မဲခေါင်၊ ဧပြီ ၂၀
ကမ္ဘောဒီးယားအစိုးရက ဖနောင်ပင်မြို့အနီး မဲခေါင်မြစ်မှသည် ထိုင်းပင်လယ်ကွေ့ ဆိပ်ကမ်းတစ်ခုအထိ တူးမြောင်းဖောက်လုပ်ရန် တရုတ်နှင့် သဘောတူစာချုပ် ချုပ်ဆိုခဲ့ကာ ဘဏ္ဍာရေးအရ စာချုပ်တန်ကြေး ဒေါ်လာ ၁.၂ ဘီလီယံ တန်ကြေးရှိသည်ဟု ထုတ်ပြန်သည်။
ပြီးခဲ့သည့် ဧပြီ ၁၇ ရက်နေ့က တရုတ်သမ္မတရှီကျင်းဖျင် ကမ္ဘောဒီးယားနိုင်ငံသို့ အလည်အပတ် ရောက်ရှိလာစဉ် Funan Techo Canal ဟု အမည်ရသော တူးမြောင်းကို ဖောက်လုပ်ရန် သဘောတူခဲ့ခြင်းဖြစ်ပြီး ကုန်စည်စီးဆင်းမှုအတွက် အဓိကအသုံးပြုမည်ဖြစ်ကြောင်း ဧပြီ ၁၉ ရက်၌ ကမ္ဘောဒီးယားအစိုးရက ထုတ်ပြန်သည်။
တူးမြောင်အရှည်မှာ ၁၅၁.၆ ကီလိုမီတာ (၉၄ မိုင်) ရှည်လျားပြီး တည်ဆောက်ရေးလုပ်ငန်းများကို မနှစ်ကတည်းက စတင်ခဲ့သော်လည်း ဩဂုတ် ၅ ရက်က ပန္နက်ရိုက်အခမ်းအနားကျင်းပပြီးနောက် ပြန်လည် ရပ်ဆိုင်းသွားခဲ့ကြောင်း သိရသည်။
နောက်ပိုင်းတွင်မှ ကမ္ဘောဒီးယားဝန်ကြီးချုပ် ဟွမ်မာနက်က နိုင်ငံအကျိုးစီးပွားနှင့် ဂုဏ်သိက္ခာကြောင့် မည်မျှကုန်ကျသည်ဖြစ်စေ တည်ဆောက်သွားမည်ဟု ကြေညာခဲ့ပြီး ယခုပြန်လည်တည်ဆောက်သွားရန် တရားဝင်စာချုပ်ချုပ်ခဲ့ခြင်းဖြစ်သည်ဟု ကြေညာသွားခြင်း ဖြစ်သည်။
ကမ္ဘောဒီးယား ရင်းနှီးမြှုပ်နှံသူများဘက်မှ တူးမြောင်းကုန်ကျစရိတ် ၅၁ ရာခိုင်နှုန်းထည့်ဝင်ကာ တရုတ်ရင်းနှီးမြှုပ်နှံသူများဘက်မှ ၄၉ ရာခိုင်နှုန်း ထည့်သွင်း တည်ဆောက်သွားမည်ဟုလည်း သိရှိရသည်။
ယင်းတူးမြောင်းသည် ကုန်းတွင်းရေလမ်းနှင့် ပင်လယ်ရေကြောင်းလမ်းကို ဆက်သွယ်သည့် မဟာဗျူဟာကျ တူးမြောင်းဖြစ်ကာ သင်္ဘောများ ကုန်တန်ချိန် ၃၀၀၀ အထိ တင်ဆောင် ဖြတ်သန်းနိုင်မည်ဟုလည်း ကြေညာချက်တွင် ထည့်သွင်းဖော်ပြခဲ့သည်။
ဆောက်လုပ်ရေးတာဝန်ကို တရုတ်အစိုးရပိုင် China Communications Construction Company က တည်ဆောက်မည်ဖြစ်ကာ ယင်းကုမ္ပဏီသည် ငွေကြေးဆိုင်ရာ မသမာမှုများကြောင့် နာမည်ပျက်ရှိသည့် ကုမ္ပဏီဖြစ်ပြီး တရုတ်စစ်တပ်အတွက် စစ်ရေးဆိုင်ရာ ကျွန်းတု တည်ဆောက်ပေးသဖြင့် အမေရိကန်မှ ပိတ်ဆို့အရေးယူထားသည့် ကုမ္ပဏီလည်း ဖြစ်သည်။
ကိုကလင်း
Ref:Khaosod
#MeKongNews
#ကမ္ဘောဒီယား
#တရုတ်
#မဲခေါင်မြစ်
#တူးမြောင်း
