မဲခေါင်၊ မေ ၄
နယ်မြေပိုင်ဆိုင်မှုအငြင်းပွားနေသည့် ကက်ရှ်မီးယားဒေသ ပဟယ်လ်ဂမ်အရပ်၌ ဟိန္ဒူဘာသာဝင်လား ဟုမေးမြန်းပြီး အိန္ဒိယ ခရီးသွား အမျိုးသား ၂၆ ယောက်ကို သေနတ်ဖြင့်တေ့ပစ်သတ်ခဲ့သော အစ္စလာမ္မစ် စစ်သွေးကြွအကြမ်းဖက်သမားများလုပ်ရပ်ကြောင့် အိန္ဒိယဘက်မှ ပါကစ္စတန်ကို ပြင်းထန် စွာပိတ်ဆို့အရေးယူမှုများပြုလုပ်နေရာ ပါကစ္စတန် ကာကွယ်ရေးဝန်ကြီး ခါဝါဂျာအဆစ်ဖ်က အိန္ဒုမြစ်ဝှမ်းဒေသ ရေခွဲဝေသုံးစွဲရေးသဘောတူညီချက်စာချုပ်ကို အိန္ဒိယဘက်မှ ဆိုင်းငံ့ပယ်ဖျက် လိုက်သဖြင့် နိုင်ငံ အသက်သွေးကြော ရေကိုဖြတ်တောက်သည့် မည်သည့် စီမံကိန်းကိုမဆို ဖောက်ခွဲဖျက်ဆီးသွားမည်ဟု သတိပေးခြိမ်းခြောက်ပြောဆိုလာပြန်သည်။
အိန္ဒိယရေဖြတ်တောက်မှုသည် အိန္ဒုမြစ်ဝှမ်းရေအရင်းအမြစ် ခွဲဝေသုံးစွဲမှုစာချုပ်အရ ပါကစ္စတန်နိုင်ငံ၏ စိုက်ပျိုးဧရိယာ ၈၀ ရာခိုင်နှုန်း မှီခိုနေရသော ရေအရင်းအမြစ်ဖြစ်သောကြောင့် ပါကစ္စတန်အတွက် များစွာ အထိနာစေခဲ့သည်။
ပါကစ္စတန်က အိန္ဒိယ၏ လေကြောင်းလိုင်းများ အဓိကအားထားရာ နိုင်ငံလေပိုင်နက်ကို ပြန်ပိတ်ပင်ခဲ့သလို အိန္ဒိယကလည်း ပါကစ္စတန်သားအားလုံး၏ ဗီဇာကို ရုပ်သိမ်းခြင်း၊ သံတမန်ဆက်ဆံရေး ဖြတ်တောက်ပြီး ပြည်နှင်ခြင်း၊ အိန္ဒိယရေပိုင်နက်တွင် ပါကစ္စတန်သင်္ဘောများသွားလာမှု ပိတ်ပင်ခြင်း၊ သွင်းကုန်အားလုံးပိတ်ပင်ခြင်းများ အားချင်းလုပ်ဆောင်ခဲ့သည်။
ထိုအခြေအနေတွင် နျူကလီးယားပိုင် ၂ နိုင်ငံ စစ်မက်ဖြစ်ပွားမည်ကို ကမ္ဘာက စိုးရိမ်နေရပြီး ပါကစ္စတန် ကာကွယ်ရေးဝန်ကြီး အဆစ်ဖ်က ကနဦး မိမိတို့ပိုင် နျူကလီးယားဒုံးကျည် ထိပ်ဖူး ၁၃၀ လုံး အိန္ဒိယ အတွက် သီးသန့်ဖြစ်စေမည်ဟု ခြိမ်းခြောက်ပြောဆိုခဲ့သေးသည်။
ယခုလည်း အိန္ဒုမြစ်ဝှမ်း ရေဖြတ် တောက်ခံရမှုတွင် အိန္ဒိယဘက်မှ ထပ်မံရေဖြတ်တောက်ရေး ဆည်များတည်ဆောက်ခြင်းမျိုး ပြုလုပ်လာပါက ထိုအဆောက်အအုံများအားလုံးကို ပစ်ခတ်ဖောက်ခွဲတိုက်ခိုက်ရမည်ဖြစ်ကြောင်း မေ ၂ ရက် နေ့တွင် ထပ်မံခြိမ်းခြောက် ပြောဆိုသွားခဲ့သည်။
ကိုကလင်း
Ref: indiatoday
#MeKongNews
#ပါကစ္စတန်
#အိန္ဒိယ
#ရေအရင်းမြစ်
#ကက်ရှ်မီးယား
