မဲခေါင်၊ ဇန်နဝါရီ ၅
ယုံကြည်ချက်ကြောင့် အကျဉ်းချခံထားရတဲ့ နိုင်ငံရေးအကျဉ်းသားတွေထဲက ၆၀၀ ဦး ကို မနေ့ကလွှတ်ပေးတယ်ဆိုတာ စစ်ကောင်စီရဲ့ ပြန်ကြားရေးက သတင်းအမှားပေးကာ ပြည်သူကို လိမ်လည်ခြင်းသာဖြစ်ပြီး စင်စစ်အားဖြင့် နိုင်ကျဉ်း ၂၀၀ ကျော်သာ ပြန်လည်လွတ်မြောက်လာပါတယ်။
၇၇ ကြိမ်မြောက် လွတ်လပ်ရေးနေ့အထိမ်းအမှတ်အဖြစ် အကျဉ်းထောင်အသီးသီးမှာ အကျဉ်းကျခံနေရဆဲဖြစ်တဲ့ အကျဉ်းသူ၊ အကျဉ်းသား ၅၈၆၄ ဦးကို လွတ်ငြိမ်းချမ်းသာခွင့်ပေးတဲ့အထဲမှာ နိုင်ငံရေးအကျဉ်းသား ၆၀၀ ပါဝင်တယ်လို့ စစ်ကောင်စီရဲ့ ပြန်ကြားရေးဝန်ကြီး အဖြစ် တာဝန်ယူထားတဲ့ ဇော်မင်းထွန်းက ပြောတာပါ။
မြေပြင်စာရင်းအရ နိုင်ငံရေးအကျဉ်းသားလွတ်မြောက်မှုဟာ အများကြီးကွဲလွဲနေတယ်လို့ မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများ ကွန်ရက် (PPNM) ရဲ့ ပြောရေးဆိုခွင့်ရှိသူ ကိုသိုလ်ထွန်းဦးက မဲခေါင်ကိုပြောပါတယ်။
လက်ရှိမြေပြင်မှာ ကောက်ယူရရှိတဲ့ စာရင်းအရ နိုင်ငံရေးအကျဉ်းသား ၂၀၀ ဝန်းကျင်သာ လွတ်မြောက်ပြီး ၄၀၀ နီးပါး စာရင်းပျောက်နေပါတယ်။
“နိုင်ငံရေးအကျဉ်းသားတွေကို ၆၀၀ ခန့်လွှတ်ပေးသယောင်၊ သတင်းမှားလွှင့်ခဲ့တယ်လို့ ကျွန်တော်တို့ယူဆပါတယ်။ မြေပြင်အချက်အလက်မှာတော့ နိုင်ငံရေးအကျဉ်းသား ၅၀၅ ပုဒ်မ လူဦးရေ ၆၀၀ လွတ်မယ်ဆိုတဲ့စာရင်းဟာ မြေပြင်ဒေတာနဲ့တော့ ကင်းကွာနေတယ်လို့တော့ ကျွန်တော်တို့ပြောချင်ပါတယ်ခင်ဗျာ” လို့ ကိုသိုလ်ထွန်းဦးက ပြောပါတယ်။
ပေါင်းတည်အကျဉ်းထောင်မှ အမျိုးသား လေးဦး၊ အမျိုးသမီး လေးဦး။
ဒိုက်ဦးအကျဉ်း ထောင်မှ အမျိုးသား နှစ်ဦး၊ အမျိုးသမီး သုံးဦး။
ပြည်အကျဉ်းထောင်မှ အမျိုးသား ခုနစ် ဦး၊ အမျိုးသမီး ၄ ဦး။
မိတ္ထီလာအကျဉ်းထောင်မှ အမျိုးသား သုံးဦး၊ အမျိုး သမီး နှစ်ဦး။
မအူပင်အကျဉ်းထောင်မှ အမျိုးသား လေးဦး၊ အမျိုးသမီး လေးဦး။
မြင်းခြံအကျဉ်းထောင်မှ အမျိုးသား ၁၃ ဦး၊ အမျိုးသမီး ကိုးဦး။
ရွှေဘိုအကျဉ်းထောင်မှ အမျိုးသား ၂၁ ဦး၊ အမျိုးသမီး ၁၁ ဦး။
ပခုက္ကူအကျဉ်းထောင်မှ အမျိုးသား ၁၁ ဦး၊ အမျိုးသမီး လေးဦး။
