မဲခေါင်၊ ဇွန် ၈
MNDAAနှင့် SSPP စစ်ရေးတင်းမာနေသည့် ရှမ်းပြည်မြောက်ပိုင်း၊ ဟန်နားကျေးရွာအုပ်စု ဥက္ကဌ ဦးဆန်ကြာကို MNDAA က ဖမ်းဆီးခေါ်ဆောင်သွားရာမှ ဇွန်လ ၇ရက် ညပိုင်းတွင် ပြန်လွှတ်ပေးလိုက်ကြောင်း ဒေသခံများထံက သိရသည်။
MNDAA က ဟန်နားကျေးရွာအုပ်စု၏ အိမ်ထောင်စု စာရင်းများရလိုသည့် ရည်ရွယ်ချက်ဖြင့် ဖမ်းဆီးခေါ်ဆောင်သွားခြင်းဖြစ်ရာ ကျေးရွာကော်မတီမှ လူစုပြီး စာရင်းများကိုယူဆောင်ကာ ဖမ်းဆီးထာသည့် စဉ့်အင်နားလန်းသို့ သွားရောက်ပေးအပ်သဖြင့် ဇွန်လ၇ရက်ညနေက ပြန်လည်လွှတ်ပေးခြင်း ဖြစ်ကြောင်းသိရသည်။
“အဲဒီစာရင်းတွေ မရရင်မလွှတ်ဘူးဆိုတော့လည်း သူတို့လိုချင်တာ သွားပေးရတာပေါ့” ဟု ဟန်နားရွာခံတစ်ဦးက ပြောသည်။
ဟန်နားအုပ်စုတွင် လူဦးရေ၈၀၀ကျော်ရှိပြီး ယင်းစာရင်းများဖြင့် အုပ်ချုပ်ရေးအဆက်ဆက်မှ လူသစ်ခေါ်ခြင်း၊ ဆက်ကြေးကောက်ခြင်း၊ အစည်း အဝေးခေါ်ခြင်းများ ပြုလုပ်ခဲ့ကြသဖြင့် ယခုတွင်လည်း ယင်းသို့လုပ်လာနိုင်ကြောင်း ဒေသခံတစ်ဦးက ပြောသည်။
“ရှမ်းတပ်တွေ၊ ဗမာအုပ်ချုပ်ရေးတွေ ဒီစာရင်းတွေ အပေါ်မှာပဲ စီမံခန့်ခွဲတာလေ။ လူထုမှာတော့ မင်းများရင် ရွာကြေတာပဲလေ။ ဟိုကတစ်မျိုး၊ ဒီကတမျိုး ကျွဲတွေကြားက မြေစာပင်တွေပေါ့” ဟု ၎င်းက ပြောသည်။
MNDAA သည် ယခုဇွန်လ ပထမပတ်အတွင်း သီပေါမြို့နယ်၊ မိုင်းလင်းကျေးရွာအုပ်စုရှိ မန်မိုင်မိုက်နိမ်ရွာက ဥက္ကဌကို ယခုလိုပင် အိမ်ထောင်စုစာရင်း အကြောင်းပြ ဖမ်းဆီးသွားခဲ့ပြီး ရွာကော်မတီများက အိမ်ထောင်စုစာရင်းသွားပို့ပေးမှသာ ဇွန်လ ၆ ရက်က ပြန်လွှတ်ပေးခဲ့ကြောင်း သိရသည်။
လက်ရှိ MNDAA နှင့် SSPP တို့ စစ်ရေးပဋိပက္ခအခြေအနေမှာ နှစ်ဘက်ဆိုင်ထားနေသဖြင့် နားလိုင်ကျေးရွာ၊ ဟန်နားကျေးရွာ၊ ဟိန်းလွမ့်ကျေးရွာ၊ ကောင်းကော်ကျေးရွာ စသည့်ရွာလူထုများ နေရပ်သို့ ခေတ္တခဏ ပြန်လည်ဝင်ရောက်လာကြသော်လည်း တိုက်ပွဲများ အချိန်မရွေးပြန်လည်ဖြစ်ပွားလာနိုင်သဖြင့် စစ်ရှောင်နိုင်ရန်အဆင်သင့် နေထိုင်နေကြရကြောင်း သိရသည်။
MNDAA က နမ္မကျောက်မီးသွေးနယ်မြေသို့ဝင်ရောက်လာမှုနှင့် SSPPအား ဟန်နား၊ စိန်ကျော့ နယ် မြေများမှ ထွက်သွားရန်၊ ပြည်ထောင်စုလမ်းမအပေါ် ဆက်ကြေးမကောက်ရန် ဖိအားပေးနေသဖြင့် စစ်ရေးပဋိပက္ခများဖြစ်ပွားခဲ့ရာတွင် MNDAA ဖက်မှ တပ်ဖွဲ့ဝင် ၁၀ဦး သေဆုံးခဲ့ရပြီးဖြစ်သည်။
မဟာ
#MeKongNews
#ဟန်နားကျေးရွာ
#ဦးဆန်ကြာ
#MNDAA
#အိမ်ထောင်စုစာရင်း
