မဲခေါင်၊ ဇွန် ၈
စစ်ကောင်စီနှင့် ပူးတွဲတိုက်ပွဲဝင်နေသည့် PNO ပြည်သူ့စစ်အဖွဲ့ဝင်တစ်ဦးက တောင်ကြီးမြို့အဝင် မြေပုံဂိတ်အနီးတွင် ဆိုင်ကယ်စီးပြည်သူ၂ဦးအား မဆင်မခြင်မောင်းသည်ဟုဆိုကာ သေနတ်ဖြင့်ချိန်ကာ ခြိမ်းခြောက်ပြီး ဆိုင်ကယ်ကိုလည်း ကားဖြင့်နောက်ပြန်တိုက်ပြေးသသွားကြောင်း သိရသည်။
ဇွန်လ ၆ရက် ညနေ ၆နာရီခန့်တွင် အေးသာယာ – တောင်ကြီးအတက်လမ်း တိရိစ္ဆာန်ရုံအတိုင်းတက်လာသော ဆိုင်ကယ်နှင့် မြေပုံအဝိုင်းပတ်အတိုင်းကွေ့လာသည့် Vigo အနက်ရောင်ကားတစ်စီးတို့ ပွတ်တိုက်မိမလိုဖြစ်ပြီးနောက် PNO ပြည်သူ့စစ်အဖွဲ့ဝင်က ကားပေါ်မှဆင်းလာကာ ပစ္စတိုသေနတ်ကို မောင်းတင်ပြီးချိန်ရွယ်ကာ ခြိမ်းခြောက်စကားများပြောခဲ့ကြောင်း သိရသည်။
ထို့နောက် ဆိုင်ကယ်စီးလာသူ ၂ယောက်ထဲမှ အမျိုးသားဖြစ်သူကို လက်သီးတစ်ချက်ထိုးခဲ့သည်ဟု သိရသည်။
“စစ်တပ်က သူတို့ကိုပစ်ခွင့်ပေးထားတာတဲ့။ ဒါသူတို့ပြည်နယ်တဲ့။ သူကားနဲ့ ဆိုင်ကယ်တိုက်မိမလိုဖြစ်လိုတဲ့။ သူ့ကားကို လုံး၀မထိပါဘူး။ အဲ့တာ သက်သက်မဲ့လက်နက်ထုတ် ခြိမ်းခြောက်တယ်။ ပြောသေးတယ် အချိန်မရွေး ပစ်ပိုင်ခွင့်ရှိတယ်တဲ့” ဟု အဖြစ်အပျက်ကို တိရိစ္ဆာန်ရုံအနီးမှ မြင်ခဲ့သူတစ်ဦးကဆိုသည်။
ယင်းနောက် PNO အဖွဲ့ဝင်က ကားပေါ်ပြန်တက်သွားပြီး ကားကိုနောက်ပြန်ဆုတ်ကာ ဆိုင်ကယ်ကိုဝင်တိုက်ခဲ့သဖြင့် ဆိုင်ကယ်ကာဗာများကွဲအက်ပျက်စီးခဲ့ကြောင်း သိရသည်။ ဆိုင်ကယ်ပေါ်ပါသူ ၂ ဦးမှာမူ အချိန်မီရှောင်နိုင်ခဲ့သဖြင့် အထိအခိုက်မရှိကြောင်း သိရသည်။
ထိုသို့ ခြိမ်းခြောက်ခဲ့သော PNOအဖွဲ့ဝင်သည် တစ်ဦးတည်း ကားမောင်းလာခြင်းဖြစ်ပြီး ထိုအဖြစ်အပျက်အား Eastern Park(တိရိစ္ဆာန်ရုံ)အတွင်းမှ လူတော်တော်များများ မြင်တွေ့ခဲ့ကြကြောင်းသိရသည်။
“ကျွန်မ အဲဒီဆိုင်ကယ်စီးဦးမှာ၊ သူအငြှိုးထားပြီးလိုက်ရန်ရှာမှာ ကြောက်ရသေးတယ်။ ကျွန်မကပြည်သူဖြစ်နေတော့ ကြောက်မိတာအမှန်ပဲ၊ လက်နက်အားကိုး အနိုင်ကျင့်ခံရဦးမှာ” ဟု ခြိမ်းခြောက်ခံရသူထဲမှ အမျိုးသမီးဖြစ်သူက ဆိုသည်။
PNO/PNA များသည် တောင်ကြီးမြို့ပေါ်တွင် လက်နက်အသုံးချ အာဏာပြမှုများ မကြာခဏပြုလုပ်လာကြသည်။
ပြီးခဲ့သည့် လပိုင်းခန့်ကလည်း တောင်ကြီးမြို့၊ ဂုဏ်ထူးလမ်းထိပ်၊ မြစံပယ်ခန်းမအနီးတွင် PNO အဖွဲ့ဝင်တစ်ဦးက အကြောင်းရင်းမရှိ လက်ပစ်ဗုံးပစ်ခွဲမည်ဟုဆိုကာ ရမ်းကားခဲ့သေးကြောင်းသိရသည်။
နန်းမွန်း
#MeKongNews
#PNO
#PNA
#ကားတိုက်
#ခြိမ်းခြောက်
#သေနတ်
#တောင်ကြီး
#ပြည်သူ့စစ်
