မဲခေါင်၊ ဧပြီ ၂၇
ရှမ်းပြည်တောင်ပိုင်း၊ ဓနုတို့၏အချက်အခြာဒေသဖြစ်သည့် ရွာငံမြို့နယ်၊ ရွာငံနှင့် ထိစပ်လျက်ရှိသော မြို့နယ်များနှင့် မန္တလေးတိုင်းတို့တွင် စစ် ကောင် စီတပ်သားများ၊ ရဲများနှင့် ဒေသခံပျူစောထီးများက ဒေသခံရွာသားများကို လူ့အခွင့်အရေး ချိုး ဖောက် မှုများ ပို၍ပြင်းထန်စွာ လုပ်ဆောင်လျက်ရှိသည်များကို မှတ်တမ်းတင်ထားသည့် အစီရင်ခံစာ အဖြစ် ရှမ်းလူ့အခွင့်အရေးမဏ္ဍိုင် – SHRF က မှတ်တမ်းတင်ဖော်ပြထားခြင်း ဖြစ်သည်။
၂၀၂၁ခုနှစ်၊ ဖေဖော်ဝါရီလ အာဏာသိမ်းမှုဖြစ်စဉ်မှစ ရွာငံမြို့နယ်ရှိ ရွာပေါင်း ၅ရွာမှ ၂၀၂၂ ခုနှစ် မေလတွင် စစ်ကောင်စီတပ်သားများ၏ အကြမ်းဖက်မှုများကို ခံရသော ဒေသများ ပိုမိုကျယ်ပြန့်လာခဲ့ပြီး ရွာငံမြို့နယ်ရှိ ကျေးရွာ ၁၄ ရွာအထိ အကြမ်းဖက်ခံခဲ့ရကြောင်း ရှမ်းလူ့အခွင့်အရေးမဏ္ဍိုင် – SHRFက ထုတ်ပြန်သည်။
၂၀၂၄ ခုနှစ်၊ ဒီဇင်ဘာလ ၂၂ ရက်နေ့တွင် ရွာငံမြို့ အနောက်တောင်ဘက်ရှိ မင်းပလောင်ကျေးရွာရှိ နေအိမ်များ မီးရှို့ဖျက်ဆီးခံခဲ့ရပြီး နေအိမ် စုစုပေါင်း ၁၇၀လုံး ကို စစ်ကောင်စီတပ်မ ၅၅ တပ်သားများ၏ မီးရှို့ဖျက်ဆီးခြင်းကို ခံရကြောင်း၊ ယင်းမှာ ဓနုတော်လှန်ရေးတပ်ဖွဲ့များ၏ တိုက်ခိုက်မှုကို စစ်ကောင်စီကလက်တုန့်ပြန်ကာ အရပ်သားနေအိမ်များကို မီးရှို့ပြာချခြင်းဖြစ်ကြောင်း SHRF က သုံးသပ်ဖော်ပြသည်။
ဓနုဒေသတွင် အစုအပြုံလိုက် ညှင်းပန်း နှိပ်စက်မှုများကို တိုးမြှင့်လုပ်ဆောင်နေခြင်းသည် ယင်းဒေသများ၌ ဓနုကာကွယ်ရေးတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့များ ဩဇာလွှမ်းမိုးလာမှုကို တိုက်ရိုက်တုန့်ပြန်ရန် ရည်ရွက်ချက်ထင်ရှားကြောင်း အစီရင်ခံစာက ဆိုသည်။
ယင်းအစီရင်ခံစာနှင့်စပ်လျဥ်း၍ SHRF ပြန်ကြားရေးမှ နန်းလျန်းဟန်က “မြန်မာတစ်နိုင်ငံလုံးမှာ စစ်ကောင်စီက အုပ်ချုပ်နေသရွေ့တော့ အခုလိုအလားတူဖြစ်ရပ်တွေ ဖြစ်နေမှာပါဘဲ။ ကျမတို့အနေနဲ့ ရွာငံဒေသမှာလဲ အခုလိုမျိုး ဖြစ်နေတယ်ဆိုတာ အမေ့လျော့မခံရစေဖို့၊ နောင်တစ်ချိန်နစ်နာသူတွေ အတွက် တရားမျှတမှုရဖို့ ဒီအစီအရင်ခံစာကို ထုတ်ပြန်ရခြင်း ဖြစ်ပါတယ်” ဟု မဲခေါင်သို့ ပြောသည်။
