မဲခေါင်၊ ဇန်ဝါရီ ၁၈
ရှမ်းပြည်တောင်ပိုင်း၊ ဆီဆိုင်မြို့အရှေ့ခြမ်းကို စစ်ကြောင်းထိုးလာတဲ့ စစ်ကောင်စီ နဲ့ပအို့ဝ်အမျိုးသားလွတ်မြောက်ရေးတပ်မတော် PNLA မနေ့က တိုက်ပွဲဖြစ်ပွားခဲ့ရာ စစ်ကောင်စီဘက်က အင်အား ၁၃၀ ခန့်သေဆုံးကြောင်း PNLA က ဒီနေ့သတင်းထုတ်ပြန်ပါတယ်။
စစ်ကောင်စီက အင်အား ၅၀၀ ခန့်ကို စစ်ကြောင်း လေးကြောင်းခွဲကာ ထိုးစစ်ဆင်လာတာလို့ ထုတ်ပြန်ချက်မှာ ဖေါ်ပြထားပါတယ်။
စစ်ကောင်စီဟာ လေယာဉ်နဲ့ ပစ်ကူပေးပြီး မြေပြင်မှာ ပအို့ဝ်ရွာသားတွေကို လူသားဒိုင်းပြုလုပ်ကာ မနေ့က (ဇန်နဝါရီလ ၁၇) ဆီဆိုင်မြို့နယ်၊ ပင်ငိုကျေးရွာ၊ နောင်ကျောကျေးရွာ၊ ဖြီကျွတ်ကျေးရွာအနီးကို စစ်ကြောင်းထိုးဝင်ရောက်လာစဉ် ပင်ငိုကျေးရွာနဲ့ နောင်ကျောကျေးရွာ အနီးမှာ တစ်နေကုန် တိုက်ပွဲဖြစ်ပွားခဲ့တာပါ။
အဲ့ဒီတိုက်ပွဲမှာ စစ်ကောင်စီနဲ့ PNO ဘက်က အင်အား ၃၀ ကျော် သေဆုံးကာ ပြန်လည်ဆုတ်ခွာသွားခဲ့ပြီး ဖြီကျွတ်ကျေးရွာအနီးက တောင်နှစ်လုံးကြားမှာ PNLA တပ်ဖွဲ့နဲ့ ထပ်မံ ပစ်ခတ်တိုက်ခိုက်မှုဖြစ်ပွားခဲ့ရာ စစ်ကောင်စီနဲ့ PNO ဘက်က ၁၀၀ ကျော် ဖြီကျွတ်ရွာတောင်ယာတဲမှာ သေဆုံးခဲ့တယ်လို့ ထုတ်ပြန်ချက်မှာ ဖေါ်ပြထားပါတယ်။
PNLA ပြောခွင့်ရ ဗိုလ်မှူးကြီး ခွန်အောင်မန်းက “စစ်ကောင်စီနဲ့ PNO က ဆီဆိုင်မြို့နယ် ပြန်လည်စိုးမိုးရေးအတွက် ထိုးစစ်ဆင်နေတဲ့အနေအထား ဖြစ်ပါတယ်” လို့ မဲခေါင်ကိုပြောပါတယ်။
တိုက်ပွဲအတွင်း စစ်ကောင်စီဘက်က သေဆုံးသူ ၈၀ ရာခိုင်နှုန်းခန့်ဟာ PNO ပအို့ဝ်ပြည်သူ့စစ်တွေဖြစ်ပြီး စစ်ကောင်စီတပ်ဖွဲ့ဝင်တွေက ၂၀ ရာခိုင်နှုန်းခန့်သာရှိတယ်လို့ PNLA က နောက်ဆက်တွဲ ဖော်ပြထားပါတယ်။
တိုက်ပွဲတွေတွင်းမှာ စစ်ကောင်စီနဲ့ PNO ဘက်က စိတ်ကြွဆေးအသုံးပြုကာ တိုက်ခိုက်ကြတယ်လို့ PNLA က ယူဆပါတယ်။
