မဲခေါင်၊ မေ ၁၇
ထိုင်းဒုတိယနိုင်ငံခြားရေးဝန်ကြီးလည်းဖြစ် ကာကွယ်ရေးဝန်ကြီးလည်းဖြစ်သော ဖမ်သမ်ဝီချာရာရိုင်က ဘာလင်တွင် ဂျာမန်ကာကွယ်ရေးဝန်ကြီး ဘောရစ်ပစ္စတိုးရီးယက်စ်နှင့် ကုလသမဂ္ဂ ငြိမ်းချမ်းရေး ဝန်ကြီးဌာနများဆွေးနွေးပွဲ၌ တွေ့ဆုံစဉ် တရုတ်မှ ဝယ်ယူထားသည့် ရေငုပ်သင်္ဘောများတွင် တပ်ဆင်အသုံးပြုလိုသဖြင့် ဂျာမနီထုတ် အင်ဂျင် များဝယ်ယူရန် ကမ်းလှမ်းရာ ငြင်းပယ်ခံခဲ့ရသည်ဟု မေ ၁၆ ရက်က အတည်ပြုထုတ်ပြန်ခဲ့သည်။
တရုတ်သည် ထိုင်းထံ ၎င်းတို့ထုတ်ရေငုပ်သင်္ဘောများ ရောင်းချရန် ကမ်းလှမ်းမှုကို လက်ခံခဲ့ပြီးနောက် ၂၀၂၄ ဇူလိုင်တွင် ထိုင်းရေတပ်က တရုတ်ထုတ် CHD620 အင်ဂျင်များတပ်ဆင်အသုံးပြုရန် သဘောတူခဲ့သည်။
သို့သော် တရုတ်ထုတ် ရေငုပ်သင်္ဘောအင်ဂျင်များသည် ခေတ်မီနည်းပညာ အားနည်းချက်များ ရှိနေခြင်းကြောင့် ဂျာမနီထုတ် MTU396 ရေငုပ်သင်္ဘောအင်ဂျင်များ တပ်ဆင်အသုံးပြုရန် ကမ်းလှမ်းထားရာ ဘာလင်အစည်းအဝေး၌ မေးမြန်းရာ ငြင်းပယ်ခံခဲ့ရခြင်းဖြစ်သည်။
ဂျာမနီနှင့် ထိုင်းတို့ ဆက်ဆံရေးသည် ၁၆၃ နှစ်ကြာ ခိုင်မြဲခဲ့ကာ အီးယူနိုင်ငံများအနက် ဂျာမနီသည် ထိုင်း၏ ကုန်သွယ်စီးပွားအကြီးမားဆုံး နိုင်ငံဖြစ်သည်။ ထို့ကြောင့် ၂၀၂၇ နှင့် ၂၀၂၈ ခုနှစ်များတွင် ဂျာမနီ က ကုလသမဂ္ဂနှင့် သုံးဘက် ပူးပေါင်းစစ်ရေးလေ့ကျင့်စွမ်းရည်မြှင့်တင်မှု လုပ်ရန် သဘောတူခဲ့သော်လည်း တရုတ်သည် NATO ၏ စစ်ဘက်ဆိုင်ရာ ပစ္စည်းများတင်ပို့မှု ပိတ်ပင်ခံထားရသော နိုင်ငံဖြစ်သည့် အတွက် တရုတ်ထုတ် ရေငုပ်သင်္ဘောများအတွက် အင်ဂျင်မရောင်းနိုင်ဟု ဂျာမနီ ကာကွယ်ရေးဝန်ကြီး က ပြတ်သားစွာငြင်းပယ်ခဲ့ခြင်းဖြစ်ကြောင်း ဖမ်သမ်ဝီချာရာရိုင်က ရှင်းလင်းပြောကြားခဲ့သည်။
ထိုင်းအတွက် ပထမဆုံး ရေငုပ်သင်္ဘောကို တရုတ်ဘက်မှ တည်ဆောက်နေသည်မှာ ၈၀ ရာခိုင်နှုန်း ပြီးစီးနေပြီဖြစ်ပြီး ထိုတစ်စီးအတွက်တန်ကြေးသည်ပင်လျှင် ဘတ် ၇ ဘီလီယံကျော်ရှိနေပြီဖြစ်ကာ ယခု ဂျာမနီထုတ်အင်ဂျင်ဖြင့်မရသဖြင့် ထိုင်းဘက်မှ တရုတ် ရေငုပ်သင်္ဘောဝယ်ယူရန်သဘောတူညီမှုကို ပြန်လည်ပယ်ဖျက်နိုင်ကြောင်း သတင်းများထွက်ပေါ်နေသလို မှာပြီးသားသင်္ဘောများကို တရုတ်နှင့် မဟာမိတ်လုပ်နေသည့် ကမ္ဘောဒီးယားထံ လွှဲပြောင်းပေးမည်ဟုလည်း သတင်းများထွက်ပေါ်နေသည်။
ထိုအခြေအနေနှင့်ပတ်သက်ပြီး ဖမ်သမ်က ပထမဆုံး တရုတ်ရေငုပ်သင်္ဘောအတွက် ကုန်ကျစားရိတ် တစ်ဝက်ကျော်ပေးခဲ့ရပြီးဖြစ်ကာ ကမ္ဘောဒီးယားသို့ လွှဲပြောင်းမည့်သတင်းများကို မသိကြောင်း၊ ထိုင်းနိုင်ငံဆိုသည်မှာ တရုတ်၊ ဂျာမနီ အနောက်နိုင်ငံများနှင့် ယှဉ်လျှင် အလွန်သေးငယ်သည့် နိုင်ငံဖြစ်သောကြောင့် အခြေအနေများကို သတိကြီးစွာထားရှိပြီး နှစ်ဖက် ဆက်ဆံရေးကိုလည်း အထူးဂရုစိုက်ရမှာဖြစ်ကြောင်းနှင့် အခြေအနေများကို ချင့်တွက်စီစဉ်ရန်သာ ရှိသည်ဟု ပြောဆို သွားခဲ့သည်။
Ref: The Nation Thailand & Bangkokpost
ကိုကလင်း
#MeKongNews
#ရေငုပ်သင်္ဘော
#တရုတ်ထုတ်
#ထိုင်းနိုင်ငံ
#ဂျာမနီ
