မိုင်းဆတ်မှာ မူးယစ်ဆေးဝါးမျိုးစုံ စိတ်တိုင်းကျ ရောင်းခွင့်ရနေလို့ လူငယ်တွေသုံးစွဲမှု မြင့်တက်
မဲခေါင်၊ ဇန်နဝါရီ ၃
ရှမ်းပြည်အရှေ့ပိုင်း၊ မိုင်းဆတ်မြို့မှာ စစ်ကောင်စီအုပ်ချုပ်ရေးပိုင်းနဲ့ ပြည်သူ့စစ်တွေပူးပေါင်းပြီး မူးယစ်ဆေးဝါးကို စိတ်တိုင်းကျ ရောင်းချခွင့်ရနေလို့ လူငယ်တွေကြား စိတ်ကြွဆေးပြား (ရာမ)၊ ကက်တမင်း၊ ဘိန်းဖြူနဲ့ ဘိန်းမဲသာမက Happy Water လို မူးယစ်ဆေးတွေ သုံးစွဲမှုမြင့်တက်နေတယ်လို့ ဒေသခံတွေက ပြောပါတယ်။
မိုင်းဆတ်မြို့၊ ကျဒယ်ကုန်းနဲ့ တာချီလိတ်ဘက်အထွက် မတ်ကျန်းက KTV တွေမှာ မူးယစ်ဆေးဝါးမျိုးစုံ အလွယ်တကူရနေပြီး တာချီလိတ်မြို့မှာဆိုရင် မိုင်းဆက်ဒေသခံနှစ်ဦး မူးယစ်ဆေးသုံးတာ လွန်သွားကာ သေဆုံးတာတွေအထိ ရှိတယ်လို့ ရဲတပ်ဖွဲ့နဲ့ နီးစပ်တဲ့ မိုင်းဆတ်ဒေသခံတစ်ဦးက ပြောပါတယ်။
မိုင်းဆက်မြို့က Idol KTV မှာ မူးယစ်ဆေးမှန်သမျှ အကုန်ရနေပြီး ရဲနဲ့ဌာနဆိုင်ရာမှန်သမျှကို လာဘ်ငွေပေးထားတာကြောင့် အာဏာပိုင်တွေကလည်း မသိကျိုးကျွံပြုနေတယ်လို့ ဒေသခံအမျိုးသမီးတစ်ဦးက မဲခေါင်ကို ပြောပါတယ်။
“အခု အသုံးများတာက Happy Water နဲ့ ဘိန်းစာရည်ပဲ။ Happy Water က ငြိမ့်ပြီးလှုပ်နေတာ၊ ခေါင်းခါခါ လည်ခါခါပေါ့။ သူက ချွေးထွက်မှ လျော့သွားတာ။ မျက်လုံးကလဲ မကြည့်နိုင်တော့ မျက်မှန်အမဲတပ်ပြီးလှုပ်နေရင် Happy ချထားတာပဲ။ သုံးတာများရင် အိပ်ပျော်သွားရင်သေနိုင်တယ်။ တာချီလိတ်မှာ မကြာသေးဘူး မိုင်းဆတ်က ၂ယောက် အဲဒါချပြီး နှိုးမရလို့ သေပြီးပြီ”လို့ သူက ပြောပါတယ်။
“Idol KTV မှာလည်းမူးယစ်ဆေးဝါးမှန်သမျှ အကုန်ရနေတယ်။ မိန်းကလေးတော်တော်များများလည်း သုံးနေပါတယ်။ ပိုင်ရှင်က လားဟူဆိုတော့ ပိုဆိုးတာပေါ့။ ဌာနဆိုင်ရာမှန်သမျှ ပေးကမ်းပြီးလုပ်နေတာပါ။ ဘယ်သူမှ မပြောရဲကြပါဘူး။ သတင်းဌာနမဟုတ်ရင် အထက်လူကြီးတွေမသိပါဘူး”လို့ သူက ပြောပါတယ်။
ရှမ်းပြည်အရှေ့ပိုင်းမှာ Happy Water ဖျော်ပြီးသား စပရိုက်တစ်ဘူးတစ်ဘူးစာကို ဘတ်၁၅ဝ စျေးရှိကာ တစ်ကီလိုဂရမ်ပါ အထုပ်ကြီးတစ်ထုပ်ကို ကျပ်ငွေ လေးသိန်းခွဲလောက် ပေါက်ဈေးရှိတယ်လို့ ဒေသခံတွေထံက သိရပါတယ်။
Happy Water အထုတ်ကြီး ၂ ထုပ်ကို ရန်ကုန်ကမှာလို့ လေယာဥ်နဲ့ပို့ပေးတဲ့ လူကုန်တားက ရဲအုပ်နဲ့ လေဆိပ်တာဝန်ကျ ရဲမေတစ်ဦးတို့ အဖမ်းခံရပြီး ထောင်၁၀နှစ်ကျော် ကျတဲ့ ဖြစ်စဉ်တွေလည်း ရှိခဲ့တယ်လို့ သိရပါတယ်။
မိုင်းဆတ်မှာ ရဲတွေက မူးယစ်ဆေးစွဲသူတွေမဖမ်းလို့ ရပ်ရွာကို ဒုက္ခပေးနေတဲ့မူးယစ်ဆေးဝါးသုံးစွဲသူ ၁၃ ဦးကို ပြီးခဲ့တဲ့ ၂၀၂၄ခုနှစ် သြဂုတ်လ ၂၆ရက်က ပြည်သူတွေကိုယ်တိုင် ဖမ်းပြီး ရဲစခန်းကို ပို့ခဲ့ရတဲ့ ဖြစ်စဥ်လည်း ရှိသေးတယ်လို့ သိရပါတယ်။
မိုင်းဆတ်သာမက ရှမ်းပြည်အရှေ့ပိုင်းကမြို့တွေမှာ စစ်တပ်အာဏာသိမ်းပြီးနောက်ပိုင်းမှာ မူးယစ်ဆေးဝါး သုံးစွဲမှု တစ်ဖန်ပြန်ကြီးထွားလာနေသလို မှုခင်းတွေလည်းတိုးလာတယ်လို့ ဒေသခံတွေက ပြောဆိုနေကြပါတယ်။
MK – 012
#MeKongNews
