မဲခေါင်၊ ဧပြီ ၅
ထိုင်းနိုင်ငံ၊ ဘန်ကောက်မြို့၌ ပြုလုပ်သည့် BIMSTEC (ဘင်းမ်စတက်) အစည်းအဝေးအတွင်း စစ်ခေါင်းဆောင်မင်းလှိုင်အောင်နှင့် သီးသန့်တွေ့ဆုံးခဲ့သည့် ဓာတ်ပုံကို ဘူတန်ဝန်ကြီးချုပ်က သူ၏ လူမှုကွန်ယက် (Facebook) ပေါ် ဖော်ပြခဲ့မှုတွင် ဝေဖန်သည့် မှတ်ချက်အများအပြား ရရှိခဲ့ပြီးနောက် ယနေ့ (ဧပြီ ၅) က ပြန်ဖြုတ်ချသွားသည်။
ဘူတန်နိုင်ငံဝန်ကြီးချုပ် Tshering Tobgay သည် စစ်ခေါင်းဆောင်မင်းအောင်လှိုင်နှင့် ဧပြီ ၄ ရက်တွင် တွေ့ဆုံခဲ့ပြီး ထိုသို့တွေ့ဆုံမှုကို စစ်ကောင်စီမီဒီယာများတွင် ဖော်ပြခဲ့သလို ဘူတန်ဝန်ကြီးချုပ်၏ ဖေ့ဘုတ်တွင်လည်း ဖော်ပြခဲ့ခြင်းဖြစ်သည်။
ထိုသို့ဖော်ပြမှုတွင် မှတ်ချက်ပေါင်းတစ်သိန်း၊ Like တစ်သိန်းခွဲခန့်ရှိခဲ့ပြီး အများစုသည် ဝေဖန်သည့် မှတ်ချက်များနှင့် Angry React များ ပေးခဲ့ကြခြင်းဖြစ်သည်။ ထို့နောက် ဘူတန်ဝန်ကြီးချုပ်က ထိုတွေ့ဆုံမှုကို ယနေ့တွင် ပြန်ဖြုတ်ချခဲ့ခြင်းဖြစ်သည်။
စစ်ခေါင်းဆောင်မင်းအောင်လှိုင်နှင့် တွေ့ဆုံသည့်မှတ်တမ်းဓာတ်ပုံကို ပြန်ဖြုတ်ချခဲ့သော်လည်း အိန္ဒိယဝန်ကြီးချုပ်၊ နီပေါဝန်ကြီးချုပ်၊ သီရိလင်္ကာဝန်ကြီးချုပ်၊ ထိုင်းဝန်ကြီးချုပ်တို့နှင့် တွေ့ဆုံသည့် မှတ်တမ်းများကိုတော့ ယခုထိ ဖော်ပြထားသည်။
အာရှနိုင်ငံ ၇ ခုနှင့် ဖွဲ့စည်းထားသည့် ဘင်္ဂလားပင်လယ်အော် စီးပွားရေးနှင့်နည်းပညာဆိုင်ရာ ဘက်ပေါင်းစုံပူးပေါင်းဆောင်ရွက်ရေး အဖွဲ့အစည်း (BIMSTEC) အဖွဲ့တွင် ဘင်္ဂလားဒေ့ရှ်၊ အိန္ဒိယ၊ မြန်မာ၊ သီရိလင်္ကာ၊ ဘူတန်၊ ထိုင်းနှင့် နီပေါနိုင်ငံတို့ပါဝင်သည်။
အိမ်ရှင် ထိုင်းနိုင်ငံတွင် ကျင်းပသည့် ထိုအစည်းအဝေးကို စစ်ခေါင်းဆောင်မင်းအောင်လှိုင်က ပထမဆုံးအကြိမ် တက်ရောက်ခွင့်ရရှိပြီးနောက် ဖိတ်ကြားခဲ့သည့် ထိုင်းနိုင်ငံကိုပါ ဝေဖန်မှုများ ရှိခဲ့သည်။
စစ်ခေါင်းဆောင် မင်းအောင်လှိုင်တက်ရောက်သည့် အစည်းအဝေး၌ ထိုင်းတက္ကသိုလ်ကျောင်းသား တစ်ဦးက ဆန္ဒပြခဲ့ပြီး ယနေ့တွင်လည်း ထိုင်းပြည်သူများက ဆန္ဒပြရန်စီစဥ်ခဲ့သော်လည်း ရုန်းရင်းဆန်ခတ်မှုများ ရှိခဲ့သည်။
ခရီးစဥ်အရ မင်းအောင်လှိုင်သည် ယနေ့ (ဧပြီ ၅) မှသာ ထိုင်းနိုင်ငံမှ ပြန်လာမည်ဖြစ်သော်လည်း ယမန်နေ့ (ဧပြီ ၄) ညပိုင်းတွင် ပြန်သွားခဲ့ကြောင်း ခေတ်သစ်မီဒီယာတွင် ဖော်ပြထားသည်။
#MeKongNews
#ထိုင်း
#ဘင်မ်းစတက်
#စစ်ခေါင်းဆောင်
#မင်းအောင်လှိုင်
#ဘူတန်ဝန်ကြီးချုပ်