“မြေပြင်ထိုးစစ်မှာ ပအို့ဝ်လူထုကို အလှည့်ကျနဲ့စေခိုင်းတဲ့အတွက် အကျအဆုံးများနေတာလည်း တွေ့နေရပါတယ်၊ အတင်းအကြပ်ခိုင်းစေခံရတဲ့ ပအို့ဝ်ရွာသားတွေကို စိတ်ကြွဆေးကျွေးပြီး တက်ခိုင်းတဲ့ပုံစံ တွေ့နေရတယ်၊ သူတို့ခိုင်းတဲ့အတိုင်း မလုပ်ရင် ပစ်သတ်တာလည်း ကြားနေရပါတယ်” လို့ ဗိုလ်မှူးကြီးခွန်အောင်မန်းက မဲခေါင်ကိုပြောပါတယ်။
ဒီနေ့(ဇန်နဝါရီ ၁၈) မနက်ပိုင်းမှာလည်း စစ်ကောင်စီက ဆီဆိုင်မြို့နယ်၊ လွယ်ချယ်ကျေးရွာကို လေကြောင်းတိုက်ခိုက်မှု နှစ်ကြိမ်ပြုလုပ်ကာ ဗုံးသီး လေးလုံး ကြဲချခဲ့တယ်လို့ ဖော်ပြထားပါတယ်။
စစ်ကောင်စီဟာ ဆီဆိုင်မြို့အရှေ့ခြမ်းက ပအို့ဝ်ကျေးရွာတွေကို ဗုံးကြဲတာတွေ၊ လက်နက်ကြီးနဲ့ပစ်ခတ်တာတွေ ပြုလုပ်နေတာကြောင့် ဒေသခံပြည်သူ ၁၀၀၀ ကျော် တိမ်းရှောင်နေကြရပါတယ်။
ပြီးခဲ့တဲ့ ဇန်နဝါရီလ ၈ ရက်နေ့မှာ ဆီဆိုင်မြို့ ရွှေတဂူကျေးရွာအနီးက စစ်ကောင်စီတပ်နဲ့ PNO တပ်စွဲထားရာ အခြေစိုက်တပ်စခန်းကို တော်လှန်ရေးပူးပေါင်းတပ်တွေက သိမ်းယူလိုက်ပြီးနောက်မှာ စစ်ကောင်စီတပ်ဘက်က ထိုးစစ်တွေကို ဆက်တိုက်ပြုလုပ်လာတာပါ။
ဇန်နဝါရီလ ၁၃ ရက်ကလည်း စစ်ကောင်စီလက်အောက်ခံ PNO ပြည်သူ့စစ်တွေနဲ့ PNLA တပ်တွေ ဆီဆိုင်မြို့နယ် ထီစုံကျေးရွာအနီးမှာ တိုက်ပွဲဖြစ်ပွားခဲ့ပြီး PNLA တပ်ဖွဲ့ဝင် ငါးဦးကို PNO က သတ်ပစ်ခဲ့တာနဲ့ ဇန်နဝါရီလ ၁၄ ရက်မှာ ဆီဆိုင်မြို့နယ် နောင်ထောဝ်ရွာဓမ္မာရုံကို စစ်ကောင်စီက ဗုံးကြဲတိုက်ခိုက်ခဲ့ပါတယ်။
ဆီဆိုင်မြို့ကို ၂၀၂၄ ခုနှစ်၊ ဇန်နဝါရီလထဲမှာ တော်လှန်ရေးပူးပေါင်းအင်အားစုတွေက သိမ်းပိုက်ခဲ့ပြီးနောက်ပိုင်းမှာ စစ်ကောင်စီရဲ့ မြေပြင်နဲ့လေကြောင်း ပူးပေါင်းထိုးစစ်ကြောင့် တော်လှန်ရေးဘက်က ပြန်လည်လက်လွှတ်ပေးခဲ့ရပါတယ်။ လက်ရှိမှာတော့ ဆီဆိုင်မြို့ရဲ့ အရှေ့ဘက်ကမ်းနေရာတွေမှာ PNLA နဲ့ စစ်ကောင်စီတပ်တွေ တိုက်ပွဲအပြင်းအထန် ဖြစ်ပွားနေတာ သတင်းတစ်ပတ်ခန့် ကြာမြင့်နေပြီ ဖြစ်ပါတယ်။
MK – 016/MK -017
#MeKongNews
#PNLA
#PNO
#စစ်ကောင်စီ
#၁၃၀သေဆုံး
