မဲခေါင်၊ မေ ၁၇
မြို့ကိုဖြတ်သန်းစီးဆင်းနေပြီး လူထု၏ အဓိကရေအရင်းမြစ်ဖြစ်သည့် နမ့်တုံချောင်းရေတွင် နုန်းအနယ်အနှစ်များစွာပါဝင်လာပြီး သုံးစွဲမရအောင် ပျက်စီးနေကြောင်း ဒေသခံများထံမှ သိရသည်။
ရှမ်းပြည်အရှေ့ပိုင်း၊ မိုင်းတုံခရိုင်၊ မိုင်းတုံမြို့ရှိ နမ့်တုံချောင်း (နမ့်ဟောင်ခယ်)မှာ မေလ၁၅ရက်တွင် စတင်ရွာသွန်းခဲ့သည့် မိုးကြောင့် တောင်ကျရေစီးဝင်ရာတွင် အဝါရောင် နုန်းအနယ်အနှစ်များစွာ ပါဝင်လာကြောင်း၊ ယင်းနုန်းများကြောင့် ချောင်းရည်အရည်အသွေးမှာ သုံးစွဲမရအောင်ဖြစ်သွားပြီး သုံးရေအခက်အခဲဖြစ်နေကြောင်း မိုင်းတုံမြို့၊ မြို့မရပ်ကွက်နေပြည်သူတစ်ဦးက မဲခေါင်ကို ပြောသည်။
“ရေကြီးခဲ့ရင်တောင် နုန်းကအဝါရောင်မဟုတ်ဘူး၊ အခုက နုန်းအဝါရောင်တွေက ချောင်းတွေကို ပို့ချလို့ ချောင်းတွေ တိမ်လာတယ်။ အရင်လို ချိုးဖို့ မပြောနဲ့ အဝတ်လျှော်လို့တောင်မရတော့ဘူး။ ချိုးလဲ မချိုးရဲကြတော့ဘူး”ဟု ၎င်းက ပြောသည်။
ချောင်းအထက်ပိုင်းဖြစ်သည့် မိုင်းတုံ၊ မိုင်းဆတ်သွားလမ်း၏ အနောက်ဘက် ၆ မိုင်အထက်ပိုင်းတွင် လားဟူပြည်သူ့စစ်ပိုင်ကုမ္ပဏီ၏ ရွှေလုပ်ကွက်များ၊ သတ္တုကန်များရှိပြီး ယင်းလုပ်ကွက်များမှ နုန်းများမှာ မိုးများပြီးရေကြီးပါက တောင်ကျချောင်းများအထဲ စီးဝင်သည့်အတွက် ယခုလို ချောင်းများပျက်စီးရဖြစ်ကြောင်း ဒေသခံများက ပြစ်တင်ဝေဖန်သည်။
ယခု မြစ်ညှာအထက်ပိုင်း ရွှေနှင့်သတ္တုတူးဖော်ခြင်းကို ၂၀၂၁ နောက်ပိုင်းတွင် လုပ်ဆောင်လာခြင်းဖြစ်ကြောင်း သိရသည်။
နုန်းအနည်ပို့ချမှုကြောင့် ချောင်းကောကာ မိုးတွင်း၌ ရေကြီးမှု ပိုမိုဆိုးရွာလာမည်ကိုလည်း မြို့နေလူထုက စိုးရိမ်လျက်ရှိသည်။
“မြို့က သယံဇာတ ကျိန်စာသင့်နေပါပြီ။ လူတွေတင်မက နောင်ပါရင်အုန်းတော၊ မြို့မကွင်းတွေလည်း စိုက်ပျိုးမြေတွေအပေါ် နုန်းတွေဖုံးလို့ စိုက်ဖို့ခက်နေကြပြီ” ဟု နောင်ပါရင် ရပ်ကွက်သားတစ်ဦးက ပြောသည်။
၎င်းပြောသည့် စိုက်ပျိုးမြေများမှာ စပါးစိုက်ဧကရာကျော်ရှိပြီး ကြက်သွန်ဖြူလည်း အဓိက စိုက်ကြကြောင်း သိရသည်။
မိုင်းတုံမြို့နေလူထုအနေဖြင့် နမ့်တုံချောင်းရေကို အားထားသုံးစွဲရသလို မြို့မရပ်ကွက်၊ နောင်ပါရင်၊ ဝမ်မိုင်၊ ဖာချယ်၊ ဟောင်လီစသည့် ရွာများမှ စပါး၊ ကြက်သွန်ဖြူစိုက်ခင်းများ အတွက်လိုအပ်သည့် ရေကိုလည်း နမ့်တုံချောင်းမှ အဓိက ရယူသုံးစွဲနေခြင်းဖြစ်သည်။
“သဘာဝပတ်ဝန်းကျင်ကို ထိန်းသိမ်းပြီး မြို့ရွာတွေမပျက်စီးအောင်၊ ရေအရင်းအမြစ်တွေ မပျောက်ပျက်အောင် လူထုကတော့ မေတ္တာရပ်ခံတောင်းဆိုတာပဲ လုပ်နိုင်ပါတယ်။ နောက်တစ်ခုကတော့ လောကကို စောင့်ရှောက်တဲ့ နတ်တွေကို တိုင်တည်ပြီး ကျိန်စာတိုက်တဲ့နည်းပါပဲ။ အဲတာလုပ်ရရင်တော့ ဆွေစဥ်မျိုးဆက်ထိခိုက်ကုန်မှာဖြစ်လို့ အဲလိုလုပ်ရတဲ့အထိ မဖြစ်ဖို့ကျမဆုတောင်းပါတယ်”ဟု မိုင်းတုံနေ ဒေသခံတစ်ဦးက ပြောသည်။
ယခင်က နှစ်စဥ်လို ချောင်း၊ မြောင်းများ သန့်ရှင်းထိန်းသိမ်းခဲ့ပြီး နမ့်တုံ(နမ့်ဟောင်ခယ်)ချောင်း ရေရှည်တည်တန့်စေရန် ၂၀၁၉ ခုနှစ်က တိမ်လာသည့် ချောင်းအောက်ခြေကို တူးဖော်ခဲ့ပြီး မြေသားနံရံများနေရာတွင် ကွန်ကရစ်နှင့် အခိုင်အမာ ပြန်လည်တည်ဆောက်ပေးခဲ့သည်ဟု ဒေသခံတွေထံက သိရသည်။
ယမန်နှစ် စက်တင်ဘာ ရေဘေးတွင် လူတစ်ဦး အိမ်အလုံးလိုက် ရေနောက်မျောပါ သေဆုံးခဲ့ရပြီး ဟောင်လီရွာနှင့် မြို့မရပ်ကွက် တောင်ပိုင်းရှိနေအိမ်များ ရေဝင်၍ ဆန်ကဲ့သို့ရောင်းကုန်များ၊ အိမ်အသုံးအဆောင်လျှပ်စစ်ပစ္စည်းများ၊ တန်ကြေးသိန်းပေါင်းများစွာ ပျက်စီးဆုံးရှုံးခဲ့ရသည်။
#MeKongNews
#မိုင်းတုံ
#နမ့်တုံချောင်း
#ရွှေတူးဖော်မှု
#ရေအရင်းမြစ်
