မဲခေါင်၊ ဇွန် ၄
ရှမ်းပြည်တောင်ပိုင်းနှင့် ရှမ်း – ကရင်နီပြည်နယ် နယ်စပ်ဖြစ်သည့် ညောင်ရွှေ၊ ပင်လောင်းနှင့် ဖယ်ခုံမြို့နယ်အတွင်းက တိုက်ပွဲများကြားက အသက်ဘေးကြောင့် ထွက်ပြေးကြရသူ စစ်ရှောင် ၃၀၀၀ ကျော် အကူအညီမဲ့နေပြီး စားဝတ်နေရေးအတွက် အကူအညီများလိုအပ်နေကြောင်း ဒေသခံများထံက သိရသည်။
ညောင်ရွှေမြို့နယ် ဟိုပန်၊ ကုန်းသာ၊ တောင်ပို့ကွဲဘုရားတောင်၊ ရေပူစကျေးရွာများမှ ရွာလူထု ၁၀၀၀ ကျော် ရွာလုံးကျွတ်စစ်ရှောင်နေရကာ ပင်လောင်းမြို့နယ်၊ ဆောင်းပြောင်းရွာအပါအဝင် ရွာလူထု ၁၀၀၀ ကျော်လည်း စစ်ရှောင်နေရကြောင်း၊ ဖယ်ခုံအင်း အရှေ့ဘက်ကမ်းရွာများတွင်လည်း စစ်ရှောင်များအတွက် အကူအညီများ လိုအပ်နေကြောင်း ဒေသခံများထံမှ သိရသည်။
“အိမ်တွေက မီးရှို့ခံရ၊ စိုက်ကွင်းတွေကသွားမရ၊ ငါးရှာဖားရှာမရ၊ စားစရာကမရှိ၊ ရာသီဥတုကပြင်းနဲ့ ဒုက္ခရောက်ကြတာ အလွန်ပါ” ဟု တောင်ပို့ကွဲ ရွာသူမကြီးတစ်ဦးက မဲခေါင်ကို ပြောသည်။
စစ်ဘေးရှောင်များအနေဖြင့် လက်ရှိအခြေအနေတွင် ဆန်၊ ဆီကဲ့သို့ အခြေခံစားသောက်ကုန်မှအစ အမျိုးသမီးတစ်ကိုယ်ရေသုံးပစ္စည်းများ၊ ကလေးသူငယ်များ၊ သက်ကြီးရွယ်အိုများနှင့် ရောဂါသည်များအတွက် ဆေးဝါးများ၊ စားရေရိက္ခါ လူသုံးကုန်များအစစအရာရာ လိုအပ်လျက်ရှိသည်ဟု စစ်ဘေးရှောင်များထံမှ သိရသည်။
အင်းလေးဒေသလူ့အခွင့်အရေး အဖွဲ့၏ ယမန်နေ့ ဇွန် ၃ ရက်က ထုတ်ပြန်ချက်တွင် ပြီးခဲ့သည့်ဧပြီလနှင့် မေလအတွင်း ရှမ်းပြည်တောင်ပိုင်း၊ အင်းလေးဒေသ၊ ညောင်ရွှေမြို့နယ်၊ ပင်လောင်းမြို့နယ်အတွင်းရှိ ကျေးရွာများသို့ စစ်ကောင်စီတပ်နှင့် PNA/PNO ပြည်သူ့စစ်တို့က လက်နက်ကြီး၊ လေကြောင်း၊ ဒရုန်းပစ်ခတ်မှု အရေအတွက်များနှင့် အရပ်သားနေအိမ် အဆောက်အအုံပျက်စီး၊ မီးလောင်မှုများ စုစုပေါင်းအရေအတွက်မှာ လက်နက်ကြီး ၇၁ကြိမ်၊ ဒရုန်း ၄၆ ကြိမ်၊ လေကြောင်းတိုက်ခိုက်မှု ၂ ကြိမ်၊ နေအိမ် မီးလောင် ၃၂ လုံးနှင့် အထက်၊ နေအိမ်ထိခိုက်ပျက်စီး ၁၁ လုံး၊ ဘာသာရေးအဆောက်အအုံ၊ ခန်းမဆောင် ၂ ခု၊ ရွာသား သေဆုံးမှု ကျားတစ်ဦးတို့ဖြစ်ကြောင်း ပါရှိသည်။
လေကြောင်းတိုက်ခိုက်မှုများတွင် ပေါင် ၅၀၀ ဗုံး လေးလုံး နှင့် အထက်ကြဲချခြင်းများရှိခဲ့သလို ပြည်သူနေအိမ်များကိုလည်း မီးရှို့ဖျက် ဆီးခဲ့ပြီး စန့်စွဲရွာသား (ရှမ်းလူမျိုး) အသက် ၅၀ ရှိ ဦးစိန်ကိုလည်း စစ်ကောင်စီတပ်နှင့် PNA ပြည်သူ့စစ်တို့က ပစ်ခတ်သတ်ဖြတ်ခဲ့သည်ဟု ဆိုသည်။
ထို့ပြင် စစ်ကောင်စီနှင့် တော်လှန်ရေးတပ်ဖွဲ့များ တိုက်ပွဲပြင်းထန်ခဲ့သည့် ဆောင်းပြောင်းတစ်ရွာလုံး မီးလောင်ပျက်စီးခဲ့ရသလို ရေပူတိုက်ပွဲအတွင်း လူနေအိမ် ၄၀ ကျော် စစ်ကောင်စီဘက်က မီးရှို့ခံခဲ့ရကြောင်း သိရသည်။
ကျေးရွာများတွင် တော်လှန်ရေးတပ်ဖွဲ့များ နားခိုကြသည်ဆိုပြီး စစ်ကောင်စီနှင့် PNO ပြည်သူ့စစ်က ရွာများကို မီးရှို့ ပြီး တော်လှန်ရေးတပ်များက မီးရှို့သည်ဟု သတင်းမှားများဖြင့် ပြည်သူကိုလိမ်ညာပြီး ဝါဒဖြန့်မှုများလည်း ရှိနေသည်။
ပုံအညွှန်း – မေလ ၁၅ ရက် နံနက်ပိုင်းတွင် ညောင်ရွှေမြို့နယ်၊ အင်းလေးတောင်ဖက်ခြမ်းရှိ ဘုရားတောင်ရွာကို စစ်ကောင်စီတပ်နှင့် PNO ပြည်သူ့စစ်တို့က လက်နက်ကြီးဖြင့် ရမ်းသမ်းပစ်ခတ်မှုကြောင့် ဘုရားတောင်ရွာမှ နေအိမ်တစ်လုံး ပျက်စီးသွားစဉ်။
Photo – အင်းလေးဒေသလူ့အခွင့်အရေး
မဟာ
#MeKongNews
#စစ်ဘေးရှောင်
#အင်းလေးဒေသ
#ဆောင်းပြောင်းကျေးရွာ
#ဖယ်ခုံအင်း
