မဲခေါင်၊ ဖေဖော်ဝါရီ ၁၁
ရှမ်းပြည်တောင်ပိုင်း၊ တောင်ကြီးမြို့နှင့် ညောင်ရွှေမြို့များသို့ စစ်ဘေးရှောင်ရောက်ရှိနေကြသည့် ပြည်သူများ အိမ်ငှားခဈေးနှုန်းမြင့်တက်လာခြင်းနှင့် ဝင်ငွေနည်းပါးခြင်း၊ စစ်ကောင်စီလက်အောက်ခံ အုပ်ချုပ်ရေးပိုင်းက နေထိုင်ခွင့်တားမြစ်ခြင်းများကြောင့် ရပ်တည်ရေးခက်ခဲလာကြောင်း သိရသည်။
ကရင်နီပြည်၊ လွိုင်ကော်မြို့သိမ်းတိုက်ပွဲ တစ်လေးလုံး(၁၁၁၁)စစ်ဆင်ရေးနှင့် ၁၀၂၇ စစ်ဆင်ရေးဒုတိယလှိုင်း ရှမ်းမြောက်လားရှိုးမြို့သိမ်းတိုက်ပွဲစတင်ပြီးနောက် ညောင်ရွှေနှင့် တောင်ကြီးမြို့သို့ စစ်ဘေးတိမ်းရှောင်လာသူဦးရေ ပိုမိုများပြားလာခဲ့ပြီး ယခင် ၆ သောင်းဝန်းကျင်သာ ပေးရသည့် အခန်းတစ်ခန်း ငှားရမ်းခသည် ယခုတွင် ကျပ်တစ်သိန်းခွဲဝန်းကျင်၊ ယခင်က ကျပ်လေးသိန်းခွဲသာ ရှိသော အိမ်ငှားခသည် ယခု ကျပ်ရှစ်သိန်းဝန်းကျင်အထိ အိမ်ငှားခ နှစ်ဆမြင့်တက်လာသဖြင့် နေထိုင်ရပ်တည်ရေး ခက်ခဲလာကြောင်း တောင်ကြီးမြို့၌ စစ်ရှောင်နေသူတစ်ဦးက မဲခေါင်ကိုပြောသည်။
“လားရှိုးနဲ့ ရှမ်းမြောက်စစ်ရှောင်တွေ လာပြီးကတည်းက အဲ့လိုတက်သွားတာ၊ တောင်ကြီးမှာ အလကားပေးမနေတော့တာက ကြာပြီလေ၊ စစ်ရှောင်တွေက အိမ်ခန်းလိုက်ငှားနေရတယ်၊ ရတဲ့ လစာကလည်း အိမ်လခ တစ်လစာတောင် မရှိဘူးဆိုတော့ ခက်တာပေါ့” ဟု ပြောသည်။
အလားတူ ညောင်ရွှေမြို့ရှိ ဘုန်းကြီးကျောင်းများအနေဖြင့် စစ်ဘေးရှောင်များကို ဆက်လက် လက်ခံထားခြင်း မပြုရန်နှင့် စစ်ဘေးရှောင်များ မတ်လအကုန်တွင် ပြောင်းရွှေ့ကြရန် ထွေအုပ်မှ ဖိအားပေးနေပြီ ဖြစ်သည်။
သူက “လွိုင်ကော် အိမ်ကလည်း မီးလောင်ထားတော့ တဲလေးထိုးပြီးနေမယ်ပေါ့ စဉ်းစားနေတာ၊ မနေ့ရှေ့တရက်က အိမ်နားမှာ တိုက်ပွဲဖြစ်တယ်တဲ့၊ ဖြစ်တော့ ကျွန်တော်တို့ အိမ်နားက မလောင်ဘဲ ကျန်နေတဲ့ အိမ်နှစ်လုံးလည်း ပါသွားတယ်၊ အဲတော့ ပြန်နေရင်တောင်မှ ဘယ်ချိန်လက်နက်ကြီးကျ သေမလဲမသိဘူး” ဟု ပြောသည်။
ဘုန်းကြီးကျောင်း၌ ဆက်လက်နေထိုင်ခွင့် မရသဖြင့် နေရပ်ပြန်နေထိုင်မည်ဆိုပါကလည်း လုံခြုံမှု မရှိသလို အိမ်ငှါးနေထိုင်ရန်လည်း တစ်လရရှိသည့် လုပ်ခလစာ ကျပ်နှစ်သိန်းဝန်းကျင်သည် အိမ်ငှားတစ်လစာပင် မရှိကြောင်း ၎င်းကပြောသည်။
“အိမ်ငှားမယ်ဆိုတော့လည်း လစာရတာမှ နှစ်သိန်း အိမ်ငှားခဖိုးတောင် မရှိဘူး၊ စားစရိတ်နဲ့ သက်ကြီးရွယ်အိုနဲ့ ဆေးဝါးစရိတ်နဲ့ ပြောစရာတောင် မကျန်တော့ဘူး” ဟု ပြောသည်။
ရှမ်းပြည်၊ ကရင်နီပြည်အတွင်း စစ်ပွဲများကြောင့် ဒေသခံများအနေဖြင့် စစ်မက်ကင်းသော တခြားမြို့ရွာများသို့ တိမ်းရှောင်နေထိုင်သူများရှိသလို တောတောင်အတွင်း ခိုအောင်းနေသူများလည်း ရှိနေကြသည်။
သုဝဏ္ဏခွန်
#MeKongNews
#တောင်ကြီး
#ညောင်ရွှေ
#အိမ်လခဈေးကြီး
#ရပ်တည်ရေးခက်ခဲ
