မဲခေါင်၊ ဇွန် ၆
ထိုးစစ်ရပ်ထားသည်ဟု စစ်ကောင်စီဘက်မှ ထုတ်ပြန်ထားသော်လည်း နောင်ချိုမြို့မှ ၇မိုင်အကွာ ကံကြီးရွာမှာ ယနေ့ ဇွန်၆ရက်မှာ စစ်ကောင်စီစစ်ကြောင်းနဲ့ TNLAတပ်များ လက်ရှိနံနက်ပိုင်းအထိ တိုက်ပွဲများပြင်းထန်နေကြောင်း သတင်းအရင်းအမြစ်များထံမှ သိရသည်။
စစ်ကောင်စီ၏ မဲပုတ်ဘက်မှာလာသည့် စစ်ကြောင်းမှာ နောင်ချိုကြီး၊ တိမ်ပင်လယ်အထိ ရောက်နေသလို ပြင်ဦးလွင်ဘက်မှ စစ်ကား ၁၃စီးပါ စစ်ယာဥ်တန်းဖြင့်ချီလာသည့် စစ်ကြောင်းမှာ အုမ္မသီးဘက်မှ မြေပြင်တိုက်ခိုက်မှု ပြုလုပ်လာနိုင်ကြောင်း သိရသည်။
အကယ်၍ ကံကြီးကို စစ်ကောင်စီကျော်ဖြတ်နိုင်ပါက နောင်ဩနှင့် မျက်ခြင်းနုသာ ကျန်ရှိတော့မည်ဖြစ်ပြီး နောင်ချိုမှာ ဟင်းလင်းပွင့်နေပြီ ဖြစ်ပြီဟု CDM အရာရှိဇင်ယော်က သုံးသပ်ပြောဆိုသည်။
လက်ရှိ နောင်ချို တောင်ခမ်း တိုက်ပွဲများတွင် စစ်ကောင်စီသည် လတ်တလော လေကြောင်းပစ်ကူထက် လက်နက်ကြီးတကမ်း၊ ဒရုန်းများနှင့် တိုက်ခိုက်လာနေခြင်းဖြစ်ကြောင်း ဒေသခံများက ပြောသည်။
“တိုက်ပွဲက လက်တကမ်းလို့ပြောရပြီ။ အမြောက်တစ်ကမ်းပေါ့။ မြို့ထဲလက်နက်ကြီးကျလို့ ၄ယောက်ထိပြီ။ အတော်များများမြို့ပေါ်က ပြေးကုန်ကြပြီ။ ကျောက်မဲဘက်အများဆုံးပြေးကြတယ်။ တိုက်ပွဲက ရက်ပိုင်းအတွင်းမြို့ ထဲရောက်လာနိုင်လို့ ကြိုတင်ရှောင်နိုင်ဖို့ သတိထားနေထိုင်ကြဖို့ အချင်းချင်းသတိပေး နေကြတယ်”ဟု ဒေသခံတစ်ဦးက ပြောသည်။
ဇွန်လ၄ရက်နေ့လယ်ပိုင်းတွင်လည်း စစ်ကောင်စီက ရွှေမုဌောရွာမှ နောင်ချိုမြို့ထဲသို့ လက်နက်ကြီး ပစ်ခတ်တိုက်ခိုက်သည့်အတွက် နောင်ချိုမြို့၊ စျေးရပ်ကွက်ရှိ အမျိုးသမီး ၂ ဦးနှင့် အမျိုးသား ၂ ဦး ထိခိုက်ဒဏ်ရာရခဲ့ကြောင်း သိရသည်။
ဒဏ်ရာရသည့် ဒေသခံများမှာ ဦးမြင့်အောင်၊ ဒေါ်ထွေး၊ ဦးကျော်ဝင်းနဲ့ ဒေါ်မူမူအောင် တို့ဖြစ်ကြောင်း သိရသည်။
၎င်းအပြင် နေအိမ် ၂လုံးနှင့် ကမ္ဘောဇကျောင်းတိုက် ဘုန်းကြီးကျောင်း တစ်ကျောင်းတို့လည်း စစ်ကောင်စီတပ်မှ ပစ်ခတ်လိုက်သော လက်နက်ကြီး ထိမှန် ပျက်စီးခဲ့သည်ဟု TNLA က ယနေ့ဇွန် ၆ ရက်တွင် ထုတ်ပြန်သည်။
နောင်ချိုမြို့အနီးကို ရောက်ရှိလာသည့် စစ်ကောင်စီစစ်ကြောင်းသည် TNLA တပ်စခန်းကို ယမန်နေ့ ဇွန်လ ၅ရက်ကတည်းက ထိုးစစ်ဆင်တိုက်ခိုက်နေပြီး ယနေ့ ဇွန်လ ၆ ရက်တွင်လည်း ကံကြီးရွာထဲ တိုက်ပွဲပြင်းထန်နေကာ ကံကြီး၊ ရွှေမုဌော၊ ရှောက်ခြုံနဲ့ နောင်လိတ်စသည့်ကျေးရွာများမှ ဒေသခံများ ထွက်ပြေးတိမ်းရှောင်နေရကြောင်း သိရသည်။
စစ်ကောင်စီက ခုဇွန်လကုန်အထိ အပစ်ရပ်မည်ဟု ကြေညာထားသော်လည်း ယခုတိုက်ပွဲတွင် ထိုးစစ်ဆင်နေခြင်းဖြစ်သည်။
တရုတ်နိုင်ငံရဲ့ ကြားဝင်မှုအရ စစ်ကောင်စီနှင့် TNLA တို့အကြား ဩဂုတ်လမှာ ထပ်မံဆွေးနွေးရန် ရှိနေသည်။
မဟာ
#MeKongNews
#TNLA
#နောင်ချို
#ကံကြီးရွာ
#စစ်ကောင်စီ
#တိုက်ပွဲပြင်းထန်
