မဲခေါင်၊ မတ် ၁၉
တာချီလိတ်မြို့နယ်အတွင်း တူးဖော်လုပ်ကိုင်နေသည့် တရားမဝင်ရွှေတွင်းများ လုပ်ကိုင်ခွင့်ရရန်အတွက် ရွှေတွင်းတစ်တွင်းလျှင် လစဉ် ဘတ်သန်းနှင့်ချီကာ ဌာနဆိုင်ရာများထံ ပေးကမ်းလုပ်ကိုင်နေကြောင်း သတင်းရင်းမြစ်များထံမှ သိရသည်။
တရားမဝင်ရွှေတွင်းများ လုပ်ကိုင်ခွင့်အတွက် ခရိုင်အုပ်ချုပ်ရေးမှူး၊ ဗျူဟာမှူး၊ ခရိုင်ရဲမှူးတို့ကို အများဆုံးပေးရပြီး ဌာနဆိုင်ရာများအပြင် ရပ်ကျေးအဆင့် အုပ်ချုပ်ရေးမှူးများအထိပါ လာဘ်ငွေပေးရကြောင်း ကိုယ်တိုင်ပေးနေရသူနှင့် နီးစပ်သူတစ်ဦးက ပြောသည်။
“ထွေအုပ်ဆိုရင် DC အတွက်ပေါ့၊ တစ်လကို ဘတ် ၂ သိန်းပေးရတယ်။ ခရိုင်ရဲမှူးကို တစ်သိန်းပေးရတယ်။ လုပ်ကွက်အကြီးအသေးပေါ်တော့ မူတည်တယ်။ တလကို ဘတ် ၁၀ သိန်းနဲ့အထက်ပေးရတယ်” ဟု ၎င်းကပြောသည်။
တာချီလိတ်မြို့နယ်၊ တာလေမြို့ဧရိယာအတွင်းနှင့် မိုင်းကိုးကျေးရွာအုပ်စုများအတွင်း၌ တရားမဝင် ရွှေတူးဖော်မှု အများအပြားရှိနေပြီး အနည်းဆုံး လုပ်ကွက် ၅၀ ခန့်ရှိကြောင်း၊ လုပ်ကွက်အများစုမှာ ဧကရာနှင့်ချီကျယ်ဝန်းကြောင်း သိရသည်။
“ရွှေလုပ်တဲ့သူတွေက တရားဝင်ဖြစ်အောင်တော့ ကြိုးစားနေတာပဲ။ ဒါပေမယ့် မကျလာဘူး။ အဲဒီတော့ ပေးကမ်းပြီးပဲ လုပ်နေရတာ” ဟု ရွှေတူးဖော်သူနှင့် နီးစပ်သူတစ်ဦးက ပြောသည်။
ယင်းရွှေလုပ်ကွက်များမှာ ကိုဗစ်-၁၉ ဖြစ်ပွားသည့် ၂၀၁၉၊ ၂၀၂၀ ခုနှစ်များအတွင်း ခေတ္တရပ်နားသွားသော်လည်း အာဏာသိမ်းသည့် ၂၀၂၁ နောက်ပိုင်း ပြန်လည်လုပ်ကိုင်လာပြီး လုပ်ကွက်များလည်း များပြားလာကြောင်း ဒေသခံများထံမှ သိရသည်။
တရားမဝင်လုပ်ကွက်များဖြစ်သည့်အတွက် သဘာဝပတ်ဝန်းကျင်နှင့် ဒေသခံများ ထိခိုက်မှုကိုလည်း အလေးမထားဘဲ စိတ်တိုင်းကျလုပ်ဆောင်နေကြောင်း၊ ရွှေလုပ်ကွက်များမှာ တောင်ပေါ်တွင်တူးဖော်ကြခြင်းဖြစ်သည့်အတွက် သစ်တောပြုန်းတီးမှုများရှိသလို တောင်များလည်းပျက်စီးလာကြောင်း တာချီလိတ်ဒေသခံတစ်ဦးက ပြောသည်။
တာလေမြို့အတွင်းရှိ ရွှေနှင့် သတ္တုလုပ်ကွက်များတွင် အသုံးပြုသည့် ဆိုင်ရာနိုက်မှာ လူနှင့် သဘာဝပတ်ဝန်းကျင်ကို အဆိပ်အတောက်ဖြစ်စေပြီး ယင်းဆိုင်ရာနိုက်များမှာ တာလေမြို့အတွင်းရှိ နမ့်လင်းချောင်းမှတဆင့် မဲခေါင်မြစ်အတွင်း စီးဝင်သွားကြောင်း သဘာဝပတ်ဝန်းကျင်အရေး တက်ကြွလှုပ်ရှားသူများက ထောက်ပြသည်။
ယင်းသို့စီးဝင်သွားပြီး မဲခေါင်မြစ်ကြောင်းတစ်လျှောက်ရှိ ပြည်သူများပါ အဆိပ်သင့်မှု ခံစားရသည့်အတွက် ထိုင်းနိုင်ငံပြည်သူများက ရှမ်းပြည်အရှေ့ပိုင်းရှိ ရွှေတူးဖော်မှုများကို မတ်လ ၁၄ ရက်တွင် ဆန္ဒပြကြသည်။
ထိုင်းအစိုးရ၏ လေ့လာမှုများအရ မယ်ဆိုင်မြစ်၏ ရေကြောင်းတစ်လျှောက် မျောပါလာသည့် နုံးအနယ်အနှစ်များတွင် အာဆင်းနစ်၊ နီကယ်လ်နှင့် ဇင့် ပါဝင်မှု အများဆုံးဖြစ်နေပြီး ဇင့်ပါဝင်မှုမှာသတ်မှတ်ထားသည့်ပမာဏထက် ၁၈ ဆပိုများ နေကြောင်း သိရသည်။
ရှမ်းပြည်အရှေ့ပိုင်းနှင့် ထိုင်းနိုင်ငံမြောက်ပိုင်းတို့တွင် ၂၀၂၄ ခုနှစ် စက်တင်ဘာလနှင့် အောက်တိုဘာလများအတွင်း ဆိုးရွာလှသည့် စံချိန်တင် ရေကြီးနစ်မြုပ်မှုကို ကြုံခဲ့ရပြီး ယင်းမှာ တရားမဝင်ရွှေနှင့် သတ္တုတူးဖော်မှုများ၏ အကျိုးဆက်ဖြစ်ကြောင်း ဒေသခံများက ဆိုသည်။
#MeKongNews
#တာချီလိတ်
#ရွှေတူး
#ရွှေလုပ်ကွက်
#လာဘ်ငွေ
