မဲခေါင်၊ မတ် ၁၀
ရှမ်းပြည်အရှေ့ပိုင်း၊ မိုင်းဆတ်မြို့နယ်အတွင်းမှ မှောင်ခိုသစ်ကားများ ညစဉ် ထွက်နေပြီး လမ်းရှိဂိတ်များတွင် တစ်စီးလျှင် ကျပ်သိန်း ၂၁၀ မှ ကျပ်သိန်း ၃၀၀ ကြားပေးဆောင်ရကြောင်း ဒေသခံများထံမှ သိရသည်။
မိုင်းတုံမြို့နယ်၊ မိုင်းကန်အုပ်စုဘက်၊ သံလွင်အရှေ့ဘက်ကမ်းတစ်လျှောက်နှင့်၊ မိုင်းဆတ်၊ နမ့်စင်ချောင်းဒေသမှ ထွက်သည့် သစ်များကို မိုင်းဆတ် – မိုင်းခုတ် – တာချီလိတ် လမ်းကြောင်းအတိုင်းသယ်ဆောင်သွားခြင်းဖြစ်ပြီး မိုင်းဆတ်နှင့် မိုင်းခုတ်တို့တွင် ဌာနဆိုင်ရာအားလုံးကို လမ်းကြေး သိန်း ၁၁၀ ရှင်းရကြောင်း သတင်းရင်းမြစ်တစ်ဦးက မဲခေါင်ကိုပြောသည်။
“ဒါက အတိအကျသိရတဲ့ဂိတ်တွေပေါ့။ တချို့ကြုံရင်ကြုံသလိုရှင်းရတဲ့ ဂိတ်တွေလည်းရှိသေးတယ်။ တစ်စီးကို ကျပ်သိန်း ၂၁၀ နဲ့ ကျပ် သိန်း ၃၀၀ကြား ကုန်တယ်။ ၇ရက်နေ့(မတ်လ) ညပိုင်းက ၁၀ဘီးကားနဲ့ ၃စီးထွက်သွားတယ်” ဟု ၎င်းကပြောသည်။
ခိုးထုတ် သစ်များမှာ တရုတ်မှ စျေးကောင်းပေးဝယ်သည့် ပိတောက်နှင့် ကျွန်းသစ်များဖြစ်ပြီး တာချီလိတ်ကိုဖြတ်ကာ မဲခေါင်မြစ်ကြောင်းမှတဆင့် တရုတ်နိုင်ငံအတွင်းသို့ တင်ပို့ရောင်းချသည်လည်းရှိသလို နမ့်စင်ချောင်းအတိုင်း မိုင်းဆတ်အထိသွားကာ မိုင်းခုတ်ဗျူဟာလမ်းမှတဆင့် မိုင်းပျဉ်း – မိုင်းယောင်းကို ကားဖြင့်ဖြတ်ပြီး တရုတ်နိုင်ငံအတွင်း တင်ပို့ရောင်းချသည်လည်းရှိကြောင်း ဒေသခံများထံမှ သိရသည်။
မိုင်းဆတ်မြို့နယ်အတွင်း သစ်ခိုးထုတ်မှုကြောင့်လမ်းပျက်သွားသော်လည်း လမ်းကိုပြန်မပြုပြင်ပေးကြောင်း၊ သစ်တောဌာနအပါအဝင် အာဏာပိုင်များနှင့် သစ်မှောင်ခိုသမားများ စိတ်တိုင်းကျခိုးထုတ်နေကြောင်း မိုင်းဆတ်ဒေသခံတစ်ဦးက ပြောသည်။
နမ့်စင်ချောင်းဘက်မှာ တရားမဝင်ကျွန်းသစ်တွေ၊ ပိတောက်တွေ ခိုးထုတ်နေတာပါ။ အခုချိန်ထိလည်း ခိုးထုတ်နေကြပါတယ်။ နိုင်ငံတော်အတွက်လည်း အကျိုးမရှိပါဘူး။ မိုင်းဆတ်ပြည်သူတွေအတွေက်လည်း အကျိုးမရှိဘဲ ဒေသအာဏာပိုင်အဖွဲ့တွေနဲ့ ပေါင်းပြီးလုပ်စားနေကြတာပါ ဟု ၎င်းကပြောသည်။
ရှမ်းပြည်အရှေ့ပိုင်း၊ မိုင်းတုံမြို့နယ်နှင့် မိုင်းဆတ်မြို့နယ်အတွင်းတွင် ၂၀၂၁ ခုနှစ် စစ်အာဏာသိမ်းပြီးနောက်ပိုင်း သဘာဝပတ်ဝန်းကျင် ထိခိုက်စေသည့် ရွှေတူးဖော်ခြင်း၊ သတ္တုတူးဖော်ခြင်းနှင့် တရားမဝင်သစ်ထုတ်ခြင်းလုပ်ငန်းများ အရှိန်အဟုတ်ဖြင့် များပြားလာပြီး တရားမဝင် ဝင်ရောက်လာသည့် တရုတ်နိုင်ငံသားများနှင့် ဒေသအာဏာပိုင်များ၊ ပြည်သူ့စစ်များ ပူးပေါင်းလုပ်ဆောင်နေခြင်းဖြစ်ကြောင်း ဒေသခံများထံမှ သိရသည်။
ဇော်မြင့်
#MeKongNews
#ရှမ်းအရှေ့
#သစ်ခိုးထုတ်
#တရုတ်
#လိုင်းကြေး
