စစ်ကောင်စီက လွတ်ငြိမ်းစာရင်းကို လိမ်လည်ထုတ်ပြန်ကာ နိုင်ငံရေးအမြတ်ထုတ်နေ
မဲခေါင်၊ ဇန်ဝါရီလ ၇
စစ်ကောင်စီဟာ လွတ်ငြိမ်းချမ်းသာခွင့်စာရင်းကို လိမ်လည်ထုတ်ပြန်တဲ့ နည်းလမ်းနဲ့ နိုင်ငံရေးအမြတ်ထုတ်နေကြောင်း နိုင်ငံရေးအကျဉ်းသားဟောင်းတွေက ဇန်နဝါရီ ၆ ရက်၊ ညနေပိုင်းမှာ သဘောထားကြေညာချက်တစ်ရပ် ထုတ်ပြန်ပါတယ်။
အခုနှစ်၊ ဇန်နဝါရီ ၄ ရက်မှာ ကျရောက်တဲ့(၇၇)ကြိမ်မြောက်လွတ်လပ်ရေးနေ့မှာ နိုင်ငံတဝှမ်းအကျဉ်းကျခံနေရသူ ၅၈၆၄ ဦးကို လွတ်ငြိမ်းချမ်းသာခွင့်နဲ့ လွှတ်ပေးရာမှာ နိုင်ငံရေးအကျဉ်းသား ၆၀၀ ကျော်ပါဝင်တယ်လို့ စစ်ကောင်စီရဲ့ ပြန်ကြားရေးဝန်ကြီးအဆင့်ရှိသူက မီဒီယာတချို့ကိုပြောကြားခဲ့ပါတဘ်၊ စင်စစ်အားဖြင့် လွတ်မြောက်လာတဲ့ နိုင်ကျဉ်းဦးရေမှာ ၃၀၀ ကျော်သာရှိတာကြောင့် စစ်ကောင်စီဟာ လိမ်လည်ပြီး နိုင်ငံရေးအမြတ်ထုတ်တယ်လို့ နိုင်ငံရေးအကျဉ်းသားဟောင်းတွေက တုန့်ပြန်တာပါ။
သဘောထားထုတ်ပြန်ရာမှပါဝင်တဲ့ နိုင်ကျဉ်းဟောင်း ကိုဗျတ္တက “ နိုင်ကျဉ်းတွေကို လွှတ်ပေးချင်စိတ်၊ ဖြေလျှော့ပေးလိုစိတ် လုံး၀မရှိဘူးဆိုတာထင်ရှားပါတယ်၊ မလွှဲ မရှောင်သာလို့ နိုင်ငံတကာဖိအားလျော့အောင် ဖြေလျှော့ပေးရမယ်ဆိုရင်တောင် ထင်ယောင်ထင်မှားဖြစ်စေတဲ့ ထုတ်ပြန်ချက်တွေ၊ အခုလို အရေအတွက်အချက်အလက်လိမ်လည်တာမျိုးတွေလုပ်ဆောင်တာပါ “လို့မဲခေါင်ကို ပြောပါတယ်။
စစ်ကောင်စီရဲ့ လွတ်ငြိမ်း ချမ်းသာခွင့်ကို နိုင်ငံရေးအကျဉ်းသားဟောင်းတွေက မျက်ခြေမပြတ် စောင့်ကြည့်ခဲ့ရာ ဇန်နဝါရီ ၄ ရက်မှာ နိုင်ငံတဝန်း စစ်ကောင်စီရဲ့ အကျဉ်းစခန်း ၄၂ ခုက လွတ်မြောက်လာတဲ့ နိုင်ငံရေးအကျဉ်းသား အရေအတွက် ၃၀၀ ကျော်သာရှိကြောင်း စိစစ်တွေ့ရှိရတယ်လို့ ထုတ်ပြန်ချက်မှာဖော်ပြထားပါတယ်။
အခုလို လိမ်လည် ထုတ်ပြန်ပြီး နိုင်ငံရေးအမြတ်ထုတ်နေတာကို မိမိတို့ နိုင်ငံရေးအကျဉ်းသားဟောင်းများအနေနဲ့ ပြင်းထန်စွာ ကန့်ကွက်ရှုတ်ချကြောင်းနဲ့ နိုင်ငံရေးအကျဉ်းသားများကို နိုင်ငံရေးခြေနင်းခုံအဖြစ် ချနင်းကာ ပြည်သူလူထုနဲ့ တကမ္ဘာလုံးကို လိမ်လည်ရန် ကြိုးစားတဲ့လုပ်ရပ်မို့ မိမိတို့ နိုင်ငံရေးအကျဉ်းသားဟောင်းများ အနေနဲ့ မျက်ခြေမပြတ်စောင့်ကြည့်နေပြီး ပြတ်ပြတ်သားသား ဆန့်ကျင်ကန့်ကွက် သွားမှာဖြစ်ကြောင်း ထုတ်ပြန်ချက်မှာ ဆိုထားပါတယ်။
” ဒီလို နိုင်ငံရေးအကျဉ်းသားတွေကို အသုံးချပြီး နိုင်ငံရေးအမြတ်ထုတ်ခြင်းကို စစ်ကောင်စီက အကြိမ်ကြိမ်ပြုလုပ်နေတာဖြစ်တယ်၊ ဒီလို နိုင်ကျဉ်းတွေကို အသုံးချပြီးပြည်သူနဲ့ ကမ္ဘာကို လိမ်လည်တဲ့ စစ်ကောင်စီရဲ့ လုပ်ရပ်ကို ကျွန်တော်တို့ နိုင်ကျဉ်းဟောင်းတွေက အထဲမှာ ရှိတဲ့ နိုင်ကျဉ်းရဲဘော်တွေဘက်က ပြတ်ပြတ်သားသားရပ်တည်ပြီး ပြင်းပြင်းထန်ထန်ဆန့်ကျင်ကန့်ကွက်ကြောင်း ပြောလိုပါတယ်” လို့ကိုဗျတ္တကဆက်ပြောပါတယ်။
လွတ်ငြိမ်းစာရင်းမှာမပါတဲ့ နိုင်ငံရေးအကျဉ်းသားတွေဟာ စစ်ကောင်စီရဲ့ လွတ်ငြိမ်းချမ်းသာခွင့်ထက် တော်လှန်ရေးတပ်တွေရဲ့ အောင်ပွဲနဲ့ အကျဉ်းစခန်းတွေကို လာရောက်ချိုးဖျက်ဖွင့်လှစ်ချိန်ကိုသာ စောင့်မျှော်နေကြောင်းလည်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်က မဲခေါင်ကို ပြောပါတယ်။
မြေပြင်စိစစ်ချက်တွေအရ စစ်ကောင်စီအာဏာသိမ်းပြီးစဉ်ကနေ ( ၇၇) နှစ်မြောက် လွတ်လပ်ရေးနေ့အထိလွတ်ငြိမ်းခွင့် ၁၆ ကြိမ်ပေးခဲ့ရာမှာ အကျဉ်းသား တစ်သိန်း(၁၀၀၀၀၀)ကျော် လွတ်မြောက်ခဲ့ရာမှာ နိုင်ငံရေးအကျဉ်း ၈ ဒသမ ၆ ရာခိုင်နှုန်းကျော်သာ ပါဝင်တယ်လို့ မြန်မာ့မဟာဗျူဟာနဲ့ မူဝါဒလေ့လာရေးအင်စတီကျု (ISP-Myanmar) ကဇန်နဝါရီ ၆ ရက်မှာထုတ်ပြန်ပါတယ်။
MK-016/MK-017
#MeKongNews
