မဲခေါင်၊ ဧပြီ ၂၆
ဧပြီ ၂၅ ရက် ဒေသစံတော်ချိန် နံနက် ၁၀ နာရီ ၄၀ မိနစ်တွင် မော်စကိုမြို့ ဘာလာရှီခါအရပ်၌ ဗောက်စ်၀က်ဂွန်ကား ဗုံးခွဲခံရပြီးနောက် ပူတင်အားထားရသော ၅၉နှစ်အရွယ် ရုရှားဗိုလ်ချုပ် ယာရိုဆလပ်ဗ်မော့စ်ကာလစ်ကို လုပ်ကြံသူဟု သံသယရှိသည့် တရားခံ ယူကရိန်းအေးဂျင့်ကို ရုရှားဘက်က ပထမဆုံးအကြိမ် ထုတ်ပြန်လာခဲ့သည်။
မော်စကာလစ်သည် မကြာသေးမီကမှ ရာထူးတိုးခဲ့ကာ ဒုတိယဗိုလ်ချုပ်ကြီးဖြစ်လာပြီး ရုရှား တပ်မတော်စစ်ဦးစီးချုပ် ပင်မစစ်ဆင်ရေးညွှန်ကြားမှုဦးစီးဌာနတွင် ဒုတိယအကြီးဆုံးရာထူးပိုင်ဆိုင် ထားသူဖြစ်ကာ ကားဗုံးကွဲရာအနီးအနားအဆောက်အအုံတွင် နေထိုင်ပြီး ထိုဗောက်စ်၀ဂွန်ကားနားအရောက် ကျည်ဆံများပါဖြည့်ထားသော ပေါက်ကွဲစေနိုင်သည့် ယမ်း ၅၀၀ ဂရမ်ပါ ဖောက်ခွဲရေး ပစ္စည်းများကို အဝေးထိန်းခလုပ်ဖြင့် အနီးကပ်အပိုင် ဗုံးခွဲလုပ်ကြံခဲ့ခြင်းဖြစ်သည်ဟု ရုရှား ထောက်လှမ်းရေးမှ ဆိုသည်။
လုပ်ကြံသူသည် တူရကီသို့ ထွက်ပြေးလွတ်မြောက်သွားပြီး ယူကရိန်းနိုင်ငံ ဆူမီဒေသသား အစ်ဂနက်ကူဇင်ဆိုသူဖြစ်ကာ မော့စ်ကာလစ်နေထိုင်ရာတိုက်ခန်းတွင်ပင် နေထိုင်သူဖြစ်ပြီး ဖောက်ခွဲခဲ့သည့်ကားမှာလည်း ၎င်းပိုင်ဆိုင်သော ကားဖြစ်သည်ဟု သိရသည်။
ရုရှားနှင့်ယူကရိန်း ငြိမ်းချမ်းရေးစာချုပ်ရန် ၄ ကြိမ်မြောက်အဖြစ် အမေရိကန်သမ္မတ ဒေါ်နယ်ထရမ့်၏ အထူးသံတမန် စတိဗ်ဝစ်ကော့ဖ် မော်စကိုရောက်ရှိသည့်နေ့တွင် ယခုလို ဗုံးခွဲလုပ်ကြံခြင်းဖြစ်ကာ ယူကရိန်းအစိုးရအကြံပေး ယူရီးဆက်ခ်က ရုရှားစစ်ဗိုလ်ချုပ်များ များများသေဆုံးလေ ယူကရိန်း ကလေးငယ်များ သေဆုံးမှုနည်းလေးဖြစ်ကြောင်း၊ မိမိတို့ စေလွှတ်ထားသည့် စပိုင်များကြောင့် ရုရှားပြည်တွင်းမှာပင် ပူတင်လက်ရုံးများ ထိတ်လန့်နေရပြီဖြစ်ကြောင်း Times ရေဒီယိုတွင် ပြောကြားသွားခဲ့သည်။
ယူကရိန်း စပိုင် ကားဗုံးခွဲလုပ်ကြံမှုကြောင့် ဧပြီ ၁၈ ရက်တွင် ရုရှားအီလက်ထရွန်နစ် စစ်ဆင်ရေးကျွမ်းကျင်သူ Yevgeny Rytikov သေဆုံးခဲ့သလို ဒီဇင်ဘာလတုန်းကလည်း ယူကရိန်းစစ်မြေပြင်တွင် ဓာတုလက်နက်များ အသုံးပြုရာ၌ အဓိက တီထွင်စေခိုင်းခဲ့သူ ဒုတိယဗိုလ်ချုပ်ကြီး Igor Kirillov ဗုံးခွဲ သုတ်သင်ခံခဲ့ရသည်။
ပြီးခဲ့သည့်နှစ် နိုဝင်ဘာလကလည်း ပူတင်လက်ရုံး ရုရှားရေတပ် တပ်မှူး Valery Trankovsky ဗုံးခွဲ လုပ်ကြံခဲ့ရပြီး ဇူလိုင်လကလည်း လုပ်ကြံခံရသူများထဲ ရာထူးအကြီးဆုံးရုရှား ဗိုလ်ချုပ်ဖြစ်သူ Andrei Torgashov ကားဗုံးခွဲခံရပြီး သေဆုံးခဲ့ရသည်။
ကိုကလင်း
Ref:Thesun
#MeKongNews
#ယူကရိန်း
#ရုရှား
#ကားဗုံးခွဲ
#မော်စကိုမြို့
