မဲခေါင်၊ မေ ၂၃
လွတ်တော်တွင်း မပြေလည်မှုများကြောင့် အာဏာသိမ်းမှု ဖြစ်လာမည်ကို စိုးရိမ်နေကြချိန်တွင် ခေတ်မီစစ်ခေါင်းဆောင်သစ်များကြောင့် ထိုင်းတွင် စစ်အာဏာသိမ်းနိုင်မှု ဖြစ်လာဖွယ် မရှိသော်လည်း မိမိအနေဖြင့် ကံသေကံမ အာမခံချက်မျိုးတော့ မပေးနိုင်ဟု ထိုင်းဒုဝန်ကြီးချုပ် ဖမ်သမ်ဝီချာရာချိုင်က ပြောဆိုခဲ့သည်။
မေ ၂၂ ရက်သည် ၂၀၁၄ ခုနှစ်က ထိုင်းတွင် ဗိုလ်ချုပ် ပရာယွတ်ခေါင်းဆောင်သော နောက်ဆုံး စစ်အာဏာသိမ်းမှု ၁၀ နှစ်ပြည့်မြောက်ခဲ့ရာ လက်ရှိ ထိုင်း ကာကွယ်ရေးဝန်ကြီးလည်းဖြစ်သော ဖမ်သမ် ဝီချာကို ထိုင်းနိုင်ငံ၌ နောက်ထပ် စစ်အာဏာသိမ်းနိုင်မှု ရှိလာနိုင်မည်လားဟု မီဒီယာများက မေးမြန်းခဲ့ခြင်း ဖြစ်သည်။
ထိုမေးခွန်းနှင့်ပတ်သက်ပြီး ဖမ်သမ်က “ ဘယ်သူကမှတော့ နောက်ထပ် အာဏာမသိမ်းနိုင်ဘူးလို့ အာမမခံနိုင်လောက်ပါဘူး။ ဒါပေမဲ့ ဒီကနေ့ ကျွန်တော် စစ်တပ်ထိပ်တန်းခေါင်းဆောင်တွေနဲ့ အလုပ်တွဲ လုပ်နေမှုအရ သူတို့ဟာ ခေတ်မီတိုးတက်တဲ့ စစ်ခေါင်းဆောင်တွေဖြစ်လို့ စစ်အာဏာသိမ်းမှုရဲ့ ကမ္ဘာ လုံးဆိုင်ရာ သက်ရောက်မှုကို နားလည်သဘောပေါက်ကြလို့ အာဏာသိမ်းဖွယ်မရှိဘူးလို့ မြင်တယ်။ ဒါပေမဲ့ ကျွန်တော့်အနေနဲ့ ဒါမျိုးတွေ ထပ်မဖြစ်လာနိုင်ဘူးလို့တော့ အာမမခံနိုင်ပါဘူး။ ဒီမိုကရေစီစနစ်တွေက အများကြီးရှိပါတယ်။ ကိုယ့်နိုင်ငံက ပြဿနာတွေကို ဖြေရှင်းရာမှာ စိတ်ရှည်ဖို့၊ ဒီမိုကရက်တစ် စနစ်နဲ့ စည်းမျဉ်းတွေကို ပါတီတိုင်းက စည်းကမ်းတကျ လိုက်နာနိုင်ဖို့တော့ လိုတယ်။ လူတွေရဲ့ မတူညီတဲ့အမြင်တွေကို ထုတ်ဖော်ပြသမှုမှာ ဖွဲ့စည်းပုံအခြေခံ ဥပဒေကို နားလည်ထားဖို့တော့ လိုပါတယ်။ နောက်ထပ် စစ်အာဏာသိမ်းတာ မမြင်ချင်ရင် လက်ရှိ သွားနေတဲ့ အလားအလာကောင်း တွေနဲ့ အုပ်ချုပ်မှုယန္တရားကို မဖြစ်မနေ လိုက်နာဖို့ လိုပါလိမ့်မယ်” ဟု ပြောကြားသွားခဲ့သည်။
၂၀၁၄ ခုနှစ် ထိုင်းတွင် စစ်အာဏာသိမ်းခြင်းမှာ သက်ဆင်မိသားစုကို ထောက်ခံသည့် ရှပ်နီအုပ်စုနှင့် သက်ဆင်၏ ဩဇာလွှမ်းမိုးလွန်းမှုကို အတိုက်အခံလုပ်သည့် ရှပ်ဝါ အုပ်စုတို့ကြား လမ်းပေါ် ဆန္ဒပြ အုံကြွမှုများဖြစ်ခဲ့ခြင်းကို အကြောင်းပြုကာ သိမ်းခဲ့ခြင်းဖြစ်သည်။
ကိုကလင်း
Ref:The Nation
#MeKongNews
#ထိုင်းနိုင်ငံ
#အာဏာသိမ်း
#သက်ဆင်
#ရှပ်နီ
