မဲခေါင်၊ ဧပြီ ၂၁
ထိုင်းနိုင်ငံ ခို့ဖငန်ခရိုင် ကရာဘီအရပ် Theppitak ကြက်မွေးမြူရေးခြံဝန်းကြီးအတွင်း ဧပြီ ၂၀ ရက်နေ့ က ထူးခြားသော မြေကျွံတွင်းနက်ကြီးနှင့် အက်ကွဲကြောင်းကြီးငယ်များ ပေါ်ထွက်လာပြီး ဧပြီ ၁၄ ရက်က လှုပ်ခတ်သွားသော ငလျင်ဒဏ်နောက်ဆက်တွဲ မြေအောက်ရွေ့လျားပြောင်းလဲမှုကြောင့် ယခု ထပ်မံဖြစ်လာခြင်းဖြစ်နိုင်ကြောင်း သုံးသပ်နေကြသည်။
ကြက်မွေးမြူရေးနှင့် ဆီအုန်းစိုက်တောင်သူ လုပ်ငန်းရှင် ဆူဝစ် (၅၂ နှစ်)၏ ခြံအတွင်း ပထမဆုံး မြေကျွံတွင်းဖြစ်ပွားပြီး ကနဦး ထိုမျှလောက်မကျယ်၊ မနက်သော်လည်း တစ်ရက်၊ ၂ ရက် အတွင်း တွင်းအကျယ်မှာ မီတာ ၂၀ ပတ်လည်ကျယ်ပြီး အနက် ၅ မီတာအထိ ကျွံဝင်ကာ ၂ နှစ်၊ ၃ နှစ် သက်တမ်းရှိ ဆီအုန်းပင်များပါ နစ်မြုပ်ပျောက်ကွယ်သွားကြောင်းနှင့် ခြံအတွင်း နေရာ ၂ နေရာ၌ ကြီးမားနက်ရှိုင်းသည့် အက်ကြောင်းကြီးများနှင့် အက်ကြောင်းငယ်များ ဖြစ်ပေါ်ခဲ့ကြောင်း အကြောင်းကြားခဲ့သည်။
ဧပြီ ၁၆ ရက် ဒေသစံတော်ချိန် မွန်းလွဲ ၂ နာရီ ၂၇ မိနစ်တွင် နျူအာကလောင်းနှင့် မူအန်းခရိုင်၌ သက်ရောက်ခဲ့ပြီး လတ္တီကျု ၈.၀၂၂ °N နှင့် လောင်ဂျီကျု ၉၈.၉၇၈ °E အနက် ၂ မီတာမှ ပြင်းအား ၃.၅ ရှိ ငလျင်လှုပ်ခတ်ခဲ့ခြင်း နောက်ဆက်တွဲအဖြစ် ယခုလို မြေအောက်အနေအထား ပြောင်းလဲပြီး တွင်းနက်နှင့် အက်ကြောင်းများပေါ်လာခြင်းဖြစ်ကာ ဒေသဆိုင်ရာအာဏာပိုင်များက ထိုနေရာအနီးတဝိုက် အန္တရာယ်ဇုန်အဖြစ် သတ်မှတ်ကာ ဖြတ်သန်းသွားလာ အလုပ်လုပ်ခွင့် ပိတ်ပင်ခဲ့ရသည်။
ထိုင်း မိုးလေဝသဌာနမှ ထုတ်ပြန်မှုအရ ထိုငလျင်သည် ကလောင်မာရိုင်ပြတ်ရွေ့မှ ဖြစ်ပေါ်သော ငလျင်ဟုဆိုပြီး ထိုပြတ်ရွေ့သည် ဘန်တခွန်း၊ ဖာနွန်ခရိုင်မှသည် ဆူရတ်ဌာနီကိုဖြတ်သွားပြီး ဖန်းင မှတစ်ဆင့် အန်ဒမန်ပင်လယ်ထဲသို့ ဆင်းသက်ကာ ထိုမှတစ်ဆင့် ဖူးခက်၊ ကော့ယာအိုကျွန်းတို့ဆီ အထိ ၁၄၈ ကီလိုမီတာ ရှည်လျားစွာတည်ရှိသည်ဟု ဆိုသည်။
ကိုကလင်း
Ref:The Nation Thailand
#MeKongNews
#ငလျင်
#မြေကျွံတွင်း
#ထိုင်းနိုင်ငံ
#ခို့ဖငန်
