မဲခေါင်၊ ဇန်နဝါရီ ၂၆
ရှမ်းပြည်အရှေ့ပိုင်းမြို့တွေမှာ မကြာခင်ကထုတ်ပြန်ထားတဲ့ ပြည်သူ့စစ်မှုထမ်းနည်းဥပဒေအရ စစ်ကောင်စီရဲ့ ကြံ့ဖွံ့ပါတီဝင် အပြာနုရောင် ယူနီဖောင်းတွေ ဝတ်ဆင်ကြပြီလို့ နီးစပ်သူတွေထံက သိရပါတယ်။
ဇန်နဝါရီ ၂၃ ရက်က စစ်ကောင်စီသူ့သဘောနဲ့သူ ရေးဆွဲထုတ်ပြန်တဲ့ ပြည်သူ့စစ်မှုထမ်းနည်းဥပဒေကို ထောက်ခံကြိုဆိုကြောင်း သက်သေပြတဲ့အနေနဲ့ဝတ်ဆင်တာလို့ ရှမ်းအရှေ့ကျိုင်းတုံက ကြံ့ဖွံ့ပါတီနဲ့နီးစပ်သူတစ်ဦးက ပြောပါတယ်။
“အမတ်တွေရော မြို့နယ်အဆင့်တွေ ၁၀ ဦး ယူနီဖောင်းဝတ်ရတယ်၊ ရာထူးအဆင့်တွေတော့ မပေးဘူး၊ လစာလည်းရတယ်” လို့ ကျိုင်းတုံ ကြံ့ဖွံ့မိသားစုဝင်တစ်ဦးက ပြောပါတယ်။
လစာအနေနဲ့ ကျပ်နှစ်သိန်းတစ်သောင်း(ကျပ်၂၁၀၀၀၀) ပေးကြောင်းနဲ့ တပ်ဖွဲ့ထဲဝင်ချင်သူ အသက် ၆၀ ကျော်တွေလည်း ထုတ်ပေးတဲ့ရိက္ခာတွေကို ရောင်းပြီး ယူနီဖောင်းဝယ်ဝတ်ကြတယ်လို့ ပြောပါတယ်။
အလားတူ ရှမ်းပြည်တောင်ပိုင်း မိုင်းပန်က စစ်သင်တန်းတက်နေတဲ့ ကြံ့ဖွံ့ပါတီဝင်တွေလည်း အပြာနုရောင်ယူနီဖောင်းတွေ ဝတ်တာတွေ့ရတယ်လို့ သိရပါတယ်။
“အသက်ကြီးတွေဗျ၊ အပေါ်က အနွေးထည်ဝတ်ထားတော့ လက်မောင်းဘာတံဆိပ်တပ်လဲ မသိရဘူး၊ ဘာတဲ့ သူ့လူကိုယ့်ဘက်သားဆိုလား ပြောသံကြားတယ်” လို့ မိုင်းပန်ဒေသခံတစ်ဦးက မဲခေါင်ကို ပြောပါတယ်။
အခုပြဋ္ဌာန်းလိုက်တဲ့ ဥပဒေဟာ ပြီးခဲ့တဲ့ ၂၀၂၄ ခုနှစ်၊ ဖေဖော်ဝါရီလအတွင်းက ပြဋ္ဌာန်းခဲ့တဲ့ ပြည်သူ့စစ်မှုထမ်းဥပဒေရဲ့ နည်းဥပဒေဖြစ်ပြီး ဇန်နဝါရီလ ၂၃ ရက်နဲ့ ၂၄ ရက်က နေပြည်တော်မှာ ပြုလုပ်တဲ့ စစ်ကောင်စီရဲ့ အမျိုးသား စည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ NSPNC နဲ့ တွေ့ဆုံပွဲမှာ စစ်မှုထမ်းအရေအတွက် တိုးမြှင့်ခေါ်ယူဖို့ နိုင်ငံရေးပါတီတွေက အကြံပြုဆွေးနွေးခဲ့တယ်လို့ စစ်ကောင်စီက ဇန်နဝါရီ ၂၄ ရက်မှာ ထုတ်ပြန်ထားပါတယ်။
MK-012
#MeKongNews
#ရှမ်းအရှေ့
#ကြံ့ဖွံ့ပါတီ
#အပြာနုရောင်
#ယူနီဖောင်း
