မဲခေါင်၊ ဇွန် ၄
တောင်ကိုရီးယားနိုင်ငံတွင် နိုင်ငံရေးအရှုပ်ထွေးဆုံးကာလ ကြုံခဲ့ရပြီးနောက် နောက်ဆုံးတွင် ဆင်းရဲသားဘ၀မှ ဆင်းသက်ကြီးပြင်းလာသူ လက်ဝဲယိမ်း ဒီမိုကရက်တစ်ပါတီ ကိုယ်စားလှယ် လီဂျေမြောင်သည် သမ္မတရွေးကောက်ပွဲ၌ သောင်ပြိုကမ်းပြို အနိုင်ရရှိကာ တောင်ကိုရီးယား သမ္မတသစ်ဖြစ်လာခဲ့ပြီဖြစ်သည်။
အသက် ၆၀ ရှိပြီဖြစ်သော လီဂျေမြောင်သည် မာရှယ်လော ဥပဒေထုတ်ကာ လွှတ်တော်ကို စစ်တပ်ဝင်စီးရန် ယခင် သမ္မတ ယွန်းဆက်ယိုး အမိန့်ပေးစဉ်တွင် လွှတ်တော်တွင်းမှ တံခါးပိတ်ပြီး မာရှယ်လော စစ်အုပ်ချုပ်ရေးအမိန့်ကို နာရီပိုင်းအတွင်း ပြန်လည် ပယ်ဖျက်နိုင်စေရန် ဦးဆောင်ခဲ့သူလည်းဖြစ်သလို ယွန်းဆက်ယိုနေရာတွင် ယာယီသမ္မတအဖြစ်လည်း လပိုင်းကြာ တာဝန်ယူခဲ့သူဖြစ်သည်။
လီဂျေမြောင်သည် ၂၀၂၂ ခုနှစ်ရွေးကောက်ပွဲတုန်းကလည်း ယွန်းဆက်ယိုကို မဲအနည်းငယ်မျှ ကွာခြားပြီး ရှုံးနိမ့်ခဲ့ကာ ရွေးကောက်ပွဲ မသမာမှု၊ အိမ်ခြံမြေလုပ်ငန်းနှင့်ပတ်သက်သည့် အကျင့်ပျက်ခြစားမှု ဆိုသော စွဲချက်များ တင်ခံခဲ့ရသူလည်းဖြစ်သည်။
မေလဆန်းပိုင်းက ဆိုးလ်တရားရုံးချုပ်သည် ရွေးကောက်ပွဲဆိုင်ရာ စည်းမျဉ်းချိုးဖောက်သည်ဆိုသော စွဲချက်အတွက် ပလှပ်ပေးလိုက်ပြီး ယခု ငွေကြေးဆိုင်ရာ အကျင့်ပျက်ခြစားမှုစွဲချက်မှာ သမ္မတ ဖြစ်လာသောကြောင့် ၂၀၃၀ ပြည့်နှစ် သမ္မတ သက်တမ်း ကုန်မှသာ တစ်ဖန် ပြန်လည် အသက်ဝင်လာနိုင်တော့မည် ဖြစ်သည်။
၂၀၂၄ ခုနှစ်က အမျိုးသားတစ်ဦးက လီဂျေမြောင် လည်ပင်းကို ဓားနဲ့ ထိုးမှု ဖြစ်ပွားခဲ့သေးပြီး သမ္မတ ဖြစ်လာမည်စိုးသောကြောင့် သတ်ရန် ကြံစည်ခဲ့သည်ဟု ထွက်ဆိုခဲ့သည်။
လီဂျေမြောင်သည် ဆင်းရဲသော မိသားစုမှ ပေါက်ဖွားလာသူဖြစ်ကာ ငယ်စဉ်က ကျောင်းထွက်ပြီး မိသားစု စားဝတ်နေရေးအတွက် အလုပ်စုံ လုပ်ခဲ့ရာမှ စက်ရုံတွင် မတော်တဆမှုကြောင့် တံတောင်ဆစ်လွဲသည့် ဒဏ်ရာလည်း ရဖူးသူဖြစ်သည်။
နောက်ပိုင်းမှ ဥပဒေဘာသာရပ် တက္ကသိုလ်သို့ တက်ရောက်ရန် စကော်လာရရှိပြီး ရှေ့နေတစ်ဦးဖြစ်လာကာ အရေးပါသော မြို့တော်ဝန် ရာထူးအား ၈ နှစ်ကြာ ထမ်းဆောင်ပြီးနောက် နိုင်ငံရေးနယ်ပယ်တွင် မရှိဆင်းရဲသားကျောမွဲများအတွက် ဦးစားပေး အခွင့်အရေးများ တောင်းဆိုခြင်းကြောင့် ပြည်သူအကြိုက်တွေ့လာပြီး ယခုလို မဲအနိုင်ရကာ သမ္မတသစ်ဖြစ်လာခြင်း ဖြစ်သည်။
ကိုကလင်း
Ref:Bangkokpost
#MeKongNews
#တောင်ကိုရီးယား
#သမ္မတလီဂျေမြောင်
#စစ်အုပ်ချုပ်ရေး
#လက်ဝဲယိမ်းဒီမိုကရက်တစ်ပါတီ