တောင်ငူအကျဉ်းထောင်မှ အမျိုးသား ၁၀ ဦး၊ အမျိုးသမီး ခြောက်ဦး။
ကလေးအကျဉ်းထောင်မှ အမျိုးသား သုံးဦး၊ အမျိုးသမီး တစ်ဦး။
သာယာဝတီအကျဉ်းထောင်မှ အမျိုးသား လေးဦး၊ အမျိုးသမီး ခုနစ်ဦး။
မကွေးအကျဉ်းထောင်မှ အမျိုးသား လေးဦး၊ အမျိုးသမီး သုံးဦး။
မိုးညှင်းအကျဉ်းထောင်မှ အမျိုးသား တစ်ဦး။
ဖျာပုံအကျဉ်းထောင်မှ အမျိုးသား တစ်ဦး။
ဟသ်ာတအကျဉ်းထောင်မှ အမျိုးသားတစ်ဦး။
သရက်အကျဉ်းထောင်မှ အမျိုးသား တစ်ဦး၊ အမျိုးသမီး ငါးဦး။
ကျိုက်မရောအကျဉ်းထောင်မှ အမျိုးသား သုံးဦး၊ အမျိုးသမီး သုံးဦး။
မုံရွာအကျဉ်းထောင်မှ အမျိုးသား ငါးဦး၊ အမျိုးသမီး သုံးဦး။
ပဲခူးအကျဉ်းထောင်မှ အမျိုးသားတစ်ဦး။
ထားဝယ်အကျဉ်းထောင်မှ အမျိုးသား နှစ်ဦး၊ အမျိုးသမီး တစ်ဦး။
မန္တလေးအိုးဘိုအကျဉ်းထောင်မှ အမျိုးသား ၁၃ ဦး၊ အမျိုးသမီး ၁၆ ဦး
မြိတ်အကျဉ်းထောင်မှ အမျိုးသား သုံးဦး၊ အမျိုးသမီး သုံးဦး။
ဘားအံအကျဉ်းထောင်မှ သုံးဦး။
ကသာအကျဉ်းထောင်မှ အမျိုးသား နှစ်ဦး။
လက်ရှိ PPNM ရဲ့နိုင်ငံရေးအကျဉ်းသားလွတ်မြောက်မှုစာရင်းကောက်ယူမှုအရ မြန်မာတစ်နိုင်ငံလုံးရှိ အကျဉ်းထောင် ၂၄ ခု မှ လွတ်မြောက်လာတဲ့နိုင်ငံရေးအကျဉ်းသားစုစုပေါင်းဟာ ၂၁၁ ဦးသာရှိပြီး အများအားဖြင့် လွတ်မြောက်လာသူတွေဟာ ပုဒ်မ ၅၀၅ (က) နဲ့ အကျဉ်းကျနေသူတွေဖြစ်သလို ပုဒ်မ (၅၀) ညနဲ့ အကျဉ်းကျနေသူတွေလည်း ပါဝင်ကာ ထောင်ဒဏ် တစ်နှစ်ဝန်းကျင်သာကျန်တဲ့သူတွေ အများဆုံးလွတ်မြောက်တာဖြစ်ပါတယ်။
လွတ်ငြိမ်းအကျဉ်းသားလွတ်ပေးတဲ့အထဲမှာ လွိုင်ကော်အကျဉ်းထောင်က အကျဉ်းသားလွတ်ပေးမှုဖြစ်စဉ် မတွေ့ရသေး။ ဗန်းမော်အကျဉ်းထောင်(တိုက်ပွဲဖြစ်ပွားနေဆဲ)၊ ဂန့်ဂေါအချုပ်(အမိန့်ကျထားပြီး နိုင်ငံရေးအကျဉ်းသားထားရှိ)၊ ညောင်ဦး အကျဉ်းထောင်၊ ကော့သောင်းအကျဉ်းထောင်၊ ပုသိမ်းအကျဉ်းထောင် အစရှိတဲ့ အကျဉ်းထောင် ခြောက်ခုက အကျဉ်းသားလွှတ်ပေးတဲ့အထဲမှာ နိုင်ငံရေးအကျဉ်းသားပါဝင်တာ မတွေ့ရှိရသေးဘူးလို့ (PPNM) က ထုတ်ပြန်ထားပါတယ်။
CJ-017
#MeKongNews
#နိုင်ကျဉ်း
#ပုဒ်မ၅၀၅
#၂၀၀ကျော်လွတ်
#၄၀၀နီးပါးစာရင်းပျောက်
