မဲခေါင်၊ ဧပြီ ၂၄
ဧပြီ ၂၃ ရက်တွင် စင်ကာပူနိုင်ငံ၌ ထူးခြားပြောင်းလဲလာဖွယ်ရှိနေသော ရွေးကောက်ပွဲအကြို မဲဆွယ်ကာလ ၉ ရက်တာကို စတင်လိုက်ပြီဖြစ်သည်။
မေ ၃ ရက်တွင် အထွေထွေရွေးကောက်ပွဲကြီး ကျင်းပမည်ဖြစ်ရာ လွန်ခဲ့သည့် တစ်နှစ်က နိုင်ငံခေါင်းဆောင်နေရာရယူခဲ့သော လောရန့်စ်ဝေါင်အတွက် ဝန်ကြီးချုပ်ဆက်ဖြစ်နိုင်ရေး မကြုံစဖူး ပြိုင်ဘက်များ ပေါ်ပေါက်နေသဖြင့် ထူးခြားသော စင်ကာပူ ရွေးကောက်ပွဲကြီးဖြစ်လာမည်ဟု သုံးသပ်နေကြသည်။
စင်ကာပူနိုင်ငံ လွတ်လပ်ရေးရသည့် ၁၉၆၅ ခုနှစ်ကတည်းက လက်ရှိ လောရန့်စ်ဝေါင်ကို ဝန်ကြီးချုပ် ဖြစ်စေခဲ့သော ပြည်သူ့ လှုပ်ရှားမှုပါတီ (PAP) သည် မည်သည့်ရွေးကောက်ပွဲတွင်မှ မရှုံးခဲ့ဘဲ လွတ်တော်အတွင်း နှစ်ပေါင်းများစွာ စိုးမိုးနိုင်ခဲ့သည့် ပါတီဖြစ်သည်။ သို့သော် စင်ကာပူ၏ နိုင်ငံရေးအခင်းအကျင်းသည် ပြောင်းလဲလာခဲ့ပြီဖြစ်ရာ ကိုဗစ် – ၁၉ ကပ်ဆိုးကာလ ၂၀၂၀ ရွေးကောက်ပွဲ၌ အကြီးမားဆုံး အတိုက်အခံ အလုပ်သမားပါတီသည် စံချိန်တင် အမတ် နေရာ ၁၀ နေရာ၌ အနိုင်ရရှိခဲ့ရာ ယခု ရွေးကောက်ပွဲတွင် ပိုမို အနိုင်ရရှိရန် မျှော်လင့်ယုံကြည်မှုများ ရှိနေသည်။
ထို့ကြောင့် အာဏာရ ပြည်သူ့လှုပ်ရှားမှုပါတီနှင့် အတိုက်အခံ အလုပ်သမားပါတီအပြင် ပါတီများသည် လူငယ်မဲဆန္ဒရှင်များကို ပစ်မှတ်ထားကာ မဲရရှိစေရန် စည်းရုံးစွဲဆောင်မှုများ ပြုလုပ်ကြမည်ဖြစ် ကြောင်း သိရသည်။
စင်ကာပူတွင် အသက် ၂၁ နှစ်ပြည့်ပြီးသူတိုင်း မဖြစ်မနေ မဲပေးရမည်ဖြစ်ရာ ယခု ရွေးကောက်ပွဲမှ ပထမဆုံးအကြိမ် မဲပေးခွင့်ရမည့် လူငယ် ၂၀၀၀၀၀ ရှိနေသည်။
မဲဆန္ဒရှင်ပေါင်း ၂ . ၇၅ သန်း ရှိနေသည့်နိုင်ငံတွင် လူငယ်မဲဆန္ဒရှင်သစ် ၂၀၀၀၀၀ ဆိုသည်မှာ ၇ ရာခိုင်နှုန်းသာ ရှိသော်လည်း လူမှုကွန်ရက်ခေတ်၌ လူငယ်များ၏ အသံသည် အကျယ်လောင်ဆုံးဖြစ်လေရာ ထိုလူငယ်ထု အင်အား၏ ထောက်ခံမှုရခြင်းသည် ရွေးကောက်ပွဲအောင်နိုင်ရေး အဓိကကျသဖြင့် ပါတီများ လူငယ်များကို စည်းရုံးရန် ကြိုးစားနေကြကြောင်း သိရှိရသည်။
ကိုကလင်း
Ref:Nikkei Asia
#MeKongNews
#စင်ကာပူ
#ရွေးကောက်ပွဲ
#မဲဆွယ်လှုပ်ရှားမှု
#ပြည်သူ့လှုပ်ရှားမှုပါတီ
#အလုပ်သမားပါတီ
