မဲခေါင်၊ မေ ၂၃
ဟားဗတ်တက္ကသိုလ်ကို ပြည်ပသားစာသင်သားများ လက်ခံသင်ကြားခွင့် ချက်ချင်းပိတ်ပင်ကြောင်း ဒေါ်နယ်ထရမ့်အစိုးရအဖွဲ့ လုံခြုံရေးဝန်ကြီးဌာနဝန်ကြီး ကရစ္စတီနိုအမ်က မေ ၂၂ ရက်၌ အတည်ပြု ထုတ်ပြန်သွားခဲ့သည်။
ဟားဗတ်တက္ကသိုလ်သည် အကြမ်းဖက်မှုများကို လှုံဆော်ခြင်း၊ ဂျိုးမုန်းတီးရေးဝါဒများ သွပ်သွင်းခြင်းနှင့် တရုတ်ကွန်မြူနစ်ပါတီနှင့် ပူးပေါင်းဆောင်ရွက်ခြင်းများရှိသည်ဟု ဒေါ်နယ်ထရမ့်က စွပ်စွဲပြီး ထောက်ပံ့ငွေ ဒေါ်လာ ၂.၂ ဘီလီယံကို သိမ်းဆည်းခဲ့သလို ယခုလည်း တက်ရောက်နေသော ပြည်ပကျောင်းသားများ၏ ဗီဇာနှင့်သတင်းအချက်အလက်များကို တောင်းခံရာတွင် ပေးရန် ငြင်းဆန်သဖြင့် နိုအမ်မှတစ်ဆင့် ၂၀၂၅-၂၀၂၆ ပညာသင်နှစ်တက်ရောက်နေသော ကျောင်းသားများအပါ မည်သည့် ပြည်ပကျောင်းသားမှ လက်ခံသင်ကြားခွင့် မပြုတော့ဟု တရားဝင် ပိတ်ပင်လိုက်ခြင်း ဖြစ်သည်။
လက်ရှိတက်ရောက်နေသော ပြည်ပကျောင်းသားများကို တခြား ပညာသင်ခွင့်ရှိသည့် တက္ကသိုလ်များသို့ အမြန်ဆုံးပြောင်းရွှေ့ခိုင်းထားပြီး ဟားဗတ်တက္ကသိုလ်နှင့်ပတ်သက်သည့် မည်သည့် တရားဝင်ခွင့်ကိုမျှ ဆက်လက် မပေးတော့ဟုပါ ကြေညာသွားခဲ့ခြင်း ဖြစ်သည်။
၂၀၂၄-၂၅ ပညာသင်နှစ်တွင် ဟားဗတ်တက္ကသိုလ်၌ ပြည်ပသားကျောင်းသား ၂၇ ရာခိုင်နှုန်း (အယောက် ၆၈၀၀) တက်ရောက်နေပြီး ဟားဗက်တက္ကသိုလ်ဘက်မှ ယခုလုပ်ရပ်သည် ကျောင်းသားများစွာကို ဒုက္ခ ရောက်စေသော မဆင်မခြင်လုပ်ရပ်ဟု တုံ့ပြန်ဝေဖန်ခဲ့သည်။
ယခု ပညာသင်နှစ်တွင်လည်း တရုတ်ကျောင်းသားများ တက်ရောက်မှုများပြီး မည်မျှရှိသည်ကို ထုတ်ပြန်ထားခြင်းမရှိသော်လည်း ၂၀၂၂ ခုနှစ်က ဟားဗတ်တက္ကသိုလ်တွင် တရုတ်ကျောင်းသား အများဆုံးအဖြစ် ၁၀၁၆ ယောက် တက်ရောက်ခဲ့သည်။
လုံခြုံရေးဝန်ကြီး နိုအမ်၏ အကြောင်းကြားစာတွင် ပြီးခဲ့သည့် ၅ နှစ်အတွင်း ပြည်ပကျောင်းသားများ၏ တက်ကြွလှုပ်ရှားမှု ဗီဒီယိုများ၊ မှတ်တမ်းအချက်အလက်များ ပေးလျှင်မူ ၇၂ နာရီအတွင်း ပြန်လည်ခွင့်ပြုမည်ဟု ပါရှိသော်လည်း ဟားဗတ်တက္ကသိုလ်ဘက်မှ ကျောင်းသားများအချက်အလက်ပေးခြင်းသည် ဥပဒေနှင့်မညီညွတ်သဖြင့် မပေးနိုင်ဟု တုံ့ပြန်ထားကြောင်း သိရသည်။
ကိုကလင်း
Ref:The Nation
#MeKongNews
#ဟားဗက်တက္ကသိုလ်
#ဒေါ်နယ်ထရမ့်
#ပြည်ပကျောင်းသား
#တရုတ်ကျောင်းသား
