မဲခေါင်၊ မေ ၃
TNLA နှင့် စစ်ကောင်စီတို့ ဒုတိယအကြိမ် အပစ်အခတ်ရပ်စဲရေးဆွေးနွေးအပြီး ၃ ရက်အကြာ ယနေ့ မေလ ၃ ရက် နံနက် ၉ နာရီခန့်တွင် TNLA ထိန်းချုပ်ဒေသ မိုးကုတ်မြို့ကို လေကြောင်းမှ ဗုံးကြဲခဲ့ပြီး ဒေသခံတစ်ဦး သေဆုံးကြောင်း မိုးကုတ်ပြည်သူ့ကာကွယ်ရေးတပ် ပြောခွင့်ရပုဂ္ဂိုလ်က မဲခေါင်ကိုပြောသည်။
မိုးကုတ်မြို့ ကသည်းစျေးနှင့် ကသည်းအနောက်ကျောင်းနေရာကို လေကြောင်းက ဗုံးသီးကြဲချတိုက်ခိုက်ခဲ့ခြင်းဖြစ်ပြီး ပန်းရံလုပ်ကိုင်နေသောအမျိုးသားတစ်ဦး ဦးခေါင်းပြတ်ထွက် သေဆုံးခဲ့ကာ ဒေသခံတဦးပြင်းထန်ဒဏ်ရာရရှိကြောင်း သိရသည်။
မေလ ၂ ရက်နေ့ ညပိုင်းတွင်လည်း မိုးကုတ်မြို့အရှေ့ပိုင်း ဘန်မွန်ရွာနဲ့ မိုးကုတ်မြို့အနောက်ပိုင်း အုတ်အင်းရပ်ကွက်ကိုလေကြောင်း ၂ကြိမ်တိုက်ခိုက်ခဲ့ပြီး လူနေအိမ်အချို့ပျက်စီးခဲ့သည်။
ဧပြီလ ၂၈ ရက်နှင့် ၂၉ ရက်များတွင် တရုတ်နိုင်ငံ၏ကြားဝင်စေ့စပ်မှုဖြင့် PSLF/ TNLA မှ ဒုတိယဗိုလ်ချုပ်ကြီးတားဂျုတ်ဂျားဦးဆောင်သည့် ကိုယ်စားလှယ်များနှင့်စစ်ကောင်စီမှ ဒုတိယဗိုလ်ချုပ်ကြီးကိုကိုဦး ဦးဆောင်သည့်ကိုယ်စားလှယ်တို့သည် တရုတ်နိုင်ငံ ကူမင်းမြို့တွင် အပစ်အခတ်ရပ်စဲရေး ဆွေးနွေးခဲ့ကြခြင်းဖြစ်ပြီး စစ်ကောင်စီ၏ နယ်မြေတောင်းဆိုမှုများ ကြောင့် အောင်မြင်ခဲ့ခြင်းမရှိချေ။
စစ်ကောင်စီသည် အပစ်အခတ်ရပ်စဲရေးဆွေးနွေးပြီး ဧပြီ ၃၀ ရက်နေ့နှင့်မေ ၁ ရက်နေ့တို့တွင်ပင် PSLF/TNLA ထိန်းချုပ်နယ်မြေ နောင်ချိုမြို့ထဲသို့ လက်နက်ကြီးများ ပစ်ခတ်ခြင်း လေကြောင်းတိုက်ခိုက်ခြင်းများ ပြုလုပ်ခဲ့ပြီး မြေပြင်ထိုးစစ်များလည်း ဆက်လက်ပြုလုပ်နေသည်။
အပစ်အခတ်ရပ်စဲရေး ဆွေးနွေးပြီးသည့်နောက် နောင်ချိုမြို့နယ်နှင့် တောင်ခမ်းဒေသများကို စစ်ကောင်စီမှ မြေပြင်ထိုးစစ်များ ဆက်လက်ပြုလုပ်လျက်ရှိပြီး လက်ရှိအချိန်တွင် နောင်ချိုမြို့၊ နောင်လင်ဒေသကို စစ်ကောင်စီမှ ပြန်လည်ရရှိကာ ကံကြီးဒေသကို အထပ်မံထိုးစစ်ဆင်နေကြောင်း မြေပြင် သတင်းရင်းမြစ်တချို့က ဆိုသည်။
ဂနိုက်
#MeKongNews
#မိုးကုတ်
#TNLA
#စစ်ကောင်စီ
#လေကြောင်းတိုက်ခိုက်
