မဲခေါင်၊ဖေဖော်ဝါရီ ၂၃
ယခုလ ၁၆ ရက်မှ ၂၂ ရက်အထိ တစ်ပတ်အတွင်း ရှမ်းပြည်နယ်၌ ကျပ်သိန်း ၄၇၉၀ တန်ဖိုးရှိ မူးယစ်ဆေးဝါးများအား စစ်ကောင်စီလက်အောက်ခံ ရဲနှင့် မူးယစ်ဆေးဝါး တားဆီးနှိမ်နင်းရေးတပ်ဖွဲ့က ဖမ်းဆီးခဲ့သည်။
မနေ့က(ဖေဖော်ဝါရီ ၂၂ ရက်) နေ့လယ် ၁ နာရီခန့်တွင် ရှမ်းပြည်အရှေ့ပိုင်း၊ တာချီလိတ်မြို့နယ်၊ ပါကွေ့(အောက်)ကျေးရွာအနီး ဘာဘင်(ခ)အားဘူ ဆိုသူ မောင်းနှင်လာသည့် မော်တော်ဆိုင်ကယ်ပေါ်၌ ကျပ် ၁၆၈ သိန်းတန်ဖိုးရှိ ဘိန်းစိမ်း အလေးချိန် ၂၄ ကီလိုအား ဖမ်းဆီးရမိခဲ့သည်။
ယခုလ ၂၁ ရက်၊ နံနက်ပိုင်းတွင်လည်း ရှမ်းပြည်အရှေ့ပိုင်း၊ တာချီလိတ်မြို့၊ ဝိန်းကျောက်ရပ်ကွက်၊ အာခါဈေးလမ်း၌ စိုင်းကျော်(ခ)အိုက်စိုင်းဆိုသူ မောင်းနှင်လာသည့် မော်တော်ဆိုင်ကယ်ပေါ်၌ ကျပ်သိန်း ၅၂ သိန်း တန်ဖိုးရှိ ဘိန်းဖြူ အလေးချိန် ၃၅၀ ဂရမ်အား ဖမ်းဆီးရမိခဲ့သည်။
၎င်းနေအိမ်၌ရှာဖွေရာ စိုင်းမောင်စိုင်း ဆိုသူနှင့်အတူ ကျပ်သိန်း ၃၀၀ တန်ဖိုးရှိ အိုက်စ်(မက်သ်အဖက်တမင်း)အလေးချိန် ၃ ကီလိုအား ထပ်မံဖမ်းဆီးရမိသည်။
ယခုလ ၂၁ ရက်တွင်ပင် ညနေပိုင်း၌ ရှမ်းပြည်အရှေ့ပိုင်း၊ ကျိုင်းတုံမြို့နယ်၊ ၀မ်တာပုံကျေးရွာအနီး မိုင်းခတ်မြို့ဘက်မှ ကျိုင်းတုံမြို့ဘက်သို့ စိုင်းရီသန်းဆိုသူ မောင်းနှင်လာသည့် မော်တော်ယာဉ်ပေါ်၌ ကျပ်သိန်း ၄၀၀၀ တန်ဖိုးရှိ အိုက်စ်(မက်သ်အဖက်တမင်း)အလေးချိန် ၅၀ ကီလိုအား ဖမ်းဆီးရမိခဲ့သည်။
ယခုလ ၂၀ ရက်၊ နေ့လယ်ပိုင်းတွင်လည်း ရှမ်းပြည်၊ တောင်ကြီးမြို့ဘက်မှ ရန်ကုန်မြို့သို့ပို့ဆောင်မည့် ကျပ်သိန်း ၃၀၀ တန်ဖိုးရှိ စိတ်ကြွရူးသွပ်ဆေးပြား ၂၀,၀၀၀ ပြားအား လွမ်းဝေထွန်း ဆိုသူနှင့်အတူ သာစည်မြို့နယ်၊ ကျွဲတပ်ဆုံစစ်ဆေးရေးဂိတ်၌ ဖမ်းဆီးရမိခဲ့သည်။
မူးယစ်ဆေးဝါးများနှင့်အတူ ဖမ်းဆီးရမိသူများအား သက်ဆိုင်ရာနယ်မြေရဲစခန်းများတွင် အမှုဖွင့်ထားပြီး စိတ်ပြောင်းစေသော ဆေးဝါးဥပဒေများနှင့် အရေးယူသွားမည်ဟု CCDAC Myanmar က ထုတ်ပြန်သည်။
ယခုတပတ် မြန်မာနိုင်ငံ ဒေသအသီးသီးသို့ဝင်ရောက်မည့် မူးယစ်ဆေးဝါးများသည် ရှမ်းပြည်အရှေ့ပိုင်းမှ အဓိကထွက်ရှိနေသော်လည်း ရောင်းဝယ်သုံးစွဲသူများကိုသာ စစ်ကောင်စီက ဖမ်းဆီးနေပြီး ထုတ်လုပ်နေသူများအား ဖမ်းဆီးနိုင်ခြင်း မရှိပေ။
မဲခေါင်မှ စောင့်ကြည့်ထားသောစာရင်းများအရ ပြီးခဲ့သည့် ဖေဖော်ဝါရီ ၁ ရက်နေ့မှ ၁၅ ရက်အထိ ရှမ်းပြည်နယ်တဝှမ်း ကာလငွေကျပ်သိန်းပေါင်း ၁၁၁ ဒသမ ၆ ဘီလီယံအား စစ်ကောင်စီက ဖမ်းဆီးခဲ့သည်။
ဂနိုက်
#MeKongNews
#မူးယစ်ဆေး
#တောင်ကြီး
#ကျိုင်းတုံ
#တာချီလိတ်
