မဲခေါင်၊ မေ၂၆
ရှမ်းပြည်မြောက်ပိုင်း၊ သီပေါမြို့နယ်၊ နမ္မတွင် SSPP နှင့် MNDAA တို့ နယ်မြေအငြင်းပွားမှု ထပ်မံဖြစ်ကာ စစ်ရေးပြန်လည်တင်းမာလာကြောင်း ဒေသခံများထံမှ သိရသည်။
မေလ ၂၅ ရက်တွင် သီပေါမြို့နယ်၊ နမ္မကျေးရွာအုပ်စုရှိ ခိုနန်းဖရွာတွင်ရှိနေသည့် MNDAA တပ်ဖွဲ့ကို SSPP က အင်အားရာချီဖြင့် လာရောက်ပြီး ၎င်းတို့၏ ယခင်စခန်းနေရာကို ပြန်လည်သိမ်းပိုက်ရန် တောင်ဆိုမှုများရှိခဲ့ပြီး ညှိနှိုင်းမှုအဆင်မပြေပါက တိုက်ပွဲ ဖြစ်ပွားနိုင်ချေရှိကြောင်း ဒေသခံတစ်ဦးက ပြောသည်။
“မနေ့က ရှမ်းတပ်တွေ ခိုနန်းဖက် အများကြီးရောက်လာတယ်။ အဆင်မပြေရင်တော့ တိုက်ပွဲဖြစ်မှာပဲ” ဟု ၎င်းကပြောသည်။
ဧပြီလကုန်ပိုင်းတွင် သီပေါမြို့နယ်အတွင်းရှိ SSPP တပ်များ အခြေချရာ စိန့်ကျော့နှင့် ဟန်နားကို MNDAA တပ်များ ဝင်ရောက်သိမ်းပိုက်မှုကြောင့် နှစ်ဖက်တပ်များ ထိတွေ့မှုဖြစ်ပွားခဲ့ပြီး စစ်ရေးတင်းမာလာခြင်းဖြစ်သည်။
လက်ရှိ တင်းမာမှုဖြစ်နေသည့်နေရာများမှာ ရှေးဘိုးစဥ်ဘောင်ဆက်ကတည်းက ရှမ်းရွာများဖြစ်ခဲ့သဖြင့် ယခု ကိုးကန့်များရောက်ရှိလာကာ နယ်မြေယူနေကြသည်ကို လက်မခံနိုင်ကြောင်း အခြားဒေသခံတစ်ဦးက ပြောသည်။
ပြီးခဲ့သည့်ရက်ပိုင်းကလည်း MNDAA က နမ္မ ကျောက်မီးသွေးနယ်မြေကို ဝင်ရောက်လာသဖြင့် နယ်မြေခံ SSPP တပ်နှင့် အချင်းများမှုများ ဖြစ်ခဲ့ရာတွင် နှစ်ဖက်ထိခိုက်မှုများရှိခဲ့သလို MNDAA တပ်ဖွဲ့ဝင် ၂ ဦးလည်း သေဆုံးမှု ရှိခဲ့သည်။
မေလဆန်းပိုင်းတွင် UWSA ထိန်းချုပ်ထားသည့် ပန်ဆန်း၌ FPNCC အဖွဲ့ဝင်အချင်းချင်းအနေဖြင့် နှစ်ဘက်တွေ့ဆုံ ဆွေးနွေး ညှိနှိုင်းမှုများတွင် စိန်ကျော့၊ နမ္မ၊ ဟန်နားတို့မှ MNDAA က ဆုတ်ပေးလျင် မူဆယ်၊ ကွတ်ခိုင် တကြောရှိ SSPP တပ်စခန်းများကို ဆုတ်ခွာပေးရန်၊ ပြည် ထောင်စုကားလမ်းမကြီးတလျှောက် SSPP မှ အခွန်ကောက်ခံခြင်း မပြုလုပ်ရန်တို့ တောင်းဆိုခဲ့ခြင်းကြောင့် သဘောတူညီမှု တစုံတရာ မရရှိခဲ့ဘဲ အစည်းအဝေး ပြီးဆုံးခဲ့သည်ဟု သတင်းရင်းမြစ်များထံက သိရသည်။
SSPP ထိန်းချုပ်မှုအောက်ရှိ စိန်ကျော့တပ်စခန်းကို ဧပြီလ ၂၉ ရက် ညနေပိုင်းတွင် ကိုးကန့်တပ်ဖွဲ့ MNDAA မှ ထိန်းချုပ်နိုင်ခဲ့ကြောင်း ဒေသခံများက ဆိုသော်လည်း ဧပြီလ ၃၀ ရက်တွင် SSPP မှ ပြန်လည်ထိန်းချုပ်နိုင်ခဲ့ကြောင်း SSPP Info မှ သတင်းထုတ်ပြန်ထားသည်။
MNDAA က SSPP တပ်များကို ကျေးသီး၊ နန့်လန် လမ်းပိုင်းအထိ ဆုတ်ခိုင်းပြီးတန့်ယန်း-မိုင်းရယ်(မိုင်းရယ် မှ မိုင် ၂၀ )- သီပေါ ၉မိုင် လမ်း ခွဲ၊ လမ်းအပိုင်းရှိ စိန်ကျော့စခန်းကို ဝင်ရောက်နေခဲ့သည့်အပေါ် နှစ်ဖက် ညှိနှိုင်းမရ တင်းမာနေခဲ့ရာ ပြီးခဲ့သည့် FPNCC အစည်းအဝေးတွင်လည်း ပြေလည်မှုမရှိခဲ့ကြောင်း သိရသည်။
လက်ရှိတွင် ဒေသခံများသည် ပဋိပက္ခကြောင့် နေရပ်စွန့်ခွာထွက်ပြေးရသည့် အခြေအနေနှင့် စစ်တပ်နှစ်ဖွဲ့အကြား တိုက်ပွဲဖြစ်ပွားနိုင်သည့် အခြေအနေကို စိုးရိမ်လျက်ရှိနေကြသည်။
မဟာ
#MeKongNews
#စိန်ကျော့
#SSPP
#MNDAA
#သီပေါမြို့နယ်
