မဲခေါင်၊ ဧပြီ ၂၇
ရှမ်းပြည်မြောက်ပိုင်း၊ လားရှိုးမြို့မှ ကိုးကန့်တပ်ဖွဲ့ – MNDAA တပ်များထွက်ခွာပြီး စစ်ကောင်စီတပ်များ ဝင်ရောက်လာချိန်တွင် လုယက်မှုနှင့် ဓားပြတိုက်မှုများ ဖြစ်ပွားလာကြောင်း ဒေသခံများက ပြောသည်။
ဧပြီလ ၂၁ ရက်နေ့ MNDAA တပ်များ ဆုတ်ခွာပြီးနောက်ပိုင်းမှစတင်ကာ ပစ္စည်းခိုးယူမှုထက် ပေါ်ပေါ်ထင်ထင် လုယက်သူများနှင့် ဓားပြတိုက်မှုများ ဖြစ်ပွားလာသောကြောင့် လူပြတ်သောလမ်းများတွင် မသွားရဲကြောင်း ဒေသခံတဦးက မဲခေါင်ကို ပြောသည်။
“ခု အကူးအပြောင်းကာလ ဒီရက်ထဲ သူခိုးထက် လုယက်တာ ဓားမြတိုက်တာ များနေတာ၊ လူပျက်တဲ့လမ်းဆို တစ်ယောက်တည်း မသွားရဲဘူး၊ တိုင်စရာနေရာလည်း မရှိလေ။ ပြီးတော့ ထောင်ထဲက လူဆိုးတွေလည်း လွှတ်တယ်ပြောတာပဲ။ ကိုးကန့်တွေ မပြန်ခင်၊ ကိုးကန့်ရှိတုန်းတော့ သူခိုးတွေ ငြိမ်တယ်” ဟု ၎င်းက ဆိုသည်။
မြို့တွင်းဝင်ရောက်လာသော စစ်ကောင်စီတပ်ဖွဲ့ဝင်များမှ အမှုဖွင့်တိုင်ကြားရန် ဖုန်းနံပတ်များ ကြေညာထားသော်လည်း ယခင်ကတည်းက အရေးယူခြင်း မရှိသည့်အတွက် တိုင်ကြားသူမရှိကြောင်း ယင်းမြို့ခံကပြောသည်။
လားရှိုးမြို့သို့ စစ်ကောင်စီတပ်များပြန်လည်ဝင်ရောက်လာသည့် ဧပြီလ ၂၂ ရက်မှ စတင်ကာ လမ်းလျှောက်လာသည့် ကျောင်းဆရာမထံကို ဓားဖြင့်ခုတ် လုယက်ခြင်း၊ မင်္ဂလာအကြိုဓာတ်ပုံရိုက်သည့် စုံတွဲထံမှ လုယက်ခြင်း စသည့်အမှုများအပြင် ခိုးမှု၊ ဖောက်ထွင်းမှုများလည်း ပိုမိုများပြားလာခြင်းဖြစ်သည်။
လက်ရှိတွင် စစ်ကောင်စီတပ်ဖွဲ့ဝင်များက ဌာနဆိုင်ရာရုံးများ ပြန်လည် လည်ပတ်နိုင်ရန် ရှင်းလင်းရေးလုပ်နေကြောင်း ဒေသခံများက ပြောသည်။
MNDAA တပ်ဖွဲ့ဝင်များ ဆုတ်ခွာရာတွင် သယ်ယူနိုင်သောပစ္စည်းများအား ယူဆောင်သွားသလို စစ်ကောင်စီကလည်း လက်ရှိအချိန်အထိ ထိရောက်သည့် အုပ်ချုပ်မှု မလုပ်နိုင်သေးသည့်အတွက် ပြည်သူများ နေထိုင်ရာအဆင်မပြေကြောင်း ဒေသခံများက ပြောသည်။
လားရှိုးမြို့ကို ၂၀၂၄ သြဂုတ်လ ၃ ရက်နေ့တွင် MNDAA ဦးဆောင်သော တော်လှန့ရေးတပ်များမှ သိမ်းပိုက်နိုင်ခဲ့ပြီး ၈ လကျော်ကြာ ပြန်လည်ထူထောင်ရေး လုပ်ငန်းများလုပ်ဆောင်ပြီးနောက် ယခုနှစ် ဧပြီလ ၂၂ ရက်နေ့တွင် တရုတ်နိုင်ငံ၏ နိုင်ငံရေးဖိအားများကြောင့် စစ်ကောင်စီထံ ပြန်လည်လွှဲအပ်ပေးခဲ့ရသည်။
ဂနိုက်
#MeKongNews
#လားရှိုး
#စစ်ကောင်စီ
#MNDAA
#လုယက်မှု