၂၀၂၄ခုနှစ်၊ ဒီဇင်ဘာလမှစ၍ စစ်ကောင်စီသည် ဓနုတော်လှန်ရေးတပ်ဖွဲ့များကို လေကြောင်းတိုက်ခိုက်မှုများနှင့် လက်နက်ကြီးဖြင့်အပြင်းအထန်ပစ်ခတ်တိုက်ခိုက်မှုများ ပြုလုပ်ခဲ့သည်။
ဒီဇင်ဘာလ ၁၈ ရက် နေ့မှ ဇန်နဝါရီလ ၁၆ရက်နေ့အတွင်း ရပ်စောက်မြို့နယ် မြောက်ဖက်ရှိ ကျောက်ဂူကို စစ်ကောင်စီက လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုများပြုလုပ်ခဲ့သဖြင့် ကျေးရွာသား ၃ဦးသေဆုံးပြီး ၁၄ဦး ဒဏ်ရာရရှိခဲ့သည်။ ထို့ပြင် ဇန်နဝါရီလ ၃၁ ရက်နေ့တွင် ရွာငံကို လေကြောင်းတိုက် ခိုက်မှုပြုလုပ် သဖြင့် နေအိမ်အချို့ ထိခိုက်ပျက်စီးခဲ့သည်ဟု သိရသည်။
ယခု SHRF၏အစီရင်ခံစာတွင် စစ်ကောင်စီတပ်သားများ ကျူးလွန်လျက်ရှိသော လိင်ပိုင်းဆိုင်ရာ အကြမ်းဖက်မှုများ ကိုလည်း မီးမောင်းထိုးပြထားပြီး ထိုအထဲတွင် ၂၀၂၃ ခုနှစ် မေလက တပ်မ၅၅ တပ်သားများက ဒေသခံအမျိုးသမီး ၃ဦးကို အုပ်စုဖွဲ့အဓမ္မပြုကျင့်ခဲ့ကြောင်း၊ ရွာငံမြို့တွင် ဖမ်းဆီးခံရကာ လိင်ပိုင်းဆိုင်ရာ ညှင်းပန်းနှိပ်စက်ခံရပြီးနောက် အကြမ်းဖက်မှုတိုက်ဖျက်ရေးဥပဒေပုဒ်မဖြင့် ထောင်ဒဏ် ၁၂ နှစ် ချမှတ်ခံခဲ့ ရသော ၂၃နှစ်အရွယ်အမျိုးသမီးတစ်ဦး အကြောင်းတို့ပါဝင်သည်။
လိင်ပိုင်းစော်ကားခံရသူ မမိုးမိုးမှာ အင်္ဂါဇတ်ထဲသို့ နံပါတ်တုတ်ထိုးထည့်ခံသည်အထိ လူမဆန်စွာ ညှဥ်းပန်းနှိပ်စက်ခံခဲ့ရသလို အခြားတစ်ဦးမှာလည်း တပ်မ၅၅မှ စစ်ကောင်စီ ၆ဦး၏ မုဒိန်းကျင့်မှုကို ခံခဲ့ရကြောင်း ပါရှိသည်။
စစ်ကောင်စီတပ်၏ ပိုမိုပြင်းထန်လာသော ညှင်းပန်းနှိပ်စက်မှုများ၊ အထူးသဖြင့် မီးရှို့ဖျက်ဆီးမှု များ ကြောင့် ယခုအချိန်တွင် နေရပ်စွန့်ခွာထွက်ပြေးသူ ၁၀၀၀ ကျော်ရှိလာခဲ့ပြီး ၎င်းတို့သည် ရွာငံရှိ တောတောင်များတွင် သွားရောက်ခိုလှုံနေကြရကြောင်း သိရသည်။
စစ်ကောင်စီ၏ စစ်ဆင်ရေးများကြောင့် အချို့မှာ ကြိမ်ဖန်များစွာ ထွက်ပြေးကြရသည်။ ထိုကဲ့သို့ ဆင်းရဲဒုက္ခများစွာကို ကြုံတွေ့နေရသော်လည်း ထိုနေရပ်စွန့် ခွာထွက်ပြေးသူများသည် လူသားချင်းစာနာမှုအကူအညီများ လုံးဝမရသလောက်နီးပါး ဖြစ်နေသည်ဟု အစီရင်ခံက ဖော်ပြထားသည်။
မဟာ
#MeKongNews
#ဓနုဒေသ
#ရွာငံမြို့
#တော်လှန်ရေးတပ်ဖွဲ့
#လိင်ပိုင်းဆိုင်ရာအကြမ်းဖက်မှု
