အခုလကုန်ပိုင်း အာရှ-ပစိဖိတ်စီးပွားရေးပူးပေါင်းဆောင်ရွက်မှုထိပ်သီးအစည်းအဝေး(APEC)အပြီးမှာ ထိုင်းဝန်ကြီးချုပ် ပရာရွတ် ချန်အိုချာက မကြာသေးခင်ကမှတည်ထောင်ထားတဲ့ ရမ်ထိုင်းဆန်ချာ့တ်ပါတီ(RTSCP)ဆီ ပြောင်းလဲဖို့ရှိနေတယ်လို့ သတင်းရင်းမြစ်တွေကပြောပါတယ်။
ပါတီကူးပြောင်းဖို့ ပရာရွတ်ကို ဖိတ်ကြားထားပြီး “APEC အပြီးမှာ ဝန်ကြီးချုပ် ပါတီနဲ့ချိတ်ဆက်လာမယ်လို့ ယုံကြည်နေပါတယ်”ဆိုပြီး ပါတီသတင်းရင်းမြစ်တွေကပြောပါတယ်။
နိုဝင်ဘာ ၁၈ ရက်နဲ့ ၁၉ ရက်တို့မှာ APEC အစည်းအဝေးကျင်းပဖို့ရှိနေတာပါ။
“တကယ်လို့ သူသာပါတီနဲ့လက်တွဲဖြစ်ခဲ့ရင် ဆန်းသစ်တဲ့အပြောင်းအလဲတခုအတွက် သူ့ကို နိုင်ငံရေးသမားတယောက်ကြန်အင်လက္ခဏာတွေအတွက် ပြန်ပုံသွင်းဖို့ အရေးတကြီးလိုအပ်လာပါလိမ့်မယ်။ သူ့ရဲ့စစ်တပ်နောက်ခံပုံရိပ်ဟာလည်း နိုင်ငံရေးသမားတယောက်အနေနဲ့ သူ့ရဲ့သိသာထင်ရှားတဲ့အခန်းကဏ္ဍကို နောက်ခံရှိနေပါလိမ့်မယ်။ သူသာပါတီပြောင်းလိုက်ရင် ပါတီရဲ့လူကြိုက်များမှုကလည်း မြင့်တက်လာမှာပါ ”လို့ ပါတီသတင်းရင်းမြစ်တွေကပြောပါတယ်။
RTSCP ကို ပရာရွတ်ရဲ့အကြံပေး ဒီမိုကရတ်အမတ်ဟောင်း ပီရာပန် ဆာလီရာသာဘီဘာကာက ဦးဆောင်နေပြီး ပြီးခဲ့တဲ့နှစ်အစောပိုင်းမှာတည်ထောင်ခဲ့တဲ့ပါတီကို ပရာရွတ်ရဲ့အကြံပေးဟောင်း ဆက်ဆာကော အက်သဝေါင်က လာမယ့်အထွေထွေရွေးကောက်ပွဲအပြီးမှာ ဝန်ကြီးချုပ်အဖြစ်ပြန်အာဏာရနိုင်ဖို့ ပရာရွတ်က ဆန္ဒရှိရင် ထောက်ခံဖို့ တည်ထောင်ခဲ့တာပါ။
ပါတီပြောင်းလဲဖို့ ပရာရွတ်က ဆုံးဖြတ်ရင် ပါတီက ကြိုဆိုနေမယ်လို့ ပီရာပန်က အင်္ဂါနေ့မှာပြောပါတယ်။
ပါတီပြောင်းမယ်ဆိုရင် သူနဲ့ ပရာရွတ်ကြား အထူးတလည်ပြောစရာမရှိဘူးလို့ တနင်္လာနေ့မှာ အာဏာရ PPRP ပါတီခေါင်းဆောင်နဲ့ ဒုတိယဝန်ကြီးချုပ် ပရာဝတ် ဝမ်ဆူဝမ်က ပြောပါတယ်။
၂၀၁၉ ခုနှစ် အထွေထွေရွေးကောက်ပွဲမှာ PPRP က ပရာရွတ်ကို ပါတီပြင်ပကိုယ်စားပြုအနေနဲ့ ဝန်ကြီးချုပ်နေရာကိုပါဝင်ယှဉ်ပြိုင်စေခဲ့ပြီး ပရာရွတ်ဟာ PPRP ပါတီဝင်တယောက်မဟုတ်ခဲ့ပါဘူး။