မဲခေါင်၊ ဧပြီ ၂
တာချီလိတ်မြို့နယ်၊ တာလေမြို့အခြေစိုက် ကျာကူနီပြည်သူ့စစ်အတွင်း ခေါင်းဆောင်ဖြစ်သူ ဦးကျာစီး၏ လုပ်ရပ်များကြောင့် တပ်ဖွဲ့ဝင်များကြား စည်းလုံးမှုပြိုကွဲနေကြောင်း နီးစပ်သူများထံမှ သိရသည်။
ပြည်သူ့စစ်ခေါင်းဆောင် ဦးအားချိုင် (ခ) ဦးကျာစီးသည် ပြည်သူ့စစ်အဖွဲ့ဝင်များအတွက် ထောက်ပံ့ပေးသည့် ဆန်၊ ဆီနှင့် အခြားထောက်ပံ့ရေးပစ္စည်းများကို လက်အောက်ငယ်သားများကို ပြန်မပေးခြင်း၊ တပ်ဖွဲ့ဝင်များ၏ အခက်အခဲများကို ကူညီပေးမှုမရှိခြင်း၊ ကိုယ်ကျိုးစီးပွားအတွက် နောက်ကွယ်တွင် မူးယစ်ဆေးဝါးရောင်းဝယ်ခြင်း၊ လက်နက်မှော်ခိုကူးခြင်း၊ စစ်တပ်အကြီးအကဲများကို ငွေကြေးဖြင့် ဝင်ရောက်ရောနှောကာ ဒုစရိုက်လုပ်ငန်းများကို ဖုံးကွယ်လျက်ရှိခြင်းတို့ကြောင့် တပ်ဖွဲ့ဝင်များက မကျေနပ်ခြင်းဖြစ်ကြောင်း ကျာကူနီပြည်သူ့စစ်နှင့် နီးစပ်သူတစ်ဦးက ပြောသည်။
“တာလေနဲ့ တာချီလိတ်မှာ ရန်ကင်းဆီပန့်တွေ ဖွင့်ထားတယ်။ တိုင်းမှူးတွေလာရင်လည်း လုံခြုံရေးတွေပေးတယ်။ ငွေကြေးတွေ ထောက်ပံ့တယ်။ တပ်ဖွဲ့ဝင်တွေကို လုံးဝ လှည့်မကြည့်ဘူး။ သူလိုရင် ခိုင်းတယ်။ သူနဲ့အဆင်မပြေရင် လုပ်ကြံတယ်။ နားယောင်းအုပ်စု၊ မိုက်ဟွန်ဆံခါ ကျေးရွာက အာခါရွာကို သူနဲ့အဆင်မပြေလို့ ပြည်သူ့စစ်ငယ်သားတွေနဲ့ ညဘက်မှာ လက်ပစ်ဗုံးနဲ့ ပစ်ခိုင်းတယ်။ ငွေရှိတယ်၊ လက်နက်ရှိတယ်ဆိုပြီး ဒုစရိုက်လုပ်ငန်းတွေကို ပေါ်ပေါ်တင်တင်လုပ်တယ်” ဟု ၎င်းကပြောသည်။
ထိုသို့မကျေနပ်မှုများကြောင့် ဦးကျာစီးကို တြိဂံဒေသတိုင်း တိုင်းမှူးထံ ပြည်သူ့စစ်တပ်ဖွဲ့ဝင်များက တိုင်ကြားထားကြောင်း ကျာကူနီပြည်သူ့စစ်တပ်ဖွဲ့ဝင်တစ်ဦးက ပြောသည်။
ဦးအားချိုင်(ခ)ဦးကျာစီးသည် ၂ဝဝ၅ ခုနှစ်တွင် ထိုင်းနိုင်ငံ၊ မှန်ဟီးတဲန်ဒေသမှ မိုင်းလင်း အနောက်အုပ်စု၊ နားဟိုင်းလုံကျေးရွာတွင် လာရောက် အခြေချ နေထိုင်ခဲ့ကာ ၂ဝဝ၆ ခုနှစ်၌ တာလေမြို့၊ နားယောင်းကျေးရွာသို့ ပြောင်းရွေ့နေထိုင်ပြီး ကျာကူနီ ပြည်သူ့စစ်ဌာနေ၊ ပြည်သူ့စစ် အရန်တပ်ဖွဲ့မှာ ဝင်ရောက်တာဝန်ထမ်းဆောင်ခဲ့သူဖြစ်ကြောင်း၊ ၂၀၁၆ ခုနှစ်တွင် ပြည်သူ့စစ်ခေါင်းဆောင် ဦးဝါရှင် ကွယ်လွန်ပြီး နောက်ပိုင်း ဦးဝါရှင်သားဖြစ်သူ မောင်ယောနကို ကျာကူနီပြည်သူ့စစ်ခေါင်းဆောင် ရွေးကောက်ခဲ့ပြီး နောက်ပိုင်းတွင် မည်သူတစ်ဦးတစ်ယောက်မှ မသိလိုက်ပဲ မောင်ယောနကို ခေါင်းဆောင်နေရာမှ ဖယ်ရှားကာ ဦးကျာစီးက ခေါင်းဆောင်ဖြစ်လာခဲ့ကြောင်း ဒေသခံများထံမှ သိရသည်။
ဇော်မြင့်
#MeKongNews
#ရှမ်းအရှေ့
#ကျာကူနီပြည်သူ့စစ်
#ဦးကျာစီး
#တြိဂံဒေသတိုင်း
ပုံအညွှန်း – ကျာကူနီပြည်သူ့စစ်ခေါင်းဆောင် ဦးကျာစီးပိုင် ရန်ကင်းဆီပန့်
