန်း၊ ညောင်ရွှေ မြို့များတွင် ရာဂီမုန်တိုင်းကြောင့် ရေကြီးရေလျှံမှု ခံစားခဲ့ရပြီး နေအိမ် ပျက်စီး ဆုံးရှုံးမှုနှင့် လူသေဆုံးမှုများ ဖြစ်သည်အထိ ရှိခဲ့ကြသည်။
မဟာ
#MeKongNews
#အောင်ပန်း
#ရေကြီး
#မင်္ဂလာကန်
#တောင်ကျချောင်းရေ
