မဲခေါင်၊ ဇန်နဝါရီ ၂၅
ရှမ်းပြည်မြောက်ပိုင်း၊ ကျောက်မဲမြို့ကို စစ်ကောင်စီက လေးကြိမ်မြောက်အဖြစ် ဒီနေ့(ဇန်နဝါရီလ ၂၅) နေ့လည် ၁ နာရီ ၂၅ မိနစ်ခန့်က ဗုံးသုံးလုံးကြဲချခဲ့တယ်လို့ ကျောက်မဲခရိုင်တပ်ရင်းက မဲခေါင်ကိုပြောပါတယ်။
ဗုံးသုံးလုံးကြဲချခဲ့ရာမှာ ကျောက်မဲမြို့ဆေးရုံ သားဖွားမီးယပ်ကုသဆောင်ပေါ်ကို တစ်လုံး၊ ဆေးရုံရှေ့ ကွင်းပြင်ပေါ် တစ်လုံး ကျရောက်ပေါက်ကွဲခဲ့ပြီး ကျန်တစ်လုံးကျရောက်ပေါက်ကွဲတဲ့နေရာနဲ့ လူထိခိုက်မှုအခြေအနေတွေကို အတည်ပြုလို့ မရသေးပါဘူး။
စစ်ကောင်စီက ဇန်နဝါရီ ပထမပတ်ထဲမှာ အေးရှားဝေါ စက်ရုံအနီး တတိယအကြိမ်အဖြစ် ဗုံးကြဲခဲ့ပါသေးတယ်။
ဒုတိယအကြိမ် အဖြစ် ၂၀၂၄ ခုနှစ်၊ နိုဝင်ဘာ ၃၀၊ ညနေ ၆ နာရီခွဲဝန်းကျင်က ကျောက်မဲမြို့၊ အင်ကြင်းတောင်ရပ်ကွက်ကိုဗုံးကြဲခဲ့တာကြောင့် အောင်ဆုပန်ကျောင်းတိုက်မှ ကိုရင်တစ်ပါးနဲ့ ဒေသခံ ခြောက်ဦး နေရာတွင်ပင် သေဆုံးခဲ့ကာ ပြင်းထန်ဒဏ်ရာရရှိသူက ၁၂ ဦး ရှိခဲ့ပါတယ်။ ဒဏ်ရာရရှိသူတွေထဲမှ ဆေးရုံအရောက် နှစ်ဦး သေဆုံးခဲ့ပါတယ်။ ပြင်းထန်ဒဏ်ရာနဲ့ဆေးရုံးမှာ ဆေးကုသမှုခံယူနေတဲ့ ဦးအိုက်စံမှာ ဒီဇင်ဘာ ၅ ရက်မှာ ထပ်မံသေဆုံးခဲ့တာကြောင့် စုစုပေါင်းသေဆုံးသူ ကိုးဦးအထိ ရှိလာခဲ့ပါတယ်။ ဗုံးထိမှန်ပြီး အိမ် ၂၀ အဆိုးရွားဆုံး ထိခိုက်ပျက်စီးဆုံးရှုံးခဲ့ပြီး အပေါ်ပိုင်းထိခိုက်ပျက်စီးခဲ့တဲ့နေအိမ် ၂၈ လုံးရှိခဲ့တယ်လို့ သိရပါတယ်။
ပထမအကြိမ်အဖြစ် ၂၀၂၄ ခုနှစ်၊ ဇွန် ၃၀၊ ည ၁၂ နာရီက ဂျက်ဖိုက်တာနဲ့ ပေါင် ၅၀၀ ဗုံးကြဲခဲ့တုန်းကလည်း အမျိုးသမီးတစ်ဦး သေဆုံးကာ ဘုန်းကြီးကျောင်း အပါအဝင် နေအိမ် ၂၀ ခန့် ပျက်စီးပြီး ဆီဆိုင်တစ်ဆိုင် မီးလောင်ခဲ့ပါတယ်။
စစ်ကောင်စီရဲ့ အမှတ်(၁) စစ်ဆင်ရေးကွပ်ကဲမှုဌာနချုပ် စကခ(၁) အခြေစိုက်တဲ့ ကျောက်မဲမြို့ကို သြဂုတ် ၆ ရက်မှာ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) က သိမ်းပိုက်ခဲ့တာပါ။
MK – 016
#MeKongNews
#ကျောက်မဲမြို့
#လေးကြိမ်မောက်ဗုံးကြဲ
#သားဖွားဆောင်
#ဗုံးသုံးလုံး
