မဲခေါင်၊ မတ် ၂၃
ရှမ်းပြည်တောင်ပိုင်း၊ ဖယ်ခုံမြို့နယ်၊ သိကျိတ်ကျေးရွာအုပ်စုရှိ မြင်းမထိတောင်တွင် လေးပွင့်ကြယ် ကုမ္ပဏီအနေဖြင့် လူထုကို အသိမပေးဘဲ သတ္ထုတူးဖော်မည့်ကိစ္စကို ပြင်းထန်စွာ ကန့်ကွက်သည်ဟု ကယန်းလူမျိုးစုဝင် ပရာဒေါင်းဆွေမျိုးစုက ထုတ်ပြန်ထားသည်။
ကယန်းနယ်မြေတွင် လူမျိုးစု ၄ စု ရှိသည့်အနက် ပဲဒေါ့လူမျိုးစု၊ ပရာဒေါင်းဆွေမျိုးစုပိုင် နယ်မြေထဲရှိ မြင်းမထိတောင်တွင် လေးပွင့်ကြယ်ကုမ္ပဏီလိမိတက် သတ္ထုတူးဖော်ရန် တရုတ်ကုမ္ပဏီနှင့် ၅ နှစ်စာချုပ်ချုပ်ဆိုကာ နယ်မြေခံလူထု အပါအဝင် ဆွေမျိုးစု၏ သဘောထားကို မေးမြန်းခြင်းမရှိဘဲ လုပ်ငန်းများလုပ်ဆောင်နေသည်ကို ပြင်းထန်စွာ ကန့်ကွက်သည်ဟု ပရာဒေါင်းဆွေမျိုးစု ဥက္ကဌ ခွန်းအောင်နိုင်စိုးက မဲခေါင်ကို မတ် ၂၃ ရက်တွင် ပြောသည်။
“သတ္တုမတူးခင် နယ်မြေခံလူထုသဘောထားကို အရင်ဆုံးရယူပြီး ခွင့်ပြုချက်ရမှ လုပ်နိုင်တာ၊ ခုက လုပ်ပိုင်ခွင့်လုပ်ရမှ လူထုကို လာတွေ့တာ ပြောင်းပြန်ကြီးဖြစ်နေတယ်။ ကျနော်တို့လူထုက တပိုင်တနိုင် လုပ်ကိုင်စားသောက်နေတာ၊ ဒါကို အင်အားကြီးနဲ့ဝင်လာပြီးလုပ်ရင် နယ်မြေခံလူထု အလုပ်အကိုင်ဆုံးရှုံးပြီး ဘဝရပ်တည်မှုတွေ ခက်ခဲမှာနဲ့ သဘာဝပတ်ဝန်းကျင် ဆိုးရွားစွာ ပျက်စီးစေမှာဖြစ်လို့ ကန့်ကွက်တာပါ” ဟု ၎င်းက ပြောသည်။
ပြီးခဲ့သည့်ထို မတ်လ ၂၀ ရက်နေ့တွင် ပရာဒေါင်းဆွေမျိုးစုနယ်မြေ၊ သိကျိတ်ကျေးရွာ၊ ငိန်းကယန်းထန်(ခ)ဦးရွှေအေး နေအိမ်တွင် လေးပွင့်ကြယ် ကုမ္ပဏီနှင့် တွေ့ဆုံညှိနှိုင်းမှု ပြုလုပ်ခဲ့ရာ သတ္ထုတူးဖော်မည့် ဧရိယာအကျယ်အဝန်း၊ လုပ်ငန်းအကော်အထည် ဖော်ဆောင်မှုပုံစံ၊ အချက်အလက်များ မေးမြန်းခဲ့သော်လည်း ကုမ္ပဏီကိုယ်စားလှယ်များက အချက်အလက်များ မသိရှိကြောင်း ပြောကြားခဲ့ပြီး သိရှိလိုပါက လေးပွင့်ကြယ် ကုမ္ပဏီ တာဝန်ရှိသူ၊ ကယန်းပြည်သစ်ပါတီ ဥက္ကဌ ဦးသန်းစိုးနိုင်နှင့် တွေ့ဆုံမေးမြန်းရန် ပြောဆိုခဲ့ကြောင်း ဖော်ပြထားသည်။
“ဦးသန်းစိုးနိုင်ပြောတာက သတ္တုထွက်တဲ့နေရာတွေမှာ ရွာတည်ခွင့် မရှိဘူး။ ရှိနေရင်လည်း ဖယ်ပေးရမယ့်သဘောမျိုး ပြောတယ်။ သူက အသင်းအဖွဲ့ဖွဲ့ဖို့နဲ့ အထောက်အပံ့ပေးမယ်လို့ပဲ ပြောတာ၊ နယ်မြေလူထုကတော့ လက်မခံဘူး” ဟု ခွန်းအောင်နိုင်စိုးက ပြောသည်။
ယင်းလေးပွင့်ကြယ်ကုမ္ပဏီသည် ၂၀၁၉ ခုနှစ်တွင် အဆိုပါ မြင်းမထိတောင်လုပ်ကွက်နေရာ၌ စက်ရုံလာဆောက်ခဲ့သော်လည်း နယ်မြေလူထုက လက်မခံခြင်း၊ ကိုဗစ်ရောဂါကြောင့် လုပ်ငန်းများရပ်ဆိုင်းခဲ့ရာမှ ယခုတွင် လုပ်ငန်းများ ပြန်လည်လည်ပတ်ရန် စတင်လုပ်ကိုင်နေခြင်းဖြစ်ကြောင်း ဒေသခံများက ပြောသည်။
၁၆၄၄ ခုနှစ်က မိုးဗြဲစော်ဘွားကြီး သခင်ကျမိုင်းမှ ပေစာနှင့်တကွ ပရာဒေါင်း(လေခူဒေါင်)ဆွေမျိုးစုသို့ ပေးအပ်ခဲ့သည့် နယ်မြေများထဲတွင် မြင်းမထိတောင်ပါရှိပြီး မြင်မထိတောင် အပါအဝင် ဖယ်ခုံမြို့နယ်အတွင်း၌ သံဖြူ (Tin)၊ ဝူဖရမ်နှင့် အခြားသတ္တုများ ထွက်ရှိကြောင်း သိရသည်။
ကုမ္ပဏီဖြစ်စေ လူပုဂ္ဂိုလ်ဖြစ်စေ သတ္ထုတူးဖော်မည့် ကိစ္စရပ်များနှင့် ပတ်သတ်၍ တွေ့ဆုံဆွေးနွေးလိုပါက ဆွေမျိုးစုနယ်မြေအတွင်းသို့ လာရောက်တွေ့ဆုံမှသာ လက်ခံတွေ့ဆုံမည်ဟု ပရာဒေါင်းဆွေမျိုးစုက သဘောထားထုတ်ပြန်ထားသည်။
#MeKongNews
#မြင်းမထိတောင်
#ပရာဒေါင်း
#သတ္တုတူး
#ဖယ်ခုံ
