UAB pay ဖြင့်ကျောင်းအပ်လက်ခံသည့်စနစ်သည် လွယ်ကူချောမွေ့ခြင်းမရှိသည့်အပြင် ကျောင်းသားများ စစ်မှုထမ်းရေးအထိ သက်ရောက်မှုရှိနိုင်
မဲခေါင်၊ ဖေဖော်ဝါရီ ၂၀
စစ်ကောင်စီက တက္ကသိုလ်ကျောင်းအပ်နှံခြင်း လွယ်ကူလျင်မြန်စေရန်ဟုဆိုကာ ကျောင်းအပ်ခငွေ ပေးချေခြင်းကို အွန်လိုင်းစနစ်သို့ ပြောင်းလဲလိုက်သော်လည်း လွယ်ကူလျှင်မြန်ခြင်းမရှိပဲ ယခင်ကထက် ပိုမိုကြန့်ကြာနေကြောင်းသိရသည်။
ထိုစနစ်သည် ကျောင်းသားများ စစ်မှုထမ်းရေးအတွက် အချက်အလက်များရရှိစေရန် ရည်ရွယ်ခြင်းဖြစ်နိုင်သည်ဟုသတင်းအရင်းအမြစ်တချို့ကသုံးသပ်ကြသည်။
စစ်ကောင်စီသည် သူ့လက်အောက်ခံ တက္ကသိုလ်ကျောင်းများ၌ ကျောင်းအပ်ရာတွင် ကျောင်းအပ်ခငွေပေးချေမှု လွယ်ကူလျင်မြန်စေရန်ဟုဆိုကာ UAB pay ဖြင့် ပေးဆောင်နိုင်ရန် စီစဉ်ခြင်းဟုသော်လည်း ပြောင်းလဲလိုက်သည့် ကျောင်းအပ်မှုပုံစံနှင့် အွန်လိုင်းငွေပေးချေမှုစနစ် အသုံးပြုပုံကို ကျောင်းအပ်နှံသူများထံ ကြိုတင်အသိပေးခြင်းများ မရှိသည့်သဖြင့် အခက်အခဲကြုံတွေ့နေရကြောင်း ကျောင်းအပ်နှံသည့် ကျောင်းသားတစ်ဦးက ပြောသည်။
“ ဒီတိုင်းပဲ ပုံမှန်ကျောင်းအပ်သလိုဘဲ ထင်ပြီး သူငယ်ချင်းတွေနဲ့ သွားကြတာ၊ ဟိုရောက်မှ အကောင့်ရှိမှ အပ်ရမယ် ဘာညာ ဖြစ်ကုန်တော့ ကျွန်တော်က ဆက်မအပ်ပဲ လှည့်ပြန်လိုက်တယ်၊ သူတို့တွေ(ဘဏ်ဝန်ထမ်း)က နှစ်ယောက်လောက်နဲ့ ဖွင့်ပေးတယ်၊ လူများတော့ မနိုင်ပဲ လူတွေ စုပြုံနေတာပဲ”ဟု သူက ပြောသည်။
အလားတူ UAB Pay သည် ကျောင်းသားအများစု အသုံးပြုနေသည့် Kpay၊ wave pay နှင့် နှိုင်းယှဉ်လျင် မြန်မာနိုင်ငံအနှံ့ တွင်ကျယ်သည့် အွန်လိုင်းငွေပေးချေမှု App မဟုတ်သဖြင့် ကျောင်းအပ်မှုကို UAB Pay တခုတည်းသာ အသုံးပြု၍ ကျောင်းအပ်နှံရခြင်းသည်လည်း ပိုမိုကြန့်ကြာစေခြင်းဖြစ်သည်။
ပြောင်းလဲလိုက်သည့် ကျောင်းအပ်စနစ်သည် ပုံမှန် ကိုယ်ပိုင်အုပ်ချုပ်ခွင့်ရတက္ကသိုလ်များတွင် ကျောင်းသားများ၏ အချက်အလက်များကို သိမ်းဆည်းထားသည့်သဘော ဖြစ်နိုင်သော်လည်း အစိုးရမှ တက္ကသိုလ်များအားလုံးကို ထိန်းချုပ်ထားသည့်အခြေအနေတွင် ကျောင်းသားများ၏ အချက်အလက်ကို လက်ခံစုဆောင်းထားခြင်းသည်မဖြစ်သင့်ကြောင်း တောင်ကြီးတက္ကသိုလ်ကျောင်းသားသမဂ္ဂရဲဘော်တစ်ဦးက ပြောသည်။
“ အစိုးရတစ်ခုက ပြည်တွင်းရှိ တက္ကသိုလ်အကုန်လုံးကို ထိန်းချုပ်ပြီး လုပ်တာဆိုတော့လေ ကျောင်းသားတွေရဲ့ data အချက်အလက်တွေ အသေးစိတ် ရယူယုံမကဘူး၊ ကျောင်းတက်ကာလအတွင်း စစ်သင်တန်းတွေ၊ ကျောင်းပြီးရင် စစ်မှုထမ်းတွေ အဲလောက်အထိပါ သက်ရောက်မှုရှိလာမယ်လို့ထင်တယ်” ဟု ပြောသည်။
စစ်ကောင်စီလက်အောက်ခံ ပညာရေးဝန်ကြီးဌာနမှ အဝေးသင်တက္ကသိုလ်ကျောင်းအပ်နှံမှုကို နှစ်အလိုက် ပထမနှစ် ကျောင်းအပ်မှုကို ၂၀၂၄ ခုနှစ် ဒီဇင်ဘာလ ၂၆ ရက်မှ ၂၀၂၅ခုနှစ် ဧပြီလ ၃၀ ရက်အထိ သတ်မှတ်ထားပြီး ဒုတိယနှစ်နှင့်အထက် ကျောင်းအပ်မှုကို ၂၀၂၅ ခုနှစ် ဖေဖော်ဝါရီလ ၅ ရက်မှ မေလ ၁၆ ရက်အထိ လက်ခံကြောင်း ထုတ်ပြန်ထားသည်။
ယူနိုက်တက်အမရာဘဏ် (UAB Bank) ပိုင်ရှင် ဦးနေအောင်သည် စစ်ကောင်စီ၏ ကာကွယ်ရေးဦးစီးချုပ်(ရေ)ဟောင်းဖြစ်သူ ဗိုလ်ချုပ်ကြီးမိုးအောင်၏ ညီဖြစ်သည်။ ၎င်းတို့၏ ဖခင်ဖြစ်သူ ဒုတိယဗိုလ်မှူးကြီးအောင်သောင်းသည် နအဖ စစ်အစိုးရလက်ထက်တွင် စီးပွားကူးသန်းဝန်ကြီးဌာန၏ ဒုဝန်ကြီးနှင့် စက်မူ (၁) ဝန်ကြီးဌာန၏ ဝန်ကြီးလည်းဖြစ်သည်။
UAB Bank ပိုင်ရှင် ဦးနေအောင်သည် စစ်ခေါင်းဆောင်မင်းအောင်လှိုင်တည်သည့် မာရဝိဇယရုပ်တုတွင် သိန်းငါးထောင်ထည့်ဝင်လှူဒါန်းခဲ့သည့်အပြင် စစ်ကောင်စီမှ ရောင်းချသည့် ငွေတိုက်စာချုက်ကို ရောင်းချပေးခဲ့သည့် ဘဏ်လည်းဖြစ်သည်။
သုဝဏ္ဏခွန်
#MeKongNews
