မဲခေါင်၊ မတ်၁၄

ရှမ်းပြည်မြောက်ပိုင်း၊ စစ်ကောင်စီထိန်းချုပ်ထားသည့် မူဆယ်မြို့မှ ဆင်ဖြူဂိတ်ဂိတ်တာဝန်ကျ အကောက်ခွန်တာဝန်ရှိသူများသည် တရုတ်နိုင်ငံဘက်မှဝယ်ယူလာသည့် တပိုင်တနိုင်ဆွဲကုန်များကို ဖမ်းဆီးပြီး မတန်တဆစျေးနှုန်းများဖြင့် ပြန်လည်ရွေးခိုင်းနေသဖြင့် အခက်တွေ့နေကြကြောင်း ဒေသခံများထံမှ သိရသည်။

တရုတ်နိုင်ငံဘက်မှ ကန့်သတ်ထားခြင်းမရှိသည့် တန်ဖိုးနည်း အပေါ့စား ပိုက်ဆံအိတ်လို ကုန်ပစ္စည်းမျိုးကို အကောက်ခွန်ဌာနက အလေးချိန်ကျော်လွန်သည် ဆိုသည့် အကြောင်းပြချက်ဖြင့် ဖမ်းဆီးကာ ပြန်ရွေးခိုင်းခြင်းဖြစ်ကြောင်း၊ ယင်းပိုက်ဆံအိတ်၏ တန်ဖိုးမှာ ၂ ယွမ်ခွဲ (ကျပ် ၁၈၀၀) ခန့်သာ တန်ကြေးရှိသော်လည်း ဆင်ဖြူဂိတ်အကောက်ခွန်က တစ်အိတ်လျင် ကျပ် ၃၀၀၀ ဖြင့် ပြန်ရွေးခိုင်းကြောင်း၊ အိတ်အားလုံးအတွက် ကျပ် ၂သိန်းခွဲဖြင့်ရွေးရကြောင်း ဒေသခံတစ်ဦးက ပြောသည်။

“ပေါစားပိုက်ဆံအိတ်လေးတွေ၊ ၁၂ ကီလိုလောက်ရှိတယ်။ လမ်းလျှောက်ပြန်သူတွေနဲ့ ထည့်ပေးလိုက်တာ၊ အကောက်ခွန်က ဖမ်းလိုက်တာ လိုက်စုံစမ်းမှသိရတယ်။ ပြန်ရဖို့ ပြောတော့ ဟိုရက်ချိန်း ဒီရက်ချိန်းနဲ့၊ ပြန်ရွေးခိုင်းတော့ တစ်အိတ်ကို ကျပ် ၃၀၀၀ သတ်မှတ်ပြီး ကျပ်နှစ်သိန်းခွဲနဲ့ ရွေးရမယ်တဲ့။ ဒီကုန်တွေက စက်ပစ္စည်းလည်း မဟုတ်ဘူး။ တားမြစ်ထားတာလည်း မရှိဘူး။ ခုက ဖမ်းချင်ရင် ဖမ်းတယ်။ ဖမ်းချင်တဲ့ရက် ဖမ်းတယ်။ ဘာဥပဒေမှ မရှိဘူး။ လုပ်ချင်တိုင်း လုပ်နေကြတာ” ဟု ဒေသခံတစ်ဦးက ပြောသည်။

ယင်းသို့ ဖမ်းဆီးသည့်အတွက် သယ်ယူခ၊ ပစ္စည်းအရင်းနှင့် ရွေးယူခပါ ပေါင်းလိုက်ပါက မူလတန်ဖိုး၏ ၃ ဆခန့် တန်ဖိုးမြင့်တက်သွားပြီး လက်လုပ်လက်စားများ အရှုံးနှင့်ရင်ဆိုင်နေကြရကြောင်း ဒေသခံများက ပြောသည်။

တရုတ်မှ ကုန်ပစ္စည်းများကို တပိုင်တနိုင် လမ်းလျှောက်သယ်ယူပြီး ဝင်ငွေရှာဖွေနေသူများထဲတွင် စစ်ဘေးရှောင်များလည်း ပါဝင်ပြီး ယင်းသို့ မူဆယ်တာဝန်ကျ အကောက်ခွန်ရုံးအပါအဝင် ဌာနစုံမှ တပိုင်တနိုင်သယ်ယူသူများကို မကြာခဏဖမ်းဆီးနေသည့်အတွက် အခက်ကြုံနေရကြောင်း မူဆယ်ရောက် စစ်ဘေးရှောင်တစ်ဦးက ပြောသည်။

“အလုပ်မရှိလို့ စားဖို့တပိုင်တနိုင်လေး လမ်းလျှောက်သယ်တာကို ဖမ်းနေတာ။ ရတာက တစ်သောင်းလောက်ပဲရတာ၊ ဒါလည်း ဖမ်းချင်သလို ဖမ်းနေတာ၊ လျော်ရတာလည်း မတတ်နိုင်ဘူး။ ကားနဲ့သယ်တာတွေကြတော့ မဖမ်းဘူး။ မရှိလို့ လုပ်စားတဲ့သူတွေကို နိုင်ငံသားချင်း နှိပ်စက်နေတာ၊ တရုတ်ဘက်ကတောင် ဒီအသေးအဖွဲလေးတွေကို ပြောကို မပြောတာ” ဟု ၎င်းက ပြောသည်။

တရုတ်နိုင်ငံကြယ်ဂေါင်ဘက်မှ မြန်မာနိုင်ငံ မူဆယ်ဘက်သို့ စက်ပစ္စည်းများနှင့် လျှပ်စစ်ပစ္စည်းများတင်ပို့မှုကို ကန့်သတ်ထားဆဲဖြစ်သော်လည်း လူသုံးကုန်၊ အလှကုန်နှင့် အဝတ်အစားများကို မူဆယ်မြို့ ဆင်ဖြူဂိတ်မှ တပိုင်တနိုင် လမ်းလျှောက်သယ်ယူခွင့်ပြုထားခြင်းဖြစ်ပြီး ယင်းအပေါ် မူဆယ်တာဝန်ကျ အကောက်ခွန်ဝန်ထမ်းများ ဖမ်းဆီးကာ ငွေဖြင့် ပြန်ရွေးခိုင်းနေခြင်း ဖြစ်သည်။

#MeKongNews
#မူဆယ်
#ဆင်ဖြူဂိတ်
#အကောက်ခွန်
#ငွေညှစ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)