မဲခေါင်၊ ဧပြီ ၁၆
လာအို – မြန်မာနယ်စပ်မှ မဲခေါင်မြစ်ကြောင်းကို ဖြတ်ကျော်ကာ တာချီလိတ်မြို့နယ်အတွင်း တင်သွင်းလာသည့် ကဖင်း ၁၂တန်ခွဲကို ဧပြီလ ၁၃ရက် ညနေပိုင်းက ဖမ်းဆီးရမိကြောင်း မြန်မာမူးယစ်ရဲတပ်ဖွဲ့နှင့် ထိုင်းအခြေစိုက် Maesai Press တို့တွင် ဖော်ပြသည်။
ဖမ်းဆီးရမိသည့် ကဖင်းများမှာ ဗီယက်နမ်နိုင်ငံထုတ်ဖြစ်ပြီး လာအိုနိုင်ငံမှတဆင့် မဲခေါင်မြစ်ကြောင်းကို ဖြတ်သန်းကာ တာချီလိတ်မြို့နယ်အတွင်း မှောင်ခိုတင်သွင်းလာခြင်းဖြစ်ကြောင်း၊ ယင်းကဖင်းများကို ရှမ်းအရှေ့နှင့် ရှမ်းတောင်နယ်စပ်ရှိ တိုင်းရင်းသားလက်နက်ကိုင်တပ်ဖွဲ့များ ထိန်းချုပ်ထားသည့် စိတ်ကြွဆေးပြားစက်ရုံများသို့ ပို့ဆောင်ရန်ဖြစ်ကြောင်း Maesai Press က ဖော်ပြထားသည်။
စိတ်ကြွဆေးပြားထုတ်လုပ်ရာတွင် အဓိကကျသည့် ထိန်းချုပ်ဓာတုပစ္စည်း ကဖင်းများထည့်ထားသည့် အိတ်ပေါင်း ၅၀၀ ကို ဖမ်းမိခြင်းဖြစ်ပြီး အလေးချိန် ၁၂ . ၅ တန်ရှိကြောင်း၊ တာချီလိတ်မြို့၊ ဆေခမ်းရပ်ကွက်ရှိ စက်မှုဇုန်ကွက်သစ်တွင် ဖမ်းမိခြင်းဖြစ်ကြောင်း၊ ဧပြီ ၁၃ရက် ညနေ ၃ နာရီခွဲအချိန် ကဖင်းအိတ်များအား ဆမ်ဖူးရွာနှင့် နမ့်ဖုန်းရွာကြားရှိ ဘုရားလေးရေဆိပ်မှ သယ်ဆောင်၍ တာဝန်ခံသိုလှောင်ထားသူ အောင်ကျော်ဌေး (ခ)ကျော်ထွေးအား တာချီလိတ်မြို့နယ်၊ မိုင်းဖုန်း(ခ)ကျေးရွာအုပ်စု၊ ပါခုတ်(နို)ကျေးရွာရှိ ၎င်း၏ နေအိမ်တွင်လည်းကောင်း၊ ဧပြီလ ၁၄ ရက်နေ့တွင် ကဖင်းများသယ်ဆောင်ပေးသူများဖြစ်သည့် စိုးမင်းထွန်း(ခ)နောင်ပိုင်စိုး နှင့် မြင့်ဝင်း(ခ)ဦးဝင်း တို့အား တာချီလိတ်မြို့၊ ဆေခမ်းရပ်ကွက်တွင် လည်းကောင်း ဖမ်းဆီးရမိခဲ့ကြောင်း၊ စစ်ဆေးဖော်ထုတ်ချက်များအရ သိမ်းဆည်းရမိ ကဖင်းများ ပိုင်ရှင်မှာ တာချီလိတ်မြို့နယ်၊ မိုင်းဖုန်း(က)ကျေးရွာအုပ်စု၊ ဝမ်တုံကျေးရွာနေ အိုက်အွန်(ခ)အိုက်ကျိုင်း ဖြစ်ကြောင်း မြန်မာမူးယစ်တပ်ဖွဲ့ – CCDAC Myanmar ကလည်း ထုတ်ပြန်သည်။
ကဖင်းများကို မြန်မာ-လာအိုနယ်စပ်၊ မဲခေါင်မြစ်ကြောင်းမှ စက်လှေဖြင့်သယ်ဆောင်လာပြီး ၎င်းမှတစ်ဆင့် တာချီလိတ်မြို့သို့ တရားမဝင်သယ်ဆောင်ခဲ့ခြင်းဖြစ်ကြောင်း၊ ကဖင်းတစ်တန်လျှင် စိတ်ကြွဆေးပြား ၁၃သန်း ထုတ်လုပ်နိုင်သည့်အတွက် ယခုဖမ်းဆီးရမိသည့် ပမာဏမှာ စိတ်ကြွဆေးပြား ၁၆၅သန်း ထုတ်လုပ်နိုင်သည့် ပမာဏဖြစ်ကြောင်း CCDAC Myanmar ၏ ထုတ်ပပြန်ချက်အရသိရသည်။
Source – CCDAC Myanmar, Maesai Press
#MeKongNews
#စိတ်ကြွဆေးပြား
#တာချီလိတ်
#MaesaiPress
#မဲခေါင်မြစ်
